ఉమ్మడి కుటుంబాలు విచ్ఛిన్నం కావడం, న్యూక్లియర్ కుటుంబాల వైపు మళ్లడం వల్ల చాలామంది వృద్ధులకు కుటుంబ సంరక్షణ లేకుండాపోయింది. కొన్ని కుటుంబాలకు బయటి సహాయం తీసుకోవడం తప్ప వేరే మార్గం ఉండదు. చాలామంది వృద్ధులను నిర్లక్ష్యం చేయడం, విడిచిపెట్టడం వంటివి చేస్తారు. నానాటికీ పెరుగుతున్న వృద్ధుల జనాభాతో వృద్ధాశ్రమాలు ప్రాముఖ్యతను సంతరించుకున్నాయి.వృద్ధాశ్రమం పదవీ విరమణ గృహం అని కూడా పిలుస్తారు. ఇది నర్సింగ్, సహాయక జీవన సౌకర్యాలతో కూడిన నివాస సౌకర్యం వృద్ధుల కోసం రూపొందించబడింది.
వారు తమ జీవన నాణ్యతను కాపాడుకోవడానికి భోజనం, హౌస్ కీపింగ్, వైద్య సంరక్షణ, వినోద కార్యకలాపాల నుండి అవసరమైన సహాయం, సంరక్షణను అందుకుంటారు. వృద్ధాశ్రమం ఉద్దేశం మరెక్కడా లేని వారికి, వారికి మద్దతు ఇవ్వడానికి ఎవరూ లేని వారికి సురక్షితమైన స్వర్గధామం. కొంతమంది వృద్ధులు స్వచ్ఛందంగా వృద్ధాశ్రమంలోకి వెళుతుండగా, మరి కొంత మంది ఆర్థిక, సామాజిక లేదా ఆరోగ్య సంబంధిత పరిస్థితుల కారణంగా ఇతరులను ఇబ్బంది పెట్టడం ఇష్టం లేక వృద్ధాశ్రమాలకు వెళుతున్నారు. వృద్ధాశ్రమాలు ప్రైవేట్ యాజమాన్యం లేదా ప్రభుత్వం లేదా లాభాపేక్షలేని సంస్థలు నిర్వహించబడతాయి. వృద్ధాశ్రమం ప్రాథమిక లక్ష్యం వృద్ధులకు సహాయక, సంరక్షణ వాతావరణాన్ని అందించడం, వారి శారీరక మానసిక శ్రేయస్సును నిర్ధారించడం. వృద్ధాశ్రమాల సంఖ్య పెరగడానికి ప్రధాన కారణం మారుతున్న ప్రజల జీవనశైలి. పూర్వం కుటుంబాలు ఉమ్మడి కుటుంబాలుగా ఉండేవి, అక్కడ పెద్దలను గౌరవించేవారు, వారి పిల్లలు, మనుమలను చూసుకునేవారు.
అయినప్పటికీ, ఉమ్మడి కుటుంబాల ప్రారంభంతో వృద్ధులు తరచుగా తమను తాము రక్షించుకోవడానికి ఒంటరిగా మిగిలిపోతారు. పిల్లలు మంచి ఉద్యోగావకాశాల కోసం దూరమవుతారు. వృద్ధులు ఒంటరిగా, నిర్లక్ష్యానికి గురవుతున్నారు. మారుతున్న జీవనశైలి, పెరిగిన జీవన కాలపు అంచనా, పెరుగుతున్న జీవన వ్యయం, సమాజంలో మారుతున్న మహిళల పాత్ర వంటి కారణాల వల్ల ఇవి బాగా ప్రాచుర్యం పొందాయి. వృద్ధాశ్రమలు సరైన పరిష్కారం కానప్పటికీ వృద్ధులు సుఖంగా జీవించడానికి, వారికి అవసరమైన సంరక్షణను పొందేందుకు అవి సురక్షితమైన వాతావరణాన్ని అందిస్తాయి. సమాజం వృద్ధులపట్ల ప్రాముఖ్యతను గుర్తించి, వారు నిర్లక్ష్యం చేయబడకుండా, వెనుకబడి ఉండకుండా ఉండేలా చర్యలు తీసుకుంటాయి. నేషనల్ ఇన్‌స్టిట్యూట్ ఆన్ ఏజింగ్ ప్రకారం అరవై దాటిన వారిని వృద్ధులుగా గుర్తిస్తున్నారు. నేడు దేశంలోని 140 కోట్ల జనాభాలో వృద్ధుల జనాభా 10 శాతానికి పైగా ఉంది. 2036 నాటికి 15 శాతానికి అనగా సుమారు 22.7 కోట్లు పెరుగుతుందని అంచనా.
2050 నాటికి 20.8 శాతానికి సుమారు 34.7 కోట్లు రెండింతలు పెరుగుతుందని అంచనా. మనదేశం ఉమ్మడి కుటుంబ సంప్రదాయాలు విచ్ఛిన్నమై, సంస్థాగత సంరక్షణ మౌలిక సదుపాయాలు కూడా లేని సమయంలో వృద్ధాప్య జనాభా పెరుగుదలను ఎదుర్కోవాల్సి వచ్చింది. ఈ నేపథ్యంలో వృద్ధుల సంక్షేమం కోసం కేంద్ర, రాష్ట్ర ప్రభుత్వాలు ప్రత్యేక పథకాలు, నిధులు కేటాయించాల్సిన అవసరం ఎంతైనా ఉంది.హెల్ప్ ఏజ్ ఇండియా నివేదిక ప్రకారం 2026 నాటికి దేశంలో వృద్ధుల సంఖ్య 17 కోట్లకు పెరుగుతుందని అంచనా. ఈ నేపథ్యంలో వారి పట్ల ప్రభుత్వాలు సరైన జాగ్రత్తలు తీసుకోవాల్సిన అవసరం ఎంతైనా ఉంది. భారతీయ సమాజం మెరుగైన భవిష్యత్తు దిశగా ప్రయాణించాలంటే- వృద్ధులను వదిలించుకోవాలన్న ఆలోచనల్ని వీడాలి. పెద్ద వయస్కుల అపార అనుభవాన్ని సమాజ హితానికి ఉపయోగించుకోవాలన్న విజ్ఞతతో వ్యవహరించాలి. అర్థవంతమైన సామాజిక సంబంధాలే వృద్ధుల ఆరోగ్యం, శ్రేయస్సుపై తీవ్ర ప్రభావం చూపుతాయి.
అందుకే వృద్ధుల ఆరోగ్యం పట్ల శ్రద్ధ చూపడంతో పాటు కుటుంబసభ్యులు వారి పట్ల ప్రేమగా వ్యవహరించాలి. అందుకు ప్రపంచ దేశాల్లోని యువత, ఆరోగ్యసంస్థలు, స్వచ్ఛంద సంస్థలు ముందుకు రావాలని ఐకాస పిలుపునిచ్చింది. వృద్ధాశ్రమాలు మన సమాజంలో ప్రత్యేక స్థానాన్ని కలిగి ఉంటాయి. మన పెద్దలకు ఓదార్పు, సంరక్షణను అందిస్తాయి. అన్ని వృద్ధాశ్రమాలు ఒకే విధమైన సంరక్షణను అందించవు, అందించిన సేవలు చాలా మారవచ్చు. కొన్ని వృద్ధాశ్రమాలు డబ్బులు తీసుకుని వారికి సేవలు చేస్తే, మరి కొన్ని వృద్ధాశ్రమాలు ఎటువంటి డబ్బులు తీసుకోకుండా సేవలను అందిస్తున్నాయి. సమాజంలోని ప్రతి ఒక్కరూ కొన్ని పనులను చేపట్టడం ద్వారా వృద్ధులకు సహాయం చేయవచ్చు. వాకింగ్, తినడం లేదా ఇంటి పనుల వంటి రోజువారీ పనులలో వారికి సహాయం చేయండి. రెగ్యులర్ చెక్ అప్‌లను చేయించమే కాకుండా సకాలంలో మందులు అందించాలి, వారి ఆరోగ్య అవసరాలను అర్థం చేసుకోవాలి.
ఎంతో కష్టపడి పిల్లల్ని ప్రయోజకులను చేసి, వారిని ఒక ఇంటివారిని చేస్తే ఆ పిల్లలు పెద్దలపట్ల నిర్లక్ష్యంగా వ్యవహరిస్తున్నారు. వయస్సు పెరిగినటువంటి వారి పని వారు కూడా చేసుకోలేనటువంటి స్థితిలో ఉన్నటువంటి పెద్దలు తాను సంపాదించినటువంటి సంపదను కాదనుకొని అందరినీ వదులుకొని ఆశ్రమాలబాట పడుతున్నారు. వారిని మనం బాగా చూసుకుంటే అప్పుడే వృద్ధాశ్రమాలు తగ్గి వారు ఇంట్లోనే హాయిగా జీవిస్తారు. ఇంట్లో వారు వృద్ధులను భారంగా భావిస్తే వారు వృద్ధాశ్రమాల్లో నివసిస్తారు. కష్టపడి పెంచి పోషించినటువంటి తల్లిదండ్రులను ఇష్టంగా పోషిద్దాం. మన ఇంట్లో వున్న వృద్ధులను వారికి నచ్చినట్టు ఇష్టంగా, స్వేచ్ఛగా, బతకనిద్దాం. వారి అనుభవాలను పరిగణనలోకి తీసుకొని భవిష్యత్తు తరాలకు ఆదర్శం అవుదాం.
మోటె చిరంజీవి
99491 94327