రాష్ట్రంలో 783 గ్రూప్- 2 పోస్టుల భర్తీకి నిర్వహించిన పరీక్షల ప్రాథమిక కీ శనివారం(జనవరి 18) విడుదల చేయనున్నట్టు తెలంగాణ పబ్లిక్ సర్వీస్ కమిషన్(టిజిపిఎస్‌సి) ప్రకటించింది. శనివారం నుంచి ఈ నెల 22వ తేదీ సాయంత్రం 5 గంటల వరకు అభ్యర్థుల లాగిన్‌లో ప్రాథమిక కీ అభ్యంతరాలను స్వీకరిస్తారు. రాష్ట్రంలో 783 గ్రూప్-2 పోస్టుల భర్తీకి టిజిపిఎస్‌సి పరీక్షలు నిర్వహించింది. రాష్ట్రవ్యాప్తంగా 1,368 కేంద్రాల్లో ఈ పరీక్షలు జరిగాయి.
రాష్ట్రవ్యాప్తంగా 1,368 కేంద్రాల్లో గత ఏడాది డిసెంబర్ 15,16 తేదీలలో ఈ పరీక్షలు నిర్వహించిన విషయం తెలిసిందే. మొత్తం నాలుగు పేపర్లకు నిర్వహించిన ఈ పరీక్షలకు 5,51,943 మంది అభ్యర్థులు దరఖాస్తు చేసుకోగా, 2,55,468 మంది మాత్రమే పరీక్షకు హాజరయ్యారు. అభ్యర్థులు ఇంగ్లీష్‌లోనే అభ్యంతరాలు తెలపాలని, అభ్యర్థులు లేవనెత్తిన అంశాలకు సంబంధించిన ఆధారాల కాపీలను ఆన్‌లైన్‌లో సమర్పించాలని కమిషన్ సూచించింది. ఈ మెయిల్, వ్యక్తిగతంగా ఇచ్చే అభ్యంతరాలను ఎట్టిపరిస్థితుల్లో అనుమతించబోమని కమిషన్ స్పష్టం చేసింది.