కాంగ్రెస్ ప్రభుత్వంపై మాజీ మంత్రి, సిద్దిపేట ఎమ్మెల్యే హరీశ్ రావు మరోసారి ఫైరయ్యారు. ప్రభుత్వాన్ని ప్రశ్నిస్తే కేసులు పెడుతున్నారని, అక్రమ అరెస్టులు చేస్తున్నారని ఆయన ఆగ్రహం వ్యక్తం చేశారు. హెచ్ సియూకు సంబంధించిన భూముల విషయంలో ఫేక్ ఫోటోలు, వీడియోలను బిఆర్ఎస్ ఐటి సెల్, కార్యకర్తలు సోషల్ మీడియాలో వైరల్ చేశారనే ఆరోపణలపై పోలీసులు పలువురిపై కేసులు నమోదు చేశారు. ఈ క్రమంలో హరీశ్ రావు.. కాంగ్రెస్ సర్కార్ పై ఎక్స్ వేదికగా తీవ్రంగా మండిపడ్డారు.
“బిఆర్ఎస్ పార్టీ నాయకులు, కార్యకర్తలు, సోషల్ మీడియా వారియర్స్ పై కక్ష సాధింపు చర్యలు మానుకోవాలని హెచ్చరిస్తున్నాం. హెచ్ సియూ విషయంలో ప్రభుత్వాన్ని నిలదీసినందుకు విద్యార్థులు, బిఆర్ఎస్ నాయకులు, సోషల్ మీడియా వారియర్స్ పై అక్రమ కేసులు బనాయించారు. నేడు నల్లగొండ జిల్లా, మర్తినేని గూడెం మాజీ సర్పంచ్ బండమీది రామును అక్రమంగా పోలీస్ స్టేషన్ లో నిర్బంధించారు. ఇలా ఎంతమందిపై కేసులు పెట్టుకుంటూ వెళ్తారు రేవంత్ రెడ్డి గారు?. ప్రభుత్వ వైఫల్యాలను ప్రశ్నిస్తే అరెస్టులు చేస్తారా?. సోషల్ మీడియాలో పోస్టులు పెడితే కేసులు పెడతారా?. ఇదెక్కడి ప్రజాస్వామ్యం?.. ఇదేం ఇందిరమ్మ రాజ్యం?. అక్రమ కేసులను వెంటనే ఉపసంహరించుకోవాలని రాష్ట్ర ప్రభుత్వాన్ని డిమాండ్ చేస్తున్నాం. మీ పిట్ట బెదిరింపులకు భయపడేది లేదని మరోసారి స్పష్టం చేస్తున్నాం. రైతులకు, మహిళలకు, విద్యార్థులకు, వృద్ధులకు, దివ్యాంగులకు.. ఇలా అన్ని వర్గాల ప్రజలకు మీరు ఇచ్చిన హామీలను అమలు చేయించేదాకా బిఆర్ఎస్ పార్టీ వదిలిపెట్టదు. ఎక్కడికక్కడ మిమ్మల్ని నిలదీస్తాం. ప్రజాక్షేత్రంలో మీ వైఫల్యాలను ఎండగడుతూనే ఉంటాం” అని ఆయన హెచ్చరించారు.