అమరావతి: సిఎం జగన్ మోహన్ రెడ్డికి ప్రజల్లో ఆదరణ చూసి జనసేన అధినేత పవన్ కల్యాణ్ తట్టుకోలేకపోతున్నారని వైసిపి నేత, కాపు కార్పొరేషన్ చైర్మన్ అడపా శేషు మండిపడ్డారు. అడపా శేషు మీడియాతో మాట్లాడారు. సిఎం జగన్ అంటే మాజీ ముఖ్యమంత్రి చంద్రబాబు నాయుడు, పవన్ వణికిపోతున్నారన్నారు. జగన్ పాలనలో సంక్షేమాన్ని చూసి ఓర్వలేకపోతున్నారని ఎద్దేవా చేశారు.
Also Read: మల్కాజ్ గిరిలో కిడ్నాప్‌కు గురైన బాలుడు క్షేమం…
చంద్రబాబు ముఖంలో ఆనందం కోసమే పవన్ పోరాటం చేస్తున్నారని, పవన్‌కు కావాల్సింది చంద్రబాబు అని, జనసేన కార్యకర్తలు కాదని చురకలంటించారు. పవన్ ఏం మాట్లాడుతున్నారో ఆయనకే ఆర్థం కావడంలేదన్నారు. జనసేన పార్టీకి సిద్ధాంతం, విధానమంటూ ఏమీ లేవని, చంద్రబాబు చేసిన మోసాలు పవన్‌కు కనిపించడంలేదా? అని అడిగారు. పేదల సంక్షేమం కోసం సిఎం జగన్ మోహన్ రెడ్డి లక్షల కోట్లు ఖర్చు చేస్తున్నారని దుయ్యబట్టారు. ఓటుకు నోటు కేసులో చంద్రబాబు అడ్డంగా దొరికిపోయి హైదరాబాద్ నుంచి విజయవాడకు పారిపోయి వచ్చారని మండిపడ్డారు.