మెగాస్టార్ చిరంజీవి 153వ చిత్రం గాడ్ ఫాదర్. మోహన్ రాజా దర్శకత్వంలో కొణిదెల ప్రొడక్షన్స్, సూపర్ గుడ్ ఫిలింస్ సంయుక్తంగా నిర్మిస్తున్న ఈ చిత్రం ప్రస్తుతం ముంబయ్‌లో చిత్రీకరణ జరుపుకుంటోంది. ఇటీవలే బాలీవుడ్ సూపర్‌స్టార్ సల్మాన్ ఖాన్ షూటింగ్‌లో చేరారు. “మీ ఉనికి ప్రేక్షకులకు అద్భుత కిక్‌ని ఇస్తుందనడంలో సందేహం లేదు” అని చిరంజీవి ఈ సందర్భంగా పోస్ట్ చేశారు. ఈ సినిమాలో సల్మాన్ పవర్‌ఫుల్ పాత్రను పోషిస్తున్నాడు. చిరంజీవి, సల్మాన్ ఖాన్‌లపై తెరకెక్కించిన సన్నివేశాలు చిత్రానికి హైలైట్‌గా నిలుస్తాయని చిత్రయూనిట్ చెబుతోంది. ఇక తెలుగులో సల్మాన్‌ఖాన్ నటించడం ప్రత్యేకతను సంతరించుకుంది.
ఇలా మెగాస్టార్ చిరంజీవి, సల్మాన్ ఖాన్‌లు ఇద్దరూ ఒకేచోట కనిపించడం అభిమానులకు పండుగే. సోమవారంతో ‘గాడ్ ఫాదర్’ ముంబయ్ షెడ్యూల్ పూర్తయింది. ఈ సందర్భంగా చిత్ర నిర్మాతలు ఆర్‌బి చౌదరి, ఎన్‌వి ప్రసాద్ ముంబయ్ సెట్లో మర్యాదపూర్వకంగా చిరంజీవి, సల్మాన్‌ఖాన్‌ని కలిశారు. ఇందులో దర్శకుడు మోహన్ రాజా కూడా వున్నారు. ఈ ఫొటోను చిత్ర యూనిట్ విడుదల చేసింది. పొలిటికల్ యాక్షన్ డ్రామాగా తెరకెక్కుతున్న ఈ సినిమాలో చిరంజీవి పవర్ ఫుల్ పాత్రలో కనిపించనున్నాడు. ఈ సినిమాలో నయనతార కీలక పాత్ర పోషిస్తోంది. కొణిదెల సురేఖ సమర్పిస్తున్న ఈ చిత్రాన్ని ఆర్‌బి చౌదరి, ఎన్‌వి ప్రసాద్‌లు సంయుక్తంగా నిర్మిస్తున్నారు.