జెఇఇ అడ్వాన్స్‌డ్‌లో తెలుగు పిడుగులు
అఖిల భారత స్థాయిలో మృదుల్ అగర్వాల్‌కు ఫస్ట్ ర్యాంకు
బాలికల విభాగంలో ప్రథమ ర్యాంకు సాధించిన కావ్య చోప్రాకు
పోచంపల్లి విద్యార్థికి ఆలిండియా స్థాయిలో 4వ ర్యాంకు
ఒంగోలు విద్యార్థికి 5వ ర్యాంకు
టాప్ టెన్‌లో ముగ్గురు…టాప్ 100లో 22 మంది
తెలుగు విద్యార్థులకు ఉత్తమ ర్యాంకులు
మనతెలంగాణ/హైదరాబాద్ : దేశంలో ప్రతిష్టాత్మక ఐఐటిల్లో ప్రవేశాలకు నిర్వహించిన జెఇఇ అడ్వాన్స్‌డ్ పరీక్ష ఫలితాలు విడుదలయ్యాయి. ఫలితాలలో తెలుగు విద్యార్థులు సత్తా చాటారు. ఆఖిల భారత స్థాయిలో టాప్ 10లో ముగ్గురు విద్యార్థులు ర్యాంకులు సాధించగా, టాప్ 100లో 22 మంది విద్యార్థులు ఉత్తమ ర్యాంకులు సాధించారు. దేశవ్యాప్తంగా ఆలిండియా స్థాయిలో జనరల్ కేటగిరీలో మృదుల్ అగర్వాల్‌కు మొదటి ర్యాంకు రాగా .. బాలికల విభాగంలో కావ్య చోప్రాకు ప్రథమ ర్యాంకు లభించింది. అలాగే, తెలంగాణలోని భూదాన్ పోచంపల్లికి చెందిన రామస్వామి సంతోష్‌రెడ్డి అఖిల భారత స్థాయిలో 4వ ర్యాంకు, జనరల్ ఇడబ్ల్యూఎస్ కేటగిరీలో ప్రథమ ర్యాంకు సాధించారు. అలాగే నగరంలో ఇంటర్మీడియేట్ చదువుకున్న ఒంగోలు జిల్లాకు చెందిన పోలు లక్ష్మీ సాయి లోకేష్‌రెడ్డి ఆలిండియా స్థాయిలో 5వ ర్యాంకు సాధించారు.
ఈ ఫలితాల్లో గుంటూరు జిల్లాకు చెందిన మొదుల్ల రుషికేశరెడ్డికి పదో ర్యాంకు రాగా .. విజయవాడకు చెందిన దివాకర్ సాయికి 11వ ర్యాంకు లభించింది. టాప్ 100లో తెలంగాణ నుంచి 8 మంది విద్యార్థులు ఉన్నారు. ఎస్‌సి కేటగిరిలో నందిగామ నిఖిల్‌కు మొదటి ర్యాంకు సాధించగా, ఒబిసి కేటగిరీలో ప్రియాన్షు యాదవ్, ఎస్‌టి కేటగిరీలో బిజిలి ప్రచోత్తమ్ వర్మలకు ప్రథమ ర్యాంకులు లభించాయి. అక్టోబరు 3వ తేదీన జెఇఇ అడ్వాన్స్‌డ్ పరీక్షలు నిర్వహించగా, ఆ ఫలితాలను ఖరగ్‌పూర్ ఐఐటి శుక్రవారం ఉదయం విడుదల చేసింది. జెఇఇ అడ్వాన్స్‌డ్ పరీక్షకు 1,51,193 మంది విద్యార్థులు రిజిస్ట్రేషన్ చేసుకోగా .. 1,41,699 మంది విద్యార్థులు హాజరయ్యారు. ఈ ఫలితాల్లో 41,862 మంది విద్యార్థులు అర్హత సాధించారు. అర్హత సాధించిన వారిలో 35,410 మంది బాలురు కాగా .. 6,452 మంది బాలికలు ఉన్నారు.
ఈ పరీక్షకు ఒక ట్రాన్స్‌జెండర్ రిజిష్టర్ చేసుకోగా, పరీక్షకు హాజరు కాలేదు. విద్యార్థులు సాధించిన ర్యాంకుల ఆధారంగా దేశంలోని 23 ఐఐటీలతో సహా 114 విద్యా సంస్థల్లో ప్రవేశాలు కన్పించనున్నారు. మొత్తం 50 వేల సీట్లు అందుబాటులో ఉన్నాయి. తెలంగాణ, ఆంధ్రప్రదేశ్ రాష్ట్రాల నుంచి జెఇఇ అడ్వాన్స్‌డ్‌కు 20 వేల మంది విద్యార్థులు హాజరయ్యారు. శనివారం నుంచి ప్రవేశాల ప్రక్రియ ప్రారంభం కాగా, రిజిస్ట్రేషన్లకు ఈ నెల 25 వరకు అవకాశం ఉంది. ఈ నెల 27వ తేదీన మొదటి విడత సీట్లు కేటాయింపు జరపనున్నారు. ఫలితాల కోసం : https : /jeeadvac.in వ్బైసైట్ చూడవచ్చు.
పోచంపల్లి విద్యార్థికి 4వ ర్యాంకు
జెఇఇ అడ్వాన్స్‌డ్ ఫలితాల్లో యాదాద్రి భువనగిరి జిల్లా భూదాన్ పోచంపల్లిలోరని నారాయణగిరికి చెందిన రామస్వామి సంతోష్‌రెడ్డి ఆలిండియా స్థాయిలో నాలుగవ ర్యాంకు, ఇడబ్లూఎస్ కోటాలో ప్రథమ ర్యాంకు సాధించారు. మధ్యతరగతి కుటుంబానికి చెందిన రామస్వామి తండ్రి వృత్తి రిత్యా వ్యవసాయధారుడు. తల్లి గృహిణి. అలాగే ఎపిలో ఒంగోలు జిల్లాకు చెందిన పోలు లక్ష్మీ సాయి లోకేష్‌రెడ్డి అఖిల భారత స్థాయిలో 5వ ర్యాంకు సాధించారు. లోకేష్‌రెడ్డి తల్లిదండ్రులు ఇద్దరు ఉపాధ్యాయులు.
100లోపు ర్యాంకర్లకు ఐఐటి ఖరగ్‌పూర్ నజరానాలు
జెఇఇ అడ్వాన్స్‌డ్ 100లోపు ర్యాంకులు సాధించిన విద్యార్థులు చేరిన ఐఐటీలను నిపుణులు ఉత్తమమైనవిగా భావిస్తుంటారు. ఆ ర్యాంకర్లు ఏయే ఐఐటీల్లో చేరారు, ఎంత మంది చేరారు .. అని ప్రతి ఏటా చర్చ సాగుతుంది. దీనిపై ఐఐటీ ఖరగ్‌పూర్ ఈసారి దృష్టి సారించి నజరానాలు ప్రకటించింది. పండిత్ ఈశ్వర్ చంద్ర విద్యాసాగర్ పేరిట విద్యార్థులకు పూర్తి స్కాలర్‌షిప్ చెల్లింపు విధానాన్ని ప్రవేశపెడుతున్నట్లు వెల్లడించిన ఈ సంస్థ .. విద్యార్థులకు సంబంధించిన ఇతర ఖర్చులనూ భరించనుంది. తమ సంస్థల్లో ప్రవేశాలు పొందిన 100 లోపు ర్యాంకర్లు ఈ విద్యాసంవత్సరం నుంచి ట్యూషన్ ఫీజులతోపాటు హాస్టల్ రుసుం చెల్లించాల్సిన అవసరం లేదని నిర్ణయించింది.
పైగా .. పుస్తకాలు , ల్యాప్‌లాప్ కొనుగోలు ఖర్చులు, ప్రతి నెలా వ్యక్తిగత ఖర్చుల కోసం డబ్బులు ఇస్తామని కూడా సంస్థ సంచాలకుడు ఆచార్య వీరేంద్ర కుమార్ తివారీ ఇటీవల ప్రకటించారు. గత ఏడాది వంద లోపు ర్యాంకర్లు ఐఐటీ బాంబేలో 58 మంది, దిల్లీలో 29 మంది, మద్రాస్‌లో ఆరుగురు చేరారు. దేశంలోనే మొదటగా ప్రారంభమైన ఐఐటీ ఖరగ్‌పూర్‌లో మాత్రం గత కొన్నేళ్లుగా వంద లోపు ర్యాంకర్లు ఒక్కరూ చేరడం లేదు. దీంతో ఉత్తమ ర్యాంకర్లు తమ సంస్థల్లో ప్రవేశం పొందాలన్న ఉద్దేశంతోనే ఈ విధానాన్ని ప్రవేశపెట్టింది. అయితే .. ఆ విద్యార్థుల కుటుంబ వార్షిక ఆదాయం రూ .20 లక్షల లోపు నిబంధన విధించింది.
అడ్వాన్స్‌డ్‌లో టాప్ టెన్ ర్యాంకర్లు
మృదుల అగర్వాల్ ప్రథమ ర్యాంకు
ధనంజయ్ రెడ్డి రామన్ రెండవ ర్యాంకు
అనంత్ లునియా మూడవ ర్యాంకు
రామస్వామి సంతోష్‌రెడ్డి నాలుగవ ర్యాంకు
పోలు లక్ష్మీ సాయి లోకేష్‌రెడ్డి ఐదవ ర్యాంకు
సోని నామన్ నిర్మల్ ఆరవ ర్యాంకు
కార్తీక్ శ్రీకుమార్ నాయర్ ఏడవ ర్యాంకు
చైతన్య అగర్వాల్ ఎనిమిదవ ర్యాంకు
అర్నవ్ ఆదిత్య తొమ్మిదవ ర్యాంకు
మోదుళ్ల హృషికేష్‌రెడ్డి పదవ ర్యాంకు
బాంబే ఐఐటీలో సిఎస్‌ఇ చేస్తా : రామస్వామి సంతోష్‌రెడ్డి(ఆలిండియా 4వ ర్యాంకు), భూదాన్ పోచంపల్లి
బాంబే ఐఐటీలో కంప్యూటర్ సైన్స్ ఇంజనీరింగ్ చేస్తానని అఖిల భారత స్థాయలో 4వ ర్యాంకు సాధించిన రామస్వామి సంతోష్‌రెడ్డి తెలిపారు. ఇంజనీరింగ్ పూర్తయిన తర్వాత ఉద్యోగం చేస్తానని పేర్కొన్నారు. తన తల్లిదండ్రులు, అధ్యాపకుల సహకారంతో ఈ ర్యాంకు సాధించగలిగానని అన్నారు.
ఇంజనీరింగ్ తర్వాత సివిల్స్‌కు ప్రిపేరవుతా : పోలు లక్ష్మీ సాయి లోకేష్‌రెడ్డి, 5వ ర్యాంకు
ఐఐటీలో బాంబేలో సిఎస్‌ఇ పూర్తి చేసి, ఆ తర్వాత ఎంఎస్‌కుగానీ, సివిల్స్‌కు గానీ ప్రిపేరవుతా అని అఖిల భారత స్థాయలో 4వ ర్యాంకు సాధించిన పోలు లక్ష్మీ సాయి లోకేష్‌రెడ్డి పేర్కొన్నారు. తన తల్లిదండ్రులిద్దరూ ఉపాధ్యాయులు కావడం వల్ల ఈ ర్యాంకు పొందగలిగానని తెలిపారు.