వర్సటైల్ హీరో సత్యదేవ్ టైటిల్ పాత్రలో నటిస్తోన్న చిత్రం ‘గాడ్సే’. గోపి గణేష్ పట్టాభి దర్శకుడు. ఇంతకు ముందు వీరిద్దరి కాంబినేషన్‌లో ‘బ్లఫ్ మాస్టర్’ వంటి సూపర్ హిట్ మూవీ రూపొందిన సంగతి తెలిసిందే. ఇప్పుడు ఈ సినిమాను మే 20న గ్రాండ్ లెవెల్‌లో విడుదల చేయబోతున్నట్లు నిర్మాత సి.కళ్యాణ్ తెలిపారు. గాడ్సే సినిమాను డైరెక్ట్ చేయడంతో పాటు ఈ సినిమాకు కథ, స్క్రీన్‌ప్లే, మాటలను కూడా గోపి గణేష్ అందిస్తున్నాడు. ఇక ‘గాడ్సే’ సినిమా రిలీజ్ డేట్‌ను తెలియజేసే పోస్టర్‌ను చిత్ర యూనిట్ విడుదలచేసింది. ఈ పోస్టర్‌లో సత్యదేవ్ రెండు చేతుల్లో రెండు పిస్టల్స్ పట్టుకొని ఇంటెన్స్‌గా చూస్తున్నాడు. అతని నుదుటిపై గాయమైంది. అవినీతిమయమైన రాజకీయ వ్యవస్థను ఒంటి చేత్తో ఎదుర్కొనే ధైర్యవంతుడైన యువకుడి పాత్రలో సత్యదేవ్ కనిపించనున్నాడు. ఐశ్యర్య ఇందులో ఇన్వెస్టిగేషన్ ఆఫీసర్‌గా కనిపించనుంది. ఈ చిత్రాన్ని సి.కె.స్క్రీన్స్ బ్యానర్‌పై ప్రముఖ నిర్మాత సి.కళ్యాణ్ నిర్మిస్తున్నాడు.