కర్నాటకలో ఐదు గంటలే కరెంట్ ఇస్తున్నామని బాహాటంగా ఒప్పుకున్న ఆ రాష్ట్ర మంత్రి రామలింగ రెడ్డి
కాంగ్రెస్‌కు ఓటేస్తే మూడు గంటలే కరెంట్ వస్తుందని చెప్పడంలో సందేహం లేదు
మన తెలంగాణ/హైదరాబాద్: మోసపూరిత హామీలకు కేరాఫ్ అడ్రస్ కాంగ్రెస్ అని బిఆర్ఎస్ ఎంఎల్‌సి కల్వకుంట్ల కవిత ధ్వజమెత్తారు. కాంగ్రెస్ వస్తే కర్నాటక కరెంట్ కష్టాలు తెలంగాణలోనూ పునరావృతం అవుతాయనడానికి కర్నాటక రాష్ట్ర మంత్రి రామలింగ రెడ్డి చేసిన వ్యాఖ్యలే రుజువని స్పష్టం చేశారు. కర్నాటకలో కేవలం ఐదు గంటల పాటు మాత్రమే విద్యుత్తును సరఫరా చేస్తున్నామని ఆ రాష్ట్ర మంత్రి అంగీకరిస్తూ చేసిన వ్యాఖ్య లపై కల్వకుంట్ల కవిత ఎక్స్ (ట్విట్టర్) ద్వారా స్పందించారు. కాంగ్రెస్ పార్టీ రైతు వ్యతిరేక పార్టీ అని మండిపడ్డారు. 65 ఏళ్ల పాటు పరిపాలించిన కాంగ్రెస్ పార్టీ రైతుల ఉసురు తీసుకుందని, ఇప్పుడు మరోసారి మభ్యపెట్టడానికి బయలుదేరిందని పేర్కొన్నారు.
‘కర్నాటకలో 5 గంటల కరెంట్ ఇస్తున్నారు. తెలంగాణలో మూడు గంటల పార్టీ కరెంటు చాలని పిసిసి అధ్యక్షుడు అన్నారు. దీన్నిబట్టి చూస్తే కాంగ్రెస్ పార్టీకి ఓటేస్తే తెలంగాణలో మూడు గంటల కరెంటే వస్తుందని చెప్పడంలో ఎటువంటి సందేహమే లేదు. తెలంగాణలో సిఎం కెసిఆర్ 24 గంటల పాటు రైతంగానికి ఉచిత విద్యుత్తును అందిస్తూ అండగా నిలుస్తున్నారు. రైతులపై ఉన్న ప్రేమ, చిత్తశుద్ధితో సిఎం కెసిఆర్ ఎన్నో కార్యక్రమాలు చేపడుతున్నారు’ అని వివరించారు. కాంగ్రెస్ పార్టీకి మాత్రం రైతుల పట్ల ఎటువంటి మమకారం, చిత్తశుద్ధి లేదని స్పష్టం చేశారు.
కర్నాటక మంత్రే ఒప్పుకుండు. మేం 5గంటలే ఇస్తున్నాం… కరెంటు కొన్నాక 7గంట‌లు ఇస్తాం అని.
త‌ప్పుడు హామీలకు కేరాఫ్ అడ్రస్ కాంగ్రెస్.
కానీ, తెలంగాణలో… కేసీఆర్ గారు 24గంటల కరెంటు ఇస్తుండు. ఇది కేసీఆర్ కు రైతుల మీద ఉన్న ప్రేమ, చిత్తశుద్ధి.
జై తెలంగాణ! pic.twitter.com/Gue53jrRW7
— Kavitha Kalvakuntla (@RaoKavitha) November 3, 2023