పాన్ ఇండియా రేంజ్‌లో సత్తా చాటిన తెలుగు సినిమాలు

2024 సంవత్సరంలో పెద్ద స్టార్ల సినిమాలు మొదలుకొని చిన్న హీరోల సినిమాలు కొన్ని కూడా ప్రేక్షకులను ఎంతగానో అలరించి బ్లాక్‌బస్టర్ హిట్స్‌గా నిలిచాయి. టాలీవుడ్ స్టార్ హీరోల సినిమాలు కొన్ని పాన్ ఇండియా రేంజ్‌లో సత్తా చాటి రికార్డు స్థాయిలో కలెక్షన్లను సాధించాయి. 2024 సంవత్సరం దేశ, విదేశాల్లో తెలుగు చిత్ర పరిశ్రమ పేరు, ప్రఖ్యాతులను మరింత పెంచింది. పుష్ప 2, కల్కి, దేవర, హనుమాన్ చిత్రాలు పాన్ ఇండియా స్థాయిలో ఘన విజయం అందుకున్నాయి.
2024 సంవత్సరంలో టాలీవుడ్‌లో దాదాపు 250కి పైగా తెలుగు సినిమాలు విడుదలై ప్రేక్షకులను అలరించాయి. భారీ బడ్జెట్ పెద్ద సినిమాలు, మీడియం రేంజ్ మూవీస్, చిన్న చిత్రాలు ప్రేక్షకుల ముందుకు వచ్చాయి. అయితే ప్రేక్షకుల ఆదరాభిమానాలను చూరగొని విజయం సాధించిన చిత్రాలు కొన్ని మాత్రమే. గట్టిగా బాక్సాఫీస్ దగ్గర మంచి విజయం సాధించిన సినిమాలు 20 కూడా లేవు.

2024లో మంచి వసూళ్లు సాధించి ఘన విజయం సాధించిన తెలుగు సినిమాల గురించి తెలుసుకుందాము. ఐకాన్ స్టార్ అల్లు అర్జున్ హీరోగా సుకుమార్ దర్శకత్వంలో రూపొందించిన ’పుష్ప 2: ది రూల్’ చిత్రం బాక్సాఫీస్ ను షేక్ చేసింది. ఈ సినిమా రూ.1700 కోట్ల మార్కును అందుకొని భారతీయ చిత్ర పరిశ్రమ చరిత్రలోనే కొత్త రికార్డును సృష్టించడం విశేషం. రెబల్ స్టార్ ప్రభాస్, డైరెక్టర్ నాగ్ అశ్విన్ కాంబోలో తెరకెక్కిన ’కల్కి 2898 ఏడి’ చిత్రం బాక్సాఫీస్ దగ్గర ఘన విజయం సాధించింది. ప్రపంచవ్యాప్తంగా ఈ సినిమా దాదాపు రూ.1200 కోట్లు వసూలు చేసి రికార్డు సృష్టించింది. ఇక కొరటాల శివ డైరెక్షన్‌లో యంగ్ స్టార్ ఎన్టీఆర్ నటించిన ’దేవర’ పార్ట్- 1’ సినిమా మంచి వసూళ్లను సాధించి రూ.500 కోట్ల క్లబ్‌లో చేరింది. ప్రశాంత్ వర్మ దర్శకత్వంలో తేజ సజ్జ హీరోగా నటించిన సూపర్ హీరో సినిమా ’హను-మాన్’ సంక్రాంతికి రిలీజై ఎవరూ ఊహించని భారీ విజయాన్ని అందుకుంది. రూ.40 కోట్ల బడ్జెట్‌తో తీసిన ఈ సినిమా ప్రపంచ వ్యాప్తంగా రూ.300 కోట్లకు పైగా వసూలు చేసి సంచలనం సృష్టించింది.

ఇక అదే పొంగల్‌కు విడుదలైన సూపర్ స్టార్ మహేష్ బాబు ’గుంటూరు కారం’ మూవీ కూడా హిట్టయింది. ఈ సినిమా రూ.173 కోట్లకు పైగా వసూలు చేసి ప్రేక్షకులను అలరించింది. సిద్ధు జొన్నలగడ్డ హీరోగా నటించిన సినిమా ’టిల్లు స్క్వేర్’. ‘డీజే టిల్లు’ చిత్రానికి సీక్వెల్ అయిన ఈ రొమాంటిక్ క్రైమ్ కామెడీ ఎంటర్‌టైనర్ బాక్సాఫీస్ దగ్గర అనూహ్యంగా రూ.135 కోట్లు రాబట్టింది. అదే బ్యానర్‌లో మలయాళ హీరో దుల్కర్ సల్మాన్ టైటిల్ రోల్ ప్లే చేసిన ’లక్కీ భాస్కర్’ మూవీ కూడా ఘన విజయం సాధించి రూ.100 కోట్ల మార్క్ ను దాటింది. నేచురల్ స్టార్ నాని నటించిన ’సరిపోదా శనివారం’ సినిమా సైతం వంద కోట్ల క్లబ్ లో చేరింది. కిరణ్ అబ్బవరం హీరోగా తెరకెక్కిన ’క’ దీపావళికి చిన్న చిత్రంగా వచ్చి, పెద్ద విజయం సాధించింది. దాదాపు రూ.53 కోట్లు వసూలు చేసింది. కింగ్ అక్కినేని నాగార్జున నటించిన ’నా సామి రంగా’ మూవీ ఈ ఏడాది సంక్రాంతికి విడుదలైంది. ప్రపంచవ్యాప్తంగా రూ.50 కోట్ల గ్రాస్ కలెక్షన్స్ సాధించి ఘన విజయం సాధించింది.

ఇక శ్రీ సింహా, సత్య కలిసి నటించిన ’మత్తు వదలరా 2’.. విశ్వక్ సేన్ ’గామి’, సందీప్ కిషన్ ’ఊరు పేరు భైరవకోన’, శ్రీ విష్ణు ’ఓం భీమ్ బుష్’, విశ్వక్‌సేన్ ‘గ్యాంగ్స్ ఆఫ్ గోదావరి’ లాంటి సినిమాలు బాక్సాఫీస్ దగ్గర మంచి విజయం సాధించాయి. అలాగే కమిటీ కుర్రాళ్ళు, ఆయ్, అంబాజీ పేట మ్యారేజ్ బ్యాండ్, జీబ్రా లాంటి సినిమాలు కూడా హిట్ అయి ప్రేక్షకులను అలరించాయి.