వేసవి రాకముందే గోదారిని ఏడారి చేశారంటూ రేవంత్ సర్కార్‌పై బిఆర్‌ఎస్ ఎంఎల్‌సి కల్వకుంట్ల కవిత మండిపడ్డారు. తెలంగాణ తొలి ముఖ్యమంత్రి కెసిఆర్‌పై కక్షలో భాగంగా సజీవజలధారను వట్టిబోయేలా చేశారంటూ విమర్శించారు. ఈ మేరకు తన ఎక్స్ ఖాతాలో ట్విట్ చేశారు. కాళేశ్వరం ప్రాజెక్టు విషయంలో కాంగ్రెస్ సర్కార్ వహిస్తున్న నిర్లక్ష్యంపై మండిపడ్డారు. మేడిగడ్డ నుంచి ధర్మపురి వరకు వంద కి.మీ. పొడవునా గోదావరిని బిఆర్‌ఎస్ ప్రభుత్వం సజీవ జలధారగా మార్చిందని గుర్తు చేశారు. మండే ఎండాకాలంలోనూ నిండు కుండలా కలకళలాడేలా చేసిందన్నారు. కానీ కెసిఆర్‌పై కక్షతో కాళేశ్వరం బ్యారేజీలను కాంగ్రెస్ సర్కారు ఎండబెట్టిందని మండిపడ్డారు.
2014కు ముందులా ఫిబ్రవరిలోనే గోదావరి పట్టిపోయి ఎడారిని తలపిస్తోందని పేర్కొన్నారు. ఇప్పుడే ఇట్లా ఉంటే.. ఏప్రిల్, మే నెలల్లో పరిస్థితి ఇంకెంత దారుణంగా మారుతుందోనని ఆవేదన వ్యక్తం చేశారు. తలాపునే గోదావరి ఉన్నా, గుక్కెడు నీటి కోసం మళ్లీ అరిగోస పడే రోజులను కాంగ్రెస్ ప్రభుత్వం ‘గ్యారెంటీ’గా తెచ్చిందని విమర్శించారు. కెసిఆర్ హయాంలో నిండుకుండలా నీటితో కళకళలాడిన గోదావరి నది.. వేసవి రాకముందే ఎడారిని తలపిస్తోందని అన్నారు. సుందిళ్ల బ్యారేజీ బ్యాక్ వాటర్‌తో గతంలో పెద్దపల్లి జిల్లా గోదావరిఖని కోల్ బెల్ట్ బ్రిడ్జి వద్ద నిండుగా నీళ్లు ఉండేవి అని పేర్కొన్నారు.
రేవంత్ సర్కారు నిర్లక్ష్యం.. ‘పాలమూరు’కు శాపం
14 నెలలుగా పాలమూరు ఎత్తిపోతలను కోల్డ్ స్టోరేజీలో పెట్టిన రేవంత్ సర్కారు.. ప్రాజెక్టుకు అనుమతుల సాధనను గాలికొదిలేసిందని బిఆర్‌ఎస్ ఎంఎల్‌సి కల్వకుంట్ల కవిత ఎక్స్ వేదికగా ఆరోపించారు. కెసిఆర్ హయాంలో సాధించిన పర్యావరణ అనుమతులను న్యాయవివాదాల సుడి నుంచి బయటకు తేలేకపోయిందని, ఎంతో ముందు చూపుతో కెసిఆర్ పాలమూరుకు 90 టిఎంసిల నికర జలాలు కేటాయించి ప్రాజెక్టును గట్టెక్కించే ప్రయత్నం చేస్తే.. ఆ విషయాన్ని కేంద్రానికి సరిగా చెప్పలేక తుది అనుమతులను ఇంకింత సంక్లిష్టం చేసిందని పేర్కొన్నారు. వెరసి.. కృష్ణా జలాల నీటి కేటాయింపులు తేలేవరకు పాలమూరు రంగారెడ్డికి జాతీయ హోదా ఇవ్వలేమని పార్లమెంట్ సాక్షిగా కేంద్రం తేల్చిచెప్పిందని, నల్లమల బిడ్డనని చెప్పుకునే రేవంత్ రెడ్డి.. పాలమూరు ప్రాజెక్టు విషయంలో మీ చిత్తశుద్ధి ఏపాటిదో ఈ రోజు తేలిపోయిదంటూ ట్వీట్ చేశారు.