డొమినికన్ రిపబ్లిక్ దేశంలో వారం క్రితం అదృశ్యమైన భారత సంతతి విద్యార్థిని సుదీక్ష కోణంకికి సంబంధించిన దుస్తులు స్థానిక పుంటా కానా బీచ్‌లో లభ్యమయ్యాయి. స్థానిక మీడియా కథనాల ప్రకారం, సుదీక్ష కోణంకి ధరించినట్లు భావిస్తున్న దుస్తులను ఒక లాంజ్ కుర్చీ వద్ద గుర్తించారు. ఇసుకలో కూరుకుపోయిన దుస్తులు, వాటి పక్కనే లేత గోధుమ రంగు చెప్పులు ఉన్నాయి. సిసి కెమెరా ఫుటేజ్ పరిశీలించి చూస్తే, సుదీక్ష ధరించిన దుస్తులను అవి పోలి ఉన్నాయి. నిఘా కెమెరాల్లో ఆమెతో చివరగా కనిపించిన వ్యక్తి జోషువా రీబ్‌ను పోలీసులు విచారిస్తున్నారు. డొమినికన్ అధికారులు కోణంకి కోసం గాలింపు చర్యలు ముమ్మరం చేశారు. అమెరికాలోని వర్జీనియాకు చెందిన భారతీయ సంతతికి చెందిన 20 ఏళ్ల సుదీక్ష తన స్నేహితులతో కలసి డొమినికన్ రిపబ్లిక్ దేశానికి విహారయాత్రకు వెళ్లింది. ఈ నెల 6న సాయంత్రం 4 గంటల ప్రాంతంలో అదృశ్యమైనట్లు ఆమె స్నేహితులు పోలీసులకు ఫిర్యాదు చేశారు. సిసి కెమెరా ఫుటేజిలో సుదీక్ష మిన్నెసోటాలోని సెయింట్ క్లౌడ్ స్టేట్ యూనివర్శిటీలో సీనియర్ అయిన 22 ఏళ్ల జోషువా రీబ్‌తో కలసి బీచ్ దగ్గర ఈ నెల 6 తెల్లవారు జామున 4.15 గంటలకు నడుస్తూ కనిపించింది. ఒకానొక సమయంలో వారిద్దరూ చేతులు పట్టుకుని ఉన్నారు.
వారికి సమీపంలోనే సుదీక్ష స్నేహితులు కూడా ఉన్నారు. స్థానిక మీడియా కథనాల ప్రకారం, సుదీక్ష స్నేహితులు హోటల్‌కు తిరిగి వెళ్లగా, ఆమె, రీబ్ మాత్రం బీచ్‌లో ఉండిపోయారు. రిసార్ట్‌లో అంతరాయం కారణంగా నిఘా కెమెరాలు పని చేయకపోవడంతో అందుకు సంబంధించిన ఫుటేజ్ లభ్యం కాలేదు. అటు విచారణలో రీబ్ పోలీసులకు పొంతనలేని సమాధానాలు చెప్పాడు. సుదీక్షను అలల నుంచి రక్షించానని, ఆమె స్పృహ కోల్పోయిందని అతను తెలిపాడు. దీనితో రీబ్‌ను పోలీసులు నిఘాలో ఉంచారు. అతని కదలికలపై వారు నిఘా పెట్టారు. అయితే, రీబ్‌ను ఇంకా అనుమానితునిగా పరిగణించలేదు. మరొక వైపు రీబ్‌ను పోలీసులు నిబంధనలకు విరుద్ధంగా నిర్బంధించారని, అధికారిక అనువాదకుడు లేకుండానే విచారించారని అతని తల్లిదండ్రులు ఆరోపించారు. ఈ కేసులో న్యాయం జరగాలని వారు కోరుతున్నారు. కాగా, సుదీక్ష అదృశ్యమై 8 రోజులు గడుస్తుండడంతో పోలీసులు గాలింపు చర్యలను ముమ్మరం చేశారు. ఆమె ఆచూకీ తెలిపిన వారికి బహుమతి ఇస్తామని వారు ప్రకటించారు. సుదీక్ష 5 అడుగుల 3 అంగుళాల ఎత్తు, నల్లని జుట్టు, గోధుమ రంగు కళ్లు కలిగి ఉంటుందని పోస్టర్లలో పేర్కొన్నారు.