యూపిలో డ్యూటీలోనే  రైలు ఇంజన్ డ్రైవర్ గుండెపోటుతో మృతి 

అమేథి (యూపి): ప్రతాప్‌గఢ్-కాన్పూర్ ఇంటర్‌సిటీ ఎక్స్‌ప్రెస్ ఇంజిన్ డ్రైవర్ రైలులో అకస్మాత్తుగా అస్వస్థతకు గురై శుక్రవారం మరణించినట్లు రైల్వే అధికారి తెలిపారు. పరశురాంపూర్ చిల్బిలాకు చెందిన హరిశ్చంద్ర శర్మ (46) కాన్పూర్ వైపు రైలు నడుపుతుండగా కాసింపూర్ హాల్ట్ సమీపంలో అకస్మాత్తుగా ఆరోగ్య సమస్య ఏర్పడిందని గౌరీగంజ్ రైల్వే స్టేషన్ సూపరింటెండెంట్ ప్రవీణ్ సింగ్ తెలిపారు.
అందులో ఉన్న అసిస్టెంట్ పైలట్ రైలును ఆపి అంబులెన్స్‌కు ఫోన్ చేశాడు. శర్మను సమీపంలోని ఆరోగ్య కేంద్రానికి తరలించారు, అక్కడ వైద్యులు అతను చనిపోయినట్లు ప్రకటించారని సింగ్ చెప్పారు. శర్మకు గుండెపోటు వచ్చినట్లు వైద్యులు అనుమానిస్తున్నారని ఆయన తెలిపారు. ప్రతాప్‌గఢ్‌ నుంచి మరో లోకో పైలట్‌ రావడంతో రైలు అక్కడి నుంచి కదిలిందని సింగ్‌ తెలిపారు. కాగా మృతదేహాన్ని పోస్టుమార్టం నిమిత్తం పంపినట్లు ఫుర్సత్‌గంజ్ పోలీస్ స్టేషన్ ఇన్‌ఛార్జ్ మనోజ్ కుమార్ సోంకర్ తెలిపారు.