కంచ గచ్చిబౌలి భూముల రభసకు ఫేక్ ఎఐ వీడియోలే
కారణం వాటిని వాస్తవ వీడియోలుగా నమ్మి సోషల్
మీడియాలో పోస్టు చేసిన రాష్ట్రానికి చెందిన కేంద్ర
మంత్రులు, సెలబ్రిటీలు సిఎం దృష్టికి తీసుకొచ్చిన
అధికారులు ఫేక్ ఎఐ వీడియోల సృష్టిపై విచారణకు
కోర్టును కోరాలని ముఖ్యమంత్రి సూచన
ఫేక్ వీడియోల కట్టడికి ప్రత్యేక చర్యలు చేపట్టాలి ఎఐ
ఫేక్ కంటెంట్‌ను పసిగట్టే టెక్నాలజీని సంపాదించాలి
ఫోరెన్సిక్, సాఫ్ట్‌వేర్, హార్డ్‌వేర్ టూల్స్ సమకూర్చుకోవాలి
అధికారులకు ముఖ్యమంత్రి రేవంత్‌రెడ్డి సూచన
మన తెలంగాణ/హైదరాబాద్ : సమాజాన్ని తప్పుదోవ పట్టించే ఏఐ ఫేక్ కంటెంట్ తయారీపై విచారణకు ఆదేశించాలని సిఎం రేవంత్‌రెడ్డి అధికారులను ఆదేశించారు. ఈ విషయంలో రాష్ట్ర ప్రభుత్వం తరఫున కోర్టుకు వి జ్ఞప్తి చేయాలని సిఎం అధికారులకు సూచించా రు. మరోసారి ఇలాంటి ఘ టనలు పునరావృ తం కాకుండా రాష్ట్రంలో సైబర్ క్రైమ్ విభాగాన్ని బలోపేతం చేయాలని రేవంత్‌రెడ్డి ఆదేశించారు. ఏఐ ఫేక్ కంటెంట్‌ను పసిగట్టే లా అవసరమైన అధునాతన ఫోరెన్సిక్ హార్డ్‌వేర్, సాఫ్ట్ వేర్ టూల్స్‌ను సమకూర్చుకోవాలని ఆయన సూచించారు. హైదరాబాద్ యూనివర్సిటీ భూ ములను లాక్కున్నట్లుగా సోషల్ మీడియా నెట్‌వర్క్ కృత్రిమంగా వివాదం సృ ష్టించటంపై సిఎం రేవంత్ ఆవేదన వ్యక్తం చేశారు. కంచ గచ్చిబౌలి భూములకు సంబంధించి కోర్టులో ఉన్న కేసులపై సిఎం సచివాలయంలో శనివా రం సమీక్ష నిర్వహించారు. ఈ సమావేశంలో ఉప ముఖ్యమంత్రి భట్టి విక్రమార్క, మంత్రులు సీతక్క, పొంగులేటి, సిఎస్ శాంతికుమారి, డిజిపి జితేందర్, పిసిసిఎఫ్ ఆర్.ఎం.డోబ్రియల్, టిజిఐఐసీ ఎండి విష్ణువర్ధన్ రెడ్డి, సంబంధిత శాఖల అధికారులు ఈ సమావేశంలో పాల్గొన్నారు.
గతంలో లేని వివాదాలు ఇప్పుడెందుకు…?
కంచె గచ్చిబౌలి లోని సర్వే నెంబర్ 25లో ఉన్న భూముల్లో గత 25 ఏళ్లుగా ఎన్నో ప్రాజెక్టులు నిర్మించారు. ఐఎస్‌బితో పాటు గచ్చిబౌలి స్టేడియం, ఐఐఐటి, ప్రైవేటు బిల్డింగ్ లు, రెసిడెన్షియల్ అపార్ట్‌మెంట్లు, హైదరాబాద్ యూనివర్సిటీ బిల్డింగ్ లను నిర్మించారు. వాటిని నిర్మించేటప్పుడు ఎలాంటి వివాదాలు, ఆందోళనలు జరగలేదని అధికారులు ముఖ్యమంత్రికి దృష్టికి తీసుకు వచ్చారు. అప్పుడు వన్యప్రాణుల సంరక్షణ, పర్యావరణ విధ్వంసం లాంటి వివాదాలు కూడా లేవన్నారు. అలాంట ప్పుడు అదే సర్వే నెంబర్‌లోని 400 ఎకరాల ప్రభుత్వ భూమిని అభివృద్ధి చేసేటప్పుడు ఎందుకు వివాదాస్పదమైందని ఈ సమావేశంలో సిఎం రేవంత్‌రెడ్డి అధికారులతో చర్చించారు. ఇది అర్టిఫిషియల్ ఇంటెలిజెన్స్ ద్వారా ఉన్నవి లేనట్లు, లేనివి ఉన్నట్లుగా వీడియోలు, ఫొటోలు సృష్టించి కొందరు సోషల్ మీడియాలో విస్తృతంగా ప్రచారం చేయటంతో ఈ వివాదం జాతీయ స్థాయిలో చర్చకు దారి తీసిందని అధికారులు ముఖ్యమంత్రికి వివరించారు.
ప్రముఖులు సైతం ఫేక్ ఫొటోలు, వీడియోలను సోషల్‌మీడియాలో…
వాస్తవాలు వెల్లడించే లోగా అబద్ధాలు సోషల్ మీడియాలో జాతీయ స్థాయిలో వైరల్ కావటం ప్రభుత్వానికి సవాలుగా మారిందని అధికారులు ముఖ్యమంత్రితో పేర్కొన్నారు. ఏకంగా నెమళ్లు ఏడ్చినట్లుగా ఆడియోలు, బుల్‌డోజర్లకు జింకలు గాయపడి పరుగులు తీస్తున్నట్లుగా ఫేక్ ఫొటోలు, వీడియోలు తయారు చేశారని పోలీసు అధికారులు సిఎంకు వివరించారు. వివిధ రంగాల్లో పేరొందిన ప్రముఖులు కూడా వాటిని నిజమని నమ్మి సోషల్ మీడియాలో పోస్టులు, వీడియోలు పెట్టడంతో అబద్ధాలతో ఆజ్యం పోసినట్లయిందని అధికారులు తెలిపారు. ఏకంగా కేంద్ర మంత్రి కిషన్ రెడ్డి, మాజీ మంత్రి జగదీష్ రెడ్డి, సోషల్ మీడియా ఇన్ ఫ్ల్యూయెన్సర్ ధ్రువ్‌రాఠీ, సినీ ప్రముఖులు జాన్ అబ్రహం, దియా మీర్జా, రవీనాటాండన్ లాంటి వాళ్లందరూ ఏఐ ద్వారా సృష్టించిన ఫేక్ ఫొటోలు, వీడియోల పోస్టు చేసి సమాజానికి తప్పుడు సందేశం చేరవేశారని అధికారులు తెలిపారు.
క్షమాపణ చెప్పిన జర్నలిస్ట్ సుమిత్ జా
ఈ భూములపై మొట్ట మొదటగా ఫేక్ వీడియో పోస్ట్ చేసిన జర్నలిస్ట్ సుమిత్ జా కొద్ది సేపట్లోనే తన పోస్టును తొలగించి క్షమాపణలు చెప్పారని, కానీ, మిగతా ప్రముఖులెవరూ ఈ నిజాన్ని గుర్తించకుండా అదే ఫేక్ వీడియోతో ప్రచారం చేశారని అధికారులు సిఎంతో తెలిపారు. కంచ గచ్చిబౌలిలో ఏఐ సృష్టించిన వివాదం ప్రజాస్వామ్య వ్యవస్థలకే పెను సవాల్‌గా విసిరిందని ఈ సమావేశంలో చర్చ జరిగింది. ఇదే తీరుగా ఇండో పాక్, ఇండో చైనా సరిహద్దుల్లాంటి వివాదాలు, ఘర్షణలకు దారితీసే సున్నితమైన అంశాల్లో ఏఐతో ఫేక్ కంటెంట్ సృష్టిస్తే భవిష్యత్‌ల్లో యుద్ధాలు జరిగే ప్రమాదముంటుం దని అధికారులు తెలిపారు. అర్టిఫిషియల్ ఇంటెలిజెన్స్ ద్వారా తయారు చేసే ఫేక్ వీడియోలు, ఫొటోలు కరోనా వైరస్ ను మించిన మహమ్మారిలాంటివని ఈ సమావేశం ఆందోళన వ్యక్తం చేసింది.