నేచురల్ స్టార్ నాని హీరోగా నటించిన శ్యామ్ సింగ రాయ్ చిత్రాన్ని నిహారిక ఎంటర్‌టైన్‌మెంట్స్ బ్యానర్ మీద వెంకట్ బోయనపల్లి నిర్మిస్తున్నారు. ఈ చిత్రానికి రాహుల్ సంకృత్యాన్ దర్శకుడు. సాయి పల్లవి, కృతి శెట్టి, మడోన్నా సెబాస్టియన్‌లు హీరోయిన్లు. ఈ మూవీ ఈనెల 24న ప్రపంచ వ్యాప్తంగా విడుదలకాబోతుంది. ఈ సందర్భంగా హీరోయిన్ సాయిపల్లవి మీడియాతో మాట్లాడుతూ చెప్పిన విశేషాలు…
మానసికంగా సిద్ధమై…
ప్రతి మూవీ నాకు నమ్మకం కలిగాకే చేస్తాను. అలాగే స్క్రిప్ట్ చదివేటప్పుడు ‘సినిమా ఇలా ఉంటుంది, నా పాత్ర అలా చేయొచ్చు’ అని ఒక ఐడియా వస్తుంది. ఇక ‘శ్యామ్ సింగరాయ్’లో స్క్రిప్ట్ చదివేటప్పుడు దేవదాసి క్యారెక్టర్ ఎలా చేయాలి? అనేదాని కంటే వాళ్ల సైకాలజీ ఎలా ఉంటుంది అని చెప్పడం నచ్చింది. వేరే సినిమాలతో పోలిస్తే ఈ సినిమాను మానసికంగా సిద్ధమై చేశాను.
అప్పుడు చాలా భయపడ్డా…
నేను డ్యాన్స్ ఎక్కువ చేసింది ‘లవ్ స్టోరీ’లోనే అనుకుంటా. ఈ సినిమాలో డ్యాన్స్ ఎంత కావాలో… అంతే పెట్టారు. నాకు క్లాసికల్ డ్యాన్స్ రాదు. ఇప్పటి వరకు నేర్చుకోలేదు. నేను చేయగలుగుతానని రాహుల్ నమ్మారు. నాతో పాటు పాటలో క్లాసికల్ డ్యాన్స్ చేసిన వారు చాలా అనుభవం ఉన్నవాళ్లు. ఈ పాటకు నృత్యం చేసేటప్పుడు చాలా భయపడ్డాను. నేను కూడా బాగా చేశానని అంటే అదే పెద్ద సక్సెస్ అనుకున్నాను.
ఎంత కావాలో అంతే…
దేవదాసి వ్యవస్థ గురించి పాఠశాలలో చదివా. దేవదాసీలు ప్రారంభంలో దేవుడికి సేవకులుగా ఉండేవారు. తర్వాత తర్వాత దాన్ని మార్చేశారు. వాళ్ల గురించి పూర్తిగా ఈ చిత్రంలో చూపించట్లేదు. మా సినిమాకు ఎంత కావాలో అంతే తీసుకున్నాం. ’శ్యామ్ సింగ రాయ్’ పాత్రతో పాటు దేవదాసి పాత్ర ఎంత చూపించాలో అంతే చూపించారు. ఇది పూర్తిగా దేవదాసి వ్యవస్థపై తీసిన సినిమా కాదు.
ఆయనను ఫాలో అయ్యాం అంతే…
అన్ని మూవీస్ క్యారెక్టర్‌కి కనెక్ట్ అయితేనే స్క్రీన్ మీద యాక్టింగ్ బావుంటుందనిపిస్తుంది. ఈ సినిమాలో సాయిపల్లవి కనిపించదు. దేవదాసి పాత్రే కనపడుతుంది. రాహుల్ చాలా క్లారిటీతో సినిమా తీశారు. ఈ కథకి ఏం కావాలి ఏం వద్దు అనేది ఆయనకు పూర్తిగా తెలుసు. నాని, నేను షూటింగ్ చేసిన ఫస్ట్ సీన్… సినిమాలో మా ఇద్దరి క్యారెక్టర్స్ మధ్య లాస్ట్ సీన్ ఎలా చేయాలో మాకు తెలియలేదు. దర్శకుడే ‘ఇలా చేయండి’ అని చెప్పారు. మేం ఆయనను ఫాలో అయ్యాం అంతే.
తదుపరి చిత్రాలు…
నేను నటించిన ‘విరాట పర్వం’ షూటింగ్ పూర్తయింది. నా పాత్ర డబ్బింగ్ మాత్రమే బ్యాలెన్స్ ఉంది. తమిళంలో ఓ సినిమా చేశా. అది కూడా త్వరలో విడుదల అవుతుంది.