సిటిబ్యూరోః సైబర్ నేరస్థులు పన్నిన కుట్రకు అమాయకులు బలవుతున్నారు. తమకు ఎంతోకొంత డబ్బులు వస్తాయని ఆశపడి బ్యాంక్ ఖాతాల నంబర్లు ఇవ్వడంతో జైలు పాలవుతున్నారు. సైబర్ నేరస్థులు తాము పట్టుబడకుండా ఉండేందుకు ఇలాంటి ప్లాన్లు వేస్తున్నారు. తామ బ్యాంక్ ఖాతాల నంబర్లు ఇస్తే డబ్బులు వస్తాయనుకున్న అమాయకులు బలవుతున్నారు. గతంలో సైబర్ నేరస్థులు పలువురు అమాయకులకు మాయమాటలు చెప్పి డబ్బులు తమ బ్యాంక్ ఖాతాల్లోనే డిపాజిట్ చేయించుకునేవారు. కానీ రోజు రోజుకు సైబర్ నేరాలు పెరగడంతో పోలీసులు సైబర్ నేరస్థుల పట్ట కఠినంగా వ్యవహరిస్తున్నారు. బాధితుల బ్యాంక్ ఖాతాల నుంచి తమ బ్యాంక్ ఖాతాలకు డబ్బులు ట్రాన్స్‌ఫర్ చేయించుకుంటే సులభంగా దొరుకుతున్నామని సైబర్ నేరస్థులు ప్లాన్ మార్చారు. తమకు తెలిసిన వారి నుంచి బ్యాంక్ ఖాతాల నంబర్లు తీసుకుని వాటిలో డబ్బులు డిపాజిట్ చేయిస్తున్నారు.
వారితోనే బ్యాంక్ నుంచి డబ్బులు విత్‌డ్రా చేయించుకుని డబ్బులు తీసుకుంటున్నారు. డబ్బులు తీసుకుని వచ్చినందుకు వారికి కమీషన్ ఇస్తున్నారు, ఇలా చేసి సైబర్ నేరస్థులు తమ చేతికి మట్టిఅంటకుండా చూసుకుంటున్నారు. ఇలా తెలిసిన వారి బ్యాంక్ ఖాతాల నంబర్లు ఇస్తే వారి వివరాలు తెలుస్తున్నాయని సైబర్ నేరస్థులు ప్లాన్‌ను మార్చారు. సోషల్ మీడియా, తదితర వాటిల్లో గుర్తుతెలియని వారితో ఛాటింగ్ చేస్తున్నారు. కొద్ది రోజులు స్నేహం చేసినట్లు నటిస్తున్నారు. తర్వాత వారి బ్యాంక్ ఖాతా వివరాలు సేకరించి దానిలో డబ్బులు డిపాజిట్ చేయిస్తున్నారు. మహారాష్ట్రకు చెందిన యువతికి ఇన్‌స్టాగ్రాంలో రాజస్థాన్‌కు చెందిన వ్యక్తితో పరిచయం ఏర్పడింద. ఇద్దరు కొద్ది రోజులు స్నేహం చేశారు, తరచూగా ఛాటింగ్ చేసుకునేవారు. ఒక రోజు యువతి బ్యాంక్ ఖాతా వివరాలు ఇస్తే ఇంటి అద్దె రూ.3,000 ఇస్తానని చెప్పాడు. ఉచితంగానే డబ్బులు వస్తున్నాయని తన బ్యాంక్ ఖాతా వివరాలు పంపించింది.
నిందితుడు వాటిని సైనిక్‌పురికి చెందిన బాధితురాలికి ఇచ్చి ఆమెను యువతి బ్యాంక్ ఖాతాలో డబ్బులు డిపాజిట్ చేయాలని చెప్పాడు. తక్కువ డబ్బులకు ఎక్కువ లాభం వస్తుందని సదరు మహిళ లక్ష రూపాయలు డిపాజిట్ చేసింది. తర్వాత నుంచి నిందితుడు ఆమెకు అందుబాటులో లేకుండా పోయాడు. తాను మోసపోయానని గ్రహించిన మహిళ రాచకొండ సైబర్ క్రైం పోలీసులకు ఫిర్యాదు చేసింది. కేసు నమోదు చేసుకున్న పోలీసులు దర్యాప్తు చేశారు. డబ్బులు ట్రాన్స్‌ఫర్ చేసిన బ్యాంక్ ఖాతా నంబర్ ఆధారంగా మహారాష్ట్రకు చెందిన యువతిని పోలీసులు అరెస్టు చేశారు. ఇలా గుర్తుతెలియని వ్యక్తికి బ్యాంక్ ఖాతా నంబర్ ఇవ్వడంతో యువతి కటకటాలపాలైంది.
గతంలో వదిలేసేవారు….
గతంలో పోలీసులు సైబర్ నేరస్థులకు బ్యాంక్ ఖాతాలను ఇచ్చిన వారిని వదిలేసేవారు. వారిని కూడా అమాయకులుగా భావించేవారు, కానీ రోజు రోజుకు సైబర్ నేరాలు పెరగడంతో వీరిపై దృష్టిసారించారు. చాలా కేసుల్లో బ్యాంక్ ఖాతాలు ఇచ్చే వారు కమీషన్లు తీసుకుని ఇస్తున్నారని తెలియడంతో అదుపులోకి తీసుకుని జైలుకు పంపిస్తున్నారు. సైబర్ నేరాలు చేసే వారికి బ్యాంక్ ఖతాల నంబర్లు ఇచ్చే వారు పరోక్షంగా సహకరిస్తున్నారని పోలీసులు భావిస్తున్నారు. బ్యాంక్ ఖాతాల నంబర్లు ఇవ్వడం, డిపాజిట్ అయిన డబ్బులను సైబర్ నేరస్థులకు ట్రాన్స్‌ఫర్ చేసిన నేరమేనని పోలీసులు స్పష్టం చేస్తున్నారు.
సోషల్ మీడియాలో…
సైబర్ నేరస్థులు కొత్త ప్లాన్‌ను వేశారు, గతంలో తమకు తెలిసిన వారి బ్యాంక్ వివరాలు తీసుకునేవారు. దీంతో వారి ఉనికి పోలీసులకు తెలుస్తోందని పరిచయం లేని వారి నుంచి తీసుకుంటున్నారు. దీనికి సోషల్ మీడియాను ఆశ్రయిస్తున్నారు, దీనిలో తాము పెట్టిన పోస్టుకు స్పందించిన వారిని నెమ్మదిగా బుట్టలో వేసుకుని వారి బ్యాంక్ వివరాలు తెలుసుకుంటున్నారు. వారికి అసలు విషయం తెలియకుండా, అవసరాలను ఆసరాగా చేసుకుని డబ్బులు ఎరగా వేసి దోచుకుంటున్నారు. దీంతో బ్యాంక్ ఖాతాల నంబర్లు ఇచ్చిన వారు అరెస్టై జైలు పాలవుతున్నారు.