రేవంత్… ఆ విషయంలో మంచి నిర్ణయం తీసుకోవాలి: వినోద్ కుమార్

హైదరాబాద్: తెలంగాణ మంత్రివర్గ సమావేశంలో మంచి నిర్ణయాలు తీసుకోవాలని బిఆర్‌ఎస్ నేత వినోద్ కుమార్ సలహా ఇచ్చారు. రైతుబంధు లేదా రైతు భరోసా గురించి మంత్రివర్గంలో చర్చించాలని, రైతు బంధు అనేది ఖరీఫ్, రబీ ముందు ఇవ్వాలని డిమాండ్ చేశారు. బిఆర్ఎస్ నేత వినోద్ కుమార్ మీడియాతో మాట్లాడారు. ప్రధాని నరేంద్ర మోడీతో సహా పలువురు ప్రముఖులు రైతు బంధు పథకాన్ని ప్రశంసించారని, పిఎం కిసాన్ పథకానికి కూడా రైతు బంధు స్ఫూర్తి అని కొనియాడారు. రోహిణి కార్తీ సమయంలో పెట్టుబడి కోసం రైతులు తిరుగుతారని, ఇప్పుడు పంట వేసే ముందు రైతుబంధు ఇవ్వాలని రేవంత్ ప్రభుత్వాన్ని కోరారు. గతంలో రైతు బంధు పంటకోతల తరువాత రేవంత్ ప్రభుత్వం ఇచ్చిందని వినోద్ కుమార్ మండిపడ్డారు. కాంగ్రెస్ ప్రభుత్వం వచ్చిన తరువాత రైతు భరోసా అమలు కాలేదని చురకలంటించారు. మంత్రవర్గ సమావేశంలో రైతలు పట్ల సానుకూల నిర్ణయం తీసుకోవాలన్నారు.