నూతన అధ్యక్షుడు డొనాల్డ్ ట్రంప్ అమెరికా ప్రజలను, ప్రపంచాన్ని ఆశ్చర్యంలో ముంచెత్తే ఒక వ్యాపార ప్రకటన విడుదల చేశారు. ధనవంతులైన విదేశీయులకు 5 మిలియన్ డాలర్లకు ‘అమెరికన్ పౌరసత్వం’ అమ్మేందుకు ఒక కొత్త పథకాన్ని ప్రకటించారు. ఈ ‘గోల్డ్ కార్డ్ ఆఫర్’ అనే పథకం, గ్రీన్ కార్డ్ నివాస స్థితి, అమెరికన్ పౌరసత్వానికి ఏకంగా కొనుగోలు చేసే మార్గాన్ని అందిస్తుందని అందులో ప్రకటించారు. ట్రంప్ ఈ ప్రణాళిక ద్వారా ‘జాతీయ రుణాన్ని’ త్వరగా తీర్చడంలో సహాయపడుతుందని వాదిస్తున్నప్పటికీ విమర్శకులు దీనిని అమెరికన్ పౌరసత్వాన్ని ‘వాణిజ్య సరుకు’ గా మార్చటాన్ని, అమెరికా దేశం పరువును, విలువలను అంతర్జాతీయ అంగట్లో దెబ్బతీసే ప్రమాదకరమైన నిర్ణయంగా విమర్శలు చేస్తున్నారు. అమెరికన్ మీడియా ఈ ప్రకటనపై తీవ్ర విమర్శలకు దిగింది. అమెరికెన్ ప్రజలు, మేధావులు ట్రంప్ చర్యలను ఆక్షేపిస్తున్నారు. ట్రంప్ మనస్తత్వం, ప్రవర్తనను గురించిన సందేహాలు, ప్రశ్నలను లేవనెత్తుతున్నాయి.
ఈ ‘కొత్త అవమానం’ పౌరసత్వాన్ని అమ్మడం అనే ఆలోచన పూర్తిగా కొత్తది కాదని ట్రంప్ సమర్ధకులు వాదన. ఎందుకంటే మాల్టా, సెయింట్ కిట్స్, నెవిస్ వంటి దేశాలు ఇటువంటి పథకాలను ఇప్పటికే కలిగి ఉన్నాయి. అయితే, అమెరికా ఎల్లప్పుడూ కష్టపడి పనిచేసే వలసదారుల దేశంగా తనకు తాను గర్వపడుతుంది. ఇక్కడ పౌరసత్వం చట్టబద్ధమైన ప్రక్రియల ద్వారా సాధించబడుతుంది. అంతే కానీ అమ్ముడుపోయే లగ్జరీ వస్తువులా కొనుగోలు చేయబడదు. ట్రంప్ ‘గోల్డ్ కార్డ్’ పథకం ఇప్పటికే ఉన్న ఇబి -5 ఇమ్మిగ్రెంట్ ఇన్వెస్టర్ ప్రోగ్రామ్‌ను భర్తీ చేయడానికి ప్రతిపాదించబడింది. దీనిని విమర్శకులు తీవ్రంగా ఖండిస్తున్నారు. ఈ పథకం అమెరికన్ పౌరసత్వాన్ని ఒక వాణిజ్య వస్తువుగా తగ్గించిందని, సమాజానికి ఆర్థికంగా కాకుండా ఇతర మార్గాల్లో కృషి చేసే వలసదారులను బహిష్కరిస్తుందని వారు అభిప్రాయపడుతున్నారు. ఇబి 5 ప్రోగ్రామ్, దాని స్వంత వివాదాలతో సహా కనీసం ఉద్యోగాలు సృష్టించడం, అమెరికా ఆర్థిక వ్యవస్థకు దోహదం చేయడం అనే షరతును కలిగి ఉంది. కానీ ట్రంప్ గోల్డ్ కార్డ్ పథకం డబ్బుకు మాత్రమే ప్రాధాన్యతనిస్తుంది. దేశానికి ఏదైనా వాస్తవిక దోహదం చేయడం కంటే ధనవంతుల ప్రయోజనాల ముందు దాసోహం కావటం ఏంటని ప్రశ్నిస్తున్నారు. ట్రంప్ సామాజిక, న్యాయ సూత్రాల కంటే మానవ సమానత్వ విలువల కంటే డబ్బున్న వాళ్ళకే ప్రాధాన్యతనిస్తున్నాడనే ఆరోపణలకు దారితీసింది.
అమెరికా మీడియా విమర్శ
ట్రంప్ ప్రకటన అమెరికన్ విలువలకు ద్రోహం అంది. ఈ ప్రకటనను అమెరికన్ మీడియా తీవ్రంగా ఖండించింది. ది న్యూయార్క్ టైమ్స్, ది వాషింగ్టన్ పోస్ట్, అలాగే సిఎన్‌ఎన్ వంటి ప్రముఖ మీడియా సంస్థలు ఈ పథకాన్ని ‘అమెరికన్ విలువలకు విరుద్ధం’, ‘దేశం స్థాపన సూత్రాలకు ద్రోహం’ అని పేర్కొన్నాయి. పౌరసత్వం అనేది అమ్మడానికి ఉన్న ఉత్పత్తి సరుకు కాదు. అమెరికా చట్టాన్ని పాటించడం, అమెరికన్ సమాజంలో కలిసిపోవడం ద్వారా సాధించే ఒక ప్రత్యేక ‘హక్కు’, ఒక ‘విలువ’ అని తమ ఎడిటోరియల్ బోర్డులు స్పష్టం చేశాయి. లాస్ ఏంజెల్స్ టైమ్స్ ఈ ప్రణాళికను ‘అమెరికన్ అనే పదం అర్థాన్ని డబ్బుకు అమ్మేందుకు ఒక నిరాశ, దురాశతో కూడిన ప్రయత్నం’ అని వర్ణించింది. సోషల్ మీడియాలో కూడా ఈ ప్రకటనపై తీవ్ర విమర్శలు చెలరేగుతున్నాయి. హ్యాష్ ట్యాగ్‌లు #సిటిజన్ షిప్ ఫర్ సేల్#, # సిటిజన్ షిప్ నాట్ నాట్ ఫర్ సేల్# అంటూ ట్విట్టర్‌లో ట్రెండ్ అయ్యాయి. అనేక మంది వినియోగదారులు, ధనవంతులు దేశంలోకి ప్రవేశించడానికి డబ్బు చెల్లించగలరనే ఆలోచనపై ఆగ్రహం వ్యక్తం చేశారు. అయితే శరణార్థులు, ఆశ్రయ అభ్యర్థులు, తక్కువ ఆదాయం ఉన్న వలసదారులు సంక్లిష్టమైన, కఠినమైన ఇమిగ్రేషన్ వ్యవస్థను ఎదుర్కోవలసి ఉంటుంది.
ఈ ప్రకటన ట్రంప్ మానసిక స్థితిపై, నిర్ణయం తీసుకునే సామర్థ్యంపై చర్చలను మళ్లీ ప్రారంభించింది. ట్రంప్ దేశం మంచి కంటే వ్యక్తిగత స్వార్థం, ఆర్థిక లాభాలకు ప్రాధాన్యతనిస్తున్నాడని విమర్శకులు దీర్ఘకాలంగా ఆరోపిస్తున్నారు. ఈ గోల్డ్ కార్డ్ పథకం ఆరోపణలకు మరింత ఇంధనాన్ని అందించింది. మానసిక వైద్యులు, రాజకీయ విశ్లేషకులు ట్రంప్ డబ్బు, అధికార వ్యామోహం పట్ల ఉన్న ఆసక్తి అతని నిర్ణయాలను మబ్బుతో కప్పివేసిందేమో అని అభిప్రాయపడ్డారు. డాక్టర్ బ్యాండీ లీ, ‘ది డేంజరస్ కేస్ ఆఫ్ డొనాల్డ్ ట్రంప్’ పుస్తక రచయిత, ట్రంప్ మానసిక స్థితి గురించి ముందే ఆందోళనలు వ్యక్తం చేశారు. గోల్డ్ కార్డ్ పథకం సందర్భంగా ఇది స్థిరమైన నాయకుడి ప్రవర్తన కాదు. ఇది లోతైన దురాశ- వ్యక్తిగత లేదా రాజకీయ లాభాల కోసం దేశం మూలాధారాలను దోచుకునే సిద్ధాంతాన్ని ప్రతిబింబిస్తుంది అని ఆమె వ్యాఖ్యానించారు. ఇతరులు ట్రంప్ వివాదాస్పద వ్యాపార వ్యవహారాల చరిత్ర ‘లాభం – నష్టం’ దృష్టికోణం నుండి పాలనను చూసే అతని ధోరణిని పబ్లిక్ ఆఫీస్ కోసం తగినది కాదని విమర్శించారు. ట్రంప్ ప్రతిపాదన అమెరికా ఇమిగ్రేషన్ విధానం భవిష్యత్తు గురించి తీవ్రమైన ప్రశ్నలను లేవనెత్తింది. పౌరసత్వాన్ని కొనుగోలు చేయగలిగితే కష్టపడి పనిచేసి మెరుగైన జీవితం కోసం అమెరికాకు వచ్చే మిలియన్ల మంది వలసదారులకు అర్థం ఏమిటి? ఈ పథకం ఇమిగ్రేషన్ వ్యవస్థపై ప్రజల విశ్వాసాన్ని దెబ్బతీస్తుందని, ఇప్పటికే విభజించబడిన దేశాన్ని మరింత విభజిస్తుందని విమర్శకులు హెచ్చరిస్తున్నారు.
ఇంకా, ఈ పథకంలో రష్యన్ పెట్టుబడిదారులను చేర్చడం ఆశ్చర్యాన్ని కలిగించింది. ట్రంప్ రష్యాతో అనుకూలమైన వ్యవహారాల చరిత్రను పరిగణనలోకి తీసుకున్నప్పుడు గోల్డ్ కార్డ్ పథకానికి రష్యన్లు అర్హులేనా అని అడిగినప్పుడు, ట్రంప్ ‘కొందరు రష్యన్ ధనవంతులు చాలా మంచివారు’ అని ప్రతిస్పందించారు. ఈ వ్యాఖ్య ఈ పథకం జాతీయ రుణానికి సంబంధించినది కాకుండా ధనవంతుల మిత్రులకు, వారి ప్రయోజనాలకు అనుకూలంగా ఉందనే అనుమానాలను మరింత పెంచింది.
అమ్మకానికి దేశ పౌరసత్వం
ట్రంప్ గోల్డ్ కార్డ్ పథకం కంటే విలువైనది డబ్బుకు ప్రాధాన్యతనిచ్చే ట్రంప్‌ను ప్రమాదకారిగా గుర్తిస్తుంది. అమెరికన్ పౌరసత్వాన్ని అమ్మడం ద్వారా అతను దేశం ఇమిగ్రేషన్ వ్యవస్థ సమగ్రతను దెబ్బ తీయటమే కాకుండా, కష్టపడి పనిచేసే మిలియన్ల మంది వలసదారులను కూడా ద్రోహం చేసినట్లే. అమెరికన్ మీడియా, ప్రజలు ఈ ప్రతిపాదనను దురాశతో కూడిన అదృష్టవంతుల ప్రయోజనాల కోసం దేశం మూలాధారాలను దోచుకునే ప్రయత్నంగా వారు ఈ ప్రకటనను ఖండించారు. దీనిపై చర్చ కొనసాగుతున్నప్పటికీ ఒక విషయం స్పష్టంగా ఉంది. అమెరికన్ పౌరసత్వం అమ్మకానికి లేదు. ఇది కష్టపడి పనిచేయడం, పట్టుదల, దేశాన్ని నిర్మించే విలువలకు, అంకితభావం ద్వారా సాధించే ఒక ప్రత్యేక హక్కు. ట్రంప్ గోల్డ్ కార్డ్ పథకం ఆగ్రహాన్ని రేకెత్తించినప్పటికీ అమెరికా ప్రపంచ వ్యాప్తంగా ప్రజలకు ఆశ కాంతినిచ్చే దేశం అనే సూత్రాలను రక్షించుకోవడం ప్రాముఖ్యతను మనకు గుర్తుచేసింది.
డాక్టర్. కోలాహలం రామ్‌కిశోర్
98493 28496