తన ప్రతి సినిమాకి విభిన్నమైన కథలు ఎంచుకుంటూ ప్రేక్షకులను అలరిస్తున్న నేచురల్ స్టార్ నాని హీరోగా శ్రీకాంత్ ఓదెల దర్శకత్వంలో మాస్, యాక్షన్ ఎంటర్‌టైనర్ గా ‘దసరా’ చిత్రం రూపొందుతోంది. ప్రముఖ నిర్మాత సుధాకర్ చెరుకూరి తన శ్రీలక్ష్మీ వెంకటేశ్వర సినిమాస్ బ్యానర్‌పై ఈ సినిమాను భారీ బడ్జెట్‌తో ప్రతిష్టాత్మకంగా నిర్మిస్తున్నారు. కీర్తి సురేష్ కథానాయికగా నటిస్తున్న ఈ చిత్రం తెలుగు, తమిళం, కన్నడ, మలయాళం, హిందీ భాషల్లో విడుదల కానున్న నాని తొలి పాన్ ఇండియా చిత్రంగా రాబోతోంది.
ప్రస్తుతం ఈ చిత్రం షూటింగ్ రాష్ట్రంలోని పెద్దపల్లి జిల్లా గోదావరిఖనిలో జరుగుతోంది. చిత్రీకరణలో భాగంగా నాని, కీర్తి సురేష్‌లపై భారీ స్థాయిలో ఈ పాటని షూట్ చేస్తున్నారు. ఆర్‌ఆర్‌ఆర్ చిత్రంలో ‘నాటు నాటు’ పాటతో సంచలన స్టెప్స్ సృష్టించిన ప్రేమ్ రక్షిత్ మాస్టర్ ఈ పాటకు కోరియోగ్రఫీ అందిస్తున్నారు. దాదాపు 500 మంది డ్యాన్సర్లతో ఈ పాటని గ్రాండ్‌గా తెరకెక్కిస్తున్నారు. ప్రేక్షకులని అలరించడమే లక్ష్యంగా మండు వేసవిని సైతం లెక్క చేయకుండా ఈ పాట కోసం చిత్ర యూనిట్ కష్టపడి పనిచేస్త్తోంది. ఇటివలే విడుదలైన ‘దసరా’ గ్లింప్స్ ప్రేక్షకులని ఆకట్టుకుంది. నాని ఫుల్ లెంత్ మాస్, యాక్షన్- ప్యాక్డ్ పాత్రలతో కనిపిస్తున్న ఈ చిత్రం గోదావరిఖనిలోని సింగరేణి బొగ్గు గనుల దగ్గర ఉన్న ఒక గ్రామం నేపథ్యంలో జరుగుతుంది. ఈ చిత్రంలో సముద్రఖని, సాయి కుమార్, జరీనా వహాబ్ కీలక పాత్రలలో కనిపించనున్నారు.