అఖండ, వీరసింహారెడ్డి, భగవంత్ కేసరి వంటి వరుస ఘన విజయాల తరువాత గాడ్ ఆఫ్ మాసెస్ నందమూరి బాలకృష్ణ మరో వైవిద్యభరితమైన చిత్రం ’డాకు మహారాజ్’తో అలరించబోతున్నారు. బ్లాక్ బస్టర్ దర్శకుడు బాబీ కొల్లి ఈ చిత్రానికి దర్శకత్వం వహించారు. శ్రీకర స్టూడియోస్ సమర్పణలో సితార ఎంటర్‌టైన్‌మెంట్స్, ఫార్చ్యూన్ ఫోర్ సినిమాస్ పతాకాలపై సూర్యదేవర నాగవంశీ, సాయి సౌజన్య భారీ బడ్జెట్ తో ’డాకు మహారాజ్’ను నిర్మించారు. తమన్ సంగీతం అందించిన ఈ చిత్రంలో ప్రగ్యా జైస్వాల్, శ్రద్ధా శ్రీనాథ్ కథానాయికలు. బాబీ డియోల్, ఊర్వశి రౌతేలా, చాందిని చౌదరి కీలక పాత్రలు పోషించారు. సంక్రాంతి కానుకగా ఆదివారం ’డాకు మహారాజ్’ చిత్రం ప్రపంచ వ్యాప్తంగా భారీస్థాయిలో విడుదల కానుంది.
ఈ నేపథ్యంలో చిత్ర బృందం శుక్రవారం రాత్రి హైదరాబాద్ లో ప్రీ రిలీజ్ వేడుకను నిర్వహించింది. ఈ సందర్భంగా ’డాకు మహారాజ్’ రిలీజ్ ట్రైలర్‌ను విడుదల చేశారు. ఇటీవల విడుదలైన థియేట్రికల్ ట్రైలర్ కు ప్రేక్షకుల నుంచి విశేష స్పందన లభించింది. ముఖ్యంగా విజువల్స్ అద్భుతంగా ఉన్నాయనే పేరు వచ్చింది. ఇక ఇప్పుడు రిలీజ్ ట్రైలర్ అంతకుమించి అనేలా ఉంది. ‘వాడి ఒంటి మీద పదహారు కత్తి పోట్లు, ఒక బుల్లెట్ గాయం.. అయినా కిందపడకుండా అంత మందిని నరకాడం అతను మనిషి కాదు, వైల్డ్ యానిమల్‘ అనే డైలాగ్ తో బాలకృష్ణ పాత్ర ఎంత శక్తివంతంగా ఉండబోతుందో తెలిపారు. అదిరిపోయే యాక్షన్ సన్నివేశాలు, కట్టిపడేసే భావోద్వేగాలతో అన్ని వర్గాల ప్రేక్షకులు మెచ్చేలా ఈ చిత్రాన్ని రూపొందించారని రిలీజ్ ట్రైలర్‌తో మరోసారి స్పష్టమైంది. ప్రీ రిలీజ్ వేడుకలో గాడ్ ఆఫ్ మాసెస్ నందమూరి బాలకృష్ణ మాట్లాడుతూ “అఖండ, వీరసింహారెడ్డి, భగవంత్ కేసరి సినిమాల్లో నేను పోషించిన పాత్రలు ప్రేక్షకులను అలరించాయి.
అలాగే అప్పట్లో ’ఆదిత్య 369’లో నేను పోషించిన కృష్ణదేవరాయ పాత్ర చిరస్థాయిగా నిలిచిపోయింది. అలాంటి పాత్ర చేస్తే బాగుంటుందనే ఆలోచన నుంచి ఈ ’డాకు మహారాజ్’ కథ పుట్టింది. రిలీజ్ ట్రైలర్ కి అద్భుతమైన స్పందన లభిస్తోంది. బాలకృష్ణ నుంచి అభిమానులు, ప్రేక్షకులు ఏం కోరుకుంటారో అందుకు తగ్గట్టుగా ఈ ట్రైలర్ ఉంది. దర్శకుడు బాబీ ఆలోచనకు తగ్గట్టుగా, కెమెరామెన్ విజయ్ కన్నన్ తన అద్భుత పనితీరుతో సన్నివేశాలకు ప్రాణం పోశారు. తమన్ సంగీతం గురించి ప్రత్యేకంగా చెప్పక్కర్లేదు. అఖండ తరహాలో మరోసారి అద్భుతమైన సంగీతం అందించాడు. ఈ సంక్రాంతి కానుకగా ఆదివారం విడుదలవుతున్న ’డాకు మహారాజ్’ కూడా ఘన విజయం సాధిస్తుంది”అని అన్నారు.
దర్శకుడు బాబీ కొల్లి మాట్లాడుతూ “బాలకృష్ణ ఎంత ఎదిగినా ఒదిగి ఉంటారు. తనని అంతగా ప్రేమిస్తున్న అభిమానుల కోసం నేను ఎంత కష్టమైనా పడతాను అని బాలయ్య బాబు చెప్పేవారు. అభిమానుల కోసం కొత్తగా ఏదైనా చేయాలని తపిస్తూ ఉంటారు”అని తెలిపారు. నిర్మాత సూర్యదేవర నాగవంశీ మాట్లాడుతూ “ఐదేళ్ల క్రితం వైకుంఠ ఏకాదశి రోజున ’అల వైకుంఠపురములో’ ప్రీ రిలీజ్ ఈవెంట్ చేశాము. ఆ సినిమా జనవరి 12న ఆదివారం విడుదలైంది. ఇప్పుడు ’డాకు మహారాజ్’ విషయంలో కూడా అదే జరిగింది. ’అల వైకుంఠపురములో’లాగే ఈ సినిమా కూడా ఘన విజయం సాధిస్తుందని కోరుకుంటున్నాను”అని తెలియజేశారు. ఈ కార్యక్రమంలో కథానాయికలు ప్రగ్యా జైస్వాల్, శ్రద్ధా శ్రీనాథ్, నటి ఊర్వశి రౌతేలా, సంగీత దర్శకుడు తమన్, వైజాగ్ ఎంపీ భరత్, నందమూరి తేజస్విని, ఛాయాగ్రాహకుడు విజయ్ కన్నన్, రచయిత మోహన్ కృష్ణ తదితరులు పాల్గొన్నారు.