పుణె : మహారాష్ట్ర లోని పుణెలో పార్కింగ్ చేసిన బస్సులో యువతిపై అత్యాచారం చేసి పరారైన నిందితుడి కోసం పోలీసులు ముమ్మరంగా గాలిస్తున్నారు. అతడు చెరకు తోటలో దాక్కున్నట్టు సమాచారం అందడంతో డ్రోన్లు, జాగిలాలతో అన్వేషణ సాగిస్తున్నట్టు పోలీసు వర్గాలు పేర్కొన్నాయి. పుణె లోని పోలీస్ స్టేషన్‌కు దాదాపు 100 మీటర్ల దూరంలో నిత్యం రద్దీగా ఉండే స్వర్‌గేటు బస్టాండ్ వద్ద 26 ఏళ్ల యువతిపై మంగళవారం తెల్లవారు జామున జరిగిన ఈ దారుణంపై విపక్షాలు భగ్గుమంటున్నాయి. ఈ సంఘటనపై ఇప్పటికే కేసు నమోదు చేసుకున్న పోలీసులు 13 ప్రత్యేక బృందాలను ఏర్పాటు చేశారు. వీటిలో ఎనిమిది క్రైమ్ బ్రాంచ్ బృందాలు ఉన్నాయి.
తాజాగా నిందితుడి ఫోటోను విడుదల చేసిన పోలీసులు అతడి ఆచూకీ చెప్పిన వారికి రూ. లక్ష రివార్డు ఇవ్వనున్నట్టు ప్రకటించారు. నిందితుడు దాక్కొని ఉన్న ప్రదేశంలో చెరకు పంట విస్తారంగా ఉండటంతో పోలీసులు స్నిఫర్ డాగ్‌లు, డ్రోన్లను వినియోగించారు. చెరకు మొక్కలు 10 అడుగుల ఎత్తు వరకు పెరగడంతో కాలినడకన వెతికేందుకు కష్టంగా ఉన్న నేపథ్యంలో డ్రోన్లను వినియోగిస్తున్నట్టు తెలిపారు. నిందితుడు దత్తాత్రేయ రాందాస్ కూరగాయల ట్రక్కులో దాక్కొని పోలీసుల నుంచి తప్పించుకొని స్వస్థలానికి వెళ్లి, అక్కడ దుస్తులు, బూట్లు మార్చుకున్నట్టు పోలీసులు భావిస్తున్నారు.
అతడి కుటుంబ సభ్యులు, తెలిసిన వారి తోనూ మాట్లాడినట్టు సమాచారం. మరోవైపు నిందితుడు ఉన్న లొకేషన్ తెలిసిందని, మంత్రి యోగేశ్ కదం తెలిపారు. యువతిపై దారుణానికి పాల్పడిన నిందితుడిని వదిలిపెట్టేది లేదని , డిప్యూటీ సిఎం ఏక్‌నాథ్ షిండే అన్నారు. బాధితురాలికి న్యాయం చేస్తామన్నారు. మరణ శిక్షే సరైందంటూ మరో డిప్యూటీ సిఎం అజిత్ పవార్ చేసిన వ్యాఖ్యలను సమర్ధించారు.
జస్టిస్ చంద్రచూడ్ కీలక వ్యాఖ్యలు
ఈ సంఘటనపై సుప్రీం కోర్టు మాజీ ప్రధాన న్యాయమూర్తి జస్టిస్ డీవై చంద్రచూడ్ కీలక వ్యాఖ్యలు చేశారు. “ నిర్భయ సంఘటన తరువాత చట్టాల్లో ఎన్నో మార్పులు వచ్చాయి. కేవలం చట్టాల తోనే అలాంటి సంఘటనలను నివారించలేం. మహిళల కోసం తీసుకొచ్చిన చట్టాలను సక్రమంగా అమలు చేయాలి. ఎక్కడకు వెళ్లినా, తాము సురక్షితంగానే ఉన్నామనే నమ్మకాన్ని కలిగించాలి. ఇలాంటి కేసుల్లో సరైన దర్యాప్తు , కఠిన చర్యలు అత్యంత కీలకం. న్యాయవ్యవస్థ, పోలీసులకు పెద్ద బాధ్యత ఉంది. వీరితోపాటు సమాజానికి కూడా ” అని జస్టిస్ డీవై చంద్రచూడ్ అన్నారు.