సిర్పూర్ కాగజ్‌నగర్ మాజీ ఎమ్మెల్యే కోనేరు కోనప్ప కాంగ్రెస్ పార్టీకి రాజీనామా చేస్తున్నట్టు ప్రకటించారు. ఇకపై ఏ పార్టీలో చేరకుండా స్వతంత్రంగా ఉంటానని ఆయన తెలిపారు. గతంలో బిఆర్‌ఎస్ నేత అర్‌ఎస్ ప్రవీణ్ కుమార్ చేసిన వ్యాఖ్యల వల్లే తాను బిఆర్‌ఎస్ పార్టీని వీడినట్లు ఆయన తెలిపారు. బిఆర్‌ఎస్ పార్టీని, కెసిఆర్‌ను తాను ఎప్పుడూ విమర్శించలేదని ఆయన స్పష్టం చేశారు. తాజాగా జరుగుతున్న గ్రాడ్యుయేట్ ఎన్నికల్లో బిఎస్పీ అభ్యర్థికి మద్దతు ప్రకటిస్తున్నట్లుగా ఆయన తెలిపారు. గతేడాది మార్చి 6వ తేదీన కోనేరు కోనప్ప సిఎం రేవంత్ రెడ్డి సమక్షంలో కాంగ్రెస్ తీర్థం పుచ్చుకున్నారు. అంతకుముందు కోనప్ప 2014 ఎన్నికల్లో బిఎస్సీ
నుంచి పోటీ చేసి నాటి బిఆర్‌ఎస్ అభ్యర్థి కావేటి సమ్మయ్యపై విజయం సాధించారు. ఎన్నికల తర్వాత అధికార బిఆర్‌ఎస్ పార్టీలో చేరారు. అనంతరం 2018లో బిఆర్‌ఎస్ నుంచి పోటీ చేసి మరోసారి ఎమ్మెల్యేగా గెలిచారు. 2023లో జరిగిన ఎన్నికల్లో బిజెపి అభ్యర్థి పాల్వాయి హరీశ్ చేతిలో ఓటమిపాలయ్యారు. ఆ ఎన్నికల్లో తనపై బిఎస్సీ అభ్యర్థిగా పోటీ చేసిన ఆర్‌ఎస్ ప్రవీణ్ కుమార్‌ను బిఆర్‌ఎస్‌లో చేర్చుకోవడంతో అసంతృప్తికి గురైన కోనప్ప సిఎం రేవంత్ రెడ్డి సమక్షంలో కాంగ్రెస్‌లో చేరారు. ఏడాది గడవకుండానే కోనప్ప కాంగ్రెస్ పార్టీకి రాజీనామా చేశారు. ఇటీవల సిర్పూర్ కాగజ్ నగర్ నియోజకవర్గం కాంగ్రెస్ పార్టీలో నెలకొన్న విభేదాలు రచ్చకెక్కాయి.