మంత్రి ఉత్తమ్ కుమార్ రెడ్డి అసెంబ్లీలో పచ్చి అబద్ధాలు మాట్లాడారని మాజీ మంత్రి హరీష్‌రావు ధ్వజమెత్తారు. కృష్ణా జలాల్లో తెలంగాణకు జరిగిన అన్యాయానికి కారణం కాంగ్రెస్ పార్టీ అని విమర్శించారు. కాంగ్రెస్ నిర్లక్ష్యం వల్ల 299 టిఎంసిల నీటి పంపకాలు చేశారని చెప్పారు. 299 టిఎంసిల నీటి వినియోగం కంటే ఎక్కువ ప్రాజెక్టులు లేవని తెలిపారు. పదేళ్లు సిఎంగా ఉన్న కెసిఆర్ చావును సిఎం రేవంత్ రెడ్డి కోరుకున్నారని తీవ్ర ఆగ్రహం వ్యక్తం చేశారు. అసెంబ్లీ మీడియా పాయింట్‌లో హరీష్‌రావు చిట్‌చాట్ చేశారు. తెలంగాణ కోసం ప్రాణాలు ఫణంగా పెట్టిన కెసిఆర్ చావు కోరుకోవడం తప్పు అని, అందుకే అసెంబ్లీలో సిఎం రేవంత్‌రెడ్డి స్పీచ్‌ను బహిష్కరించామని అన్నారు. రాష్ట్రంలో ప్రాజెక్టులు కట్టలేదు కాబట్టి..299 టిఎంసిల నీరు తాత్కాలికంగా కేటాయించారని హరీష్ రావు గుర్తుచేశారు. ప్రాజెక్టులు కట్టని పాపం కాంగ్రెస్‌దేనని విమర్శించారు. ఢిల్లీకి రాహుల్ బొజ్జా, ఇఎన్‌సి అనిల్ వెళ్లారని.. నీటి కేటాయింపులపై చర్చించారని చెప్పారు.
తెలంగాణకు అన్యాయం జరిగేలా ఎందుకు ఒప్పుకుని వచ్చారని ప్రశ్నించారు. పొతిరెడ్డిపాడు కోసం పిజెఆర్ కొట్లాడారని, ఉత్తమ్ కుమార్ రెడ్డి పదవుల కోసం పెదవులు మూసుకున్నారని ఆరోపించారు. తెలంగాణ కాంగ్రెస్ నాయకులు ఒక్క రోజు కూడా వ్యతిరేకించలేదని, తాము 40 రోజులు అసెంబ్లీని స్థంభింపజేశామని గుర్తుచేశారు. తెలంగాణ కోసం తాము ఆ రోజు ఆరు మంత్రి పదవులు వదులుకున్నామని చెప్పారు. మంత్రి ఉత్తమ్ ఎపి సిఎం చంద్రబాబు దగ్గరకు వెళ్లి భోజనం చేసి వచ్చారని, కృష్ణ నీటిలో తెలంగాణకు అన్యాయం చేశారని మండిపడ్డారు. ఆ తర్వాత ఉత్తమ్ కుమార్ రెడ్డి శ్రీశైలం ఖాళీ చేసే లాగా ద్రోహం చేశారని విమర్శించారు. సెక్షన్ 3ను సాధించింది కెసిఆర్ అని హరీష్‌రావు గుర్తుచేశారు. 573 టిఎంసిల నీళ్లు సెక్షన్ 3 ద్వారా తెచ్చింది తామేనని చెప్పారు. ద్రోహ చరిత్ర ఉత్తమ్‌ది.. త్యాగ చరిత్ర బిఆర్‌ఎస్‌ది అని ఉద్ఘాటించారు. రాయలసీమ లిఫ్ట్ ఇరిగేషన్ ప్రాజెక్టుపై స్టే తెచ్చింది బిఆర్‌ఎస్ అని పేర్కొన్నారు.
నల్గొండలో పంటలు ఎండిపోవడానికి కాంగ్రెస్ కారణం అని, కృష్ణా నీళ్లను సముద్రంలో కలిపారని ధ్వజమెత్తారు. కెసిఆర్ సీతారామ ప్రాజెక్టు కట్టడం వల్ల ఖమ్మం జిల్లాకు నీళ్లు ఇవ్వగలిగామని తెలిపారు. హుజూర్‌నగర్‌ను ముంపునకు గురి చేసి ఆంధ్రాలో మూడో పంటకు నీళ్లు ఇచ్చారని ఆరోపించారు. పులిచింతల నిర్వాసితులకు వందల కోట్ల రూపాయలు ఇచ్చి కాపాడుకున్నామని హరీష్‌రావు పేర్కొన్నారు.