మొదటి లాక్ డౌన్ అనంతరం విడుదలైన ‘జాతిరత్నాలు’ సంచలన విజయం సాధించిన సంగతి తెలిసిందే. ఈ సినిమాతో హీరో నవీన్ పోలిశెట్టి రేంజు అమాంతం పెరిగింది. అలాగే కథానాయికగా నటించిన ఫరియా అబ్ధుల్లా పేరు మార్మోగింది. తనదైన అందం, ఒడ్డు పొడుగు, నటన.. అన్నీ తెలుగు ప్రేక్షకులకు పిచ్చిగా నచ్చేశాయి. ఆ తర్వాత ఈ హైదరాబాదీ భామకు వరుసగా ఆఫర్లు వచ్చాయని తెలిసింది. అయితే చిట్టి ఫరియా ప్రతి అవకాశాన్ని అంగీకరించడం లేదు. ప్రాజెక్ట్ రేంజును బట్టి మాత్రమే ఆచితూచి సంతకం చేస్తోందని సమాచారం. ఇప్పటికే సోషల్ మీడియాల్లో ఫరియాకు భారీ ఫాలోయింగ్ పెరిగింది.
ఇన్ స్టా వేదికగా నిరంతరం డ్యాన్సింగ్ వీడియోలు, ఫోటోలను ఫరియా షేర్ చేస్తూ ఫాలోవర్స్‌ని పెంచుకుంటోంది. తాజా సమాచారం మేరకు ఫరియాకు మంచు కాంపౌండ్ నుంచి బిగ్ ఆఫర్ దక్కిందని తెలిసింది. మంచు విష్ణు హీరోగా శ్రీను వైట్ల దర్శకత్వం వహించనున్న ‘ఢీ’ సీక్వెల్ కోసం ఫరియా అబ్దుల్లాను సంప్రదించారట. విష్ణు స్వయంగా ఈ టవర్ బ్యూటీని ఒప్పించేందుకు ప్రయత్నిస్తున్నాడట. ప్రస్తుతం సంప్రదింపులు సాగుతున్నాయి. ఫరియా నటించేందుకు అంగీకరించినట్టేనని గుసగుసలు వినిపిస్తున్నాయి. త్వరలో ఈ విషయంపై క్లారిటీ రానుంది.