బెంగాల్ స్టార్ క్యాంపెయినర్ల జాబితాలో ఒక్కరికీ దక్కని చోటు
లిస్టులో రాహుల్ టీమ్‌కు ప్రాధాన్యం
న్యూఢిల్లీ : పశ్చిమ బెంగాల్ ఎన్నికలకు కాంగ్రెస్ పార్టీ స్టార్ క్యాంపెయినర్స్ జాబితాను శుక్రవారం విడుదల చేసింది. ఇందులో రాహుల్ టీమ్‌కు పెద్ద పీట వేయడమే కాకుండా, కొద్ది రోజులుగా అసమ్మతిగళం వినిపిస్తున్న 23 మంది సీనియర్లను దూరం పెట్టినట్టు కనిపిస్తోంది. కాంగ్రెస్ పార్టీ సంస్థాగత వ్యవహారాల బాధ్యుడు కెసి వేణుగోపాల్ స్టార్ క్యాంపెయినర్ల జాబితాను విడుదల చేశారు. కాంగ్రెస్ అధ్యక్షురాలు సోనియా గాంధీ, మాజీ ప్రధాని మన్మోహన్ సింగ్, ఎంపీ రాహుల్, ప్రధాన కార్యదర్శి ప్రియాంక గాంధీ, సచిన్ పైలట్, నవజ్యోత్ సింగ్ సిద్దూ, అభిజిత్ ముఖర్జీ, సీఎం గెహ్లోత్, పంజాబ్ సీఎం కెప్టెన్ అమరీందర్ సింగ్, అధీర్ రంజన్ చౌదరి, బీకే హరిప్రసాద్, సల్మాన్ ఖుర్షీద్, సూర్జేవాలా, జితిన్ ప్రసాదతో పాటు 30 మందికి ఇందులో చోటు కల్పించించారు.
అయితే కొంతకాలంగా అధిష్ఠానంతో విభేదిస్తున్న జి-23 నేతల గ్రూపును మాత్రం దూరం పెట్టారు. ఆ జాబితాలోని ఒక్క సీనియర్‌కు కూడా అవకాశం కల్పించలేదు. ఇదే విషయాన్ని కశ్మీర్ కేంద్రంగా సీనియర్లు లేవనెత్తారు. ఐదు రాష్ట్రాల ఎన్నికలు సమీపిస్తున్నాయని, అధిష్ఠానం తమను సంప్రదించడం లేదని పేర్కొన్నారు. అన్నట్టుగానే అధిష్ఠానం వారిని దూరం పెట్టింది.