‘కోర్ట్’ టీంకు మెగాస్టార్ అభినందనలు

నేచురల్ స్టార్ నాని వాల్ పోస్టర్ సినిమా సమర్పించిన తాజా బ్లాక్‌బస్టర్ మూవీ ‘కోర్ట్ — స్టేట్ వర్సెస్ ఎ నోబడీ’. ప్రియదర్శి, శివాజీ, హర్ష్ రోషన్, శ్రీదేవి ప్రధాన పాత్రలో నటించిన ఈ చిత్రానికి రామ్ జగదీష్ దర్శకత్వం వహించారు. ప్రశాంతి తిపిర్నేని నిర్మించారు. దీప్తి గంటా సహ నిర్మాతగా వ్యవహరించారు. మార్చి 14న ప్రపంచ వ్యాప్తంగా థియేటర్లలో విడుదలైన ఈ చిత్రం అద్భుతమైన స్పందన, హౌస్ ఫుల్ కలెక్షన్స్‌తో యునానిమస్ బ్లాక్‌బస్టర్ హిట్‌గా నిలిచింది. తాజాగా కోర్ట్ చిత్రబృందాన్ని మెగాస్టార్ చిరంజీవి అభినందించారు. నటీనటులు, దర్శకుడిని ఇంటికి పిలిచి సత్కరించారు. ఈ సందర్భంగా మెగాస్టార్ చిరంజీవి మాట్లాడుతూ “కోర్ట్ అందరూ గర్వపడే సినిమా. సినిమా ఎక్కడ కూడా బోర్ కొట్టలేదు. నటీనటులందరూ అద్భుతంగా నటించారు. ప్రతి పాత్ర సహజంగా ఉంది. దీన్ని కేవలం ఒక ఎంటర్‌టైన్‌మెంట్ ఫిల్మ్‌లా కాకుండా ఒక ఎడ్యుకేటివ్ కోర్టు డ్రామాగా భావిస్తున్నాను”అని అన్నారు. ఇక కోర్ట్ సినిమా పది రోజుల్లో ప్రపంచవ్యాప్తంగా 50 కోట్లు గ్రాస్ కలెక్ట్ చేసింది. అలాగే యూఎస్‌లో వన్ మిలియన్ క్రాస్ చేసి సత్తా చాటింది.