స్పేస్ ఎక్స్, టెస్లా సిఇఒ, ప్రపంచ కుబేరుడు ఎలాన్ మస్క్ తన పేరును మార్చుకున్నారు. తన సొంత సోషల్ మీడియా వేదిక ‘ఎక్స్’ (ట్విట్టర్)లో తన పేరును మస్క్‌కు బదులుగా ‘కేకియస్ మాక్సిమస్’గా మార్చుకున్నారు. ఇది చూసిన నెటిజన్లు ఆ పేరుకు అర్థం ఏమిటా అని వెతికే పనిలో పడ్డారు. మస్క్ అదే విధంగా తన ప్రొఫైల్ పిక్‌నూ మార్చివేశారు. ‘పెపే ది ఫ్రాగ్’ మీమ్‌ను ఆయన తన ప్రొఫైల్ పిక్‌గా పెట్టుకున్నారు. అయితే, కేకియస్ అనేది ఒక క్రిప్టో కరెన్సీ టోకెన్. పలు బ్లాక్ చెయిన్ వేదికల్లో అది అందుబాటులో ఉంది. అది ఇటీవల క్రిప్టో కరెన్సీ మార్కెట్‌లో పెట్టుబడిదారులు, ఔత్సాహికుల దృష్టిని ఆకర్షించింది.
డిసెంబర్ 27 నాటికి కేకియస్ దాదాపు 0.005667 డాలర్ల వద్ద అమ్ముడవుతుండగా, 24 గంటల్లోనే 497.56 శాతం పెరుగుదలను నమోదు చేసింది. ఇది ఇలా ఉండగా, ఎలాన్ మస్క్ ఇటీవలే అరుదైన ఒక రికార్డు సృష్టించిన సంగతి విదితమే. ఆయన వ్యక్తిగత సంపద ఏకంగా 400 బిలియన్ డాలర్ల మార్కును డాటింది. ఇప్పటి వరకు ఈ మైలురాయిని ఎవరూ అధిగమించలేదు. దీనితో ఈ రికార్డును సొంతంచేసుకున్న తొలి వ్యక్తిగా మస్క్ నిలిచారు. బ్లూంబెర్గ్ బిలియనీర్స్ ఇండెక్స్ తాజా వివరాల ప్రకారం, మస్క్ సంపద విలువ 447 బిలియన్ డాలర్లకు చేరింది.