శభాష్ తెలంగాణ బిడ్డ! అంటూ ఉమెన్ క్రికెటర్ గొంగడి త్రిషపై ముఖ్యమంత్రి రేవంత్ రెడ్డి ప్రశంసలు కురిపించారు. మలేషియాలోని కౌలాలంపూర్ వేదికగా జరిగిన ఐసిసి అండర్-19 మహిళల టి 20 వరల్డ్ కప్‌లో స్కాట్లాండ్ జట్టుపై టీమిండియా ఘన విజయం సాధించింది. సూపర్ సిక్స్‌లో భాగంగా రెండో మ్యాచ్‌లోనూ సత్తా చూపించింది. మంగళవారం జరిగిన మ్యాచ్‌లో రాష్ట్రంలోని భద్రాచలం ప్రాంతానికి చెందిన క్రికెటర్ గొంగడి త్రిష మొదటి సెంచరీతో ఆల్‌రౌండ్ ప్రదర్శన చేసి జట్టు విజయంలో కీలక పాత్ర పోషించింది. దీనిపై సిఎం రేవంత్ రెడ్డి ట్విట్టర్ వేదికగా స్పందించి రేవంత్ రెడ్డి గొంగడి త్రిషను అభినందించారు. మహిళల అండర్19 టీ20 వరల్ కప్ చరిత్రలోనే మొట్టమొదటి సెంచరీ సాధించిన క్రీడాకారిణిగా నిలిచి, ప్రపంచ వేదికపై మన దేశ సత్తా చాటిన
తెలంగాణ బిడ్డ గొంగడి త్రిషకు సిఎం రేవంత్ హృదయపూర్వక అభినందనలను తెలియజేశారు. అలాగే భద్రాద్రి- కొత్తగూడెం జిల్లా, భద్రాచలంకు చెందిన త్రిష భారత జట్టు విజయంలో కీలకపాత్ర పోషించడం మనందరికీ గర్వకారణమని ముఖ్యమంత్రి పేర్కొన్నారు. మున్ముందు కూడా మరింతంగా రాణించి, తెలంగాణ క్రీడాకారులకు ఆదర్శప్రాయంగా నిలవాలని సిఎం ఆశించారు. అంతేగాక త్రిష లాంటి మరింత మంది మెరికల్లాంటి క్రీడాకారులను తయారు చేసేందుకు మన ప్రజా ప్రభుత్వం కృషి చేస్తోందని సిఎం తెలిపారు. అద్భుత నైపుణ్యం ప్రదర్శించిన మన క్రీడాకారులకు తగిన గుర్తింపునిస్తూనే మరింత మంది తెలంగాణ బిడ్డలు ప్రపంచస్థాయిలో రాణించాలన్న లక్ష్యంతో యంగ్ ఇండియా స్పోర్ట్ వర్సిటీ ఏర్పాటుకు సంకల్పించామని ముఖ్యమంత్రి పేర్కొన్నారు. క్రీడల ప్రోత్సాహానికి మన ప్రజా ప్రభుత్వం కల్పిస్తున్న అవకాశాలను సద్వినియోగం చేసుకొని, త్రిషలాంటి క్రీడాకారిణిల స్ఫూర్తితో, మన క్రీడాకారులు అంతర్జాతీయ స్థాయిలో అద్భుతంగా రాణించాలని రేవంత్ రెడ్డి పిలుపునిచ్చారు.