టోక్యో: నిన్నమొన్నటి వరకు ఎగిరే కార్ల గురించి చర్చ జరిగింది. ఇప్పుడు జపాన్‌లోని టోక్యోకు చెందిన స్టార్టప్ కంపెనీ ఎఎల్‌ఐ టెక్నాలజీస్ ఎగిరే బైక్(Hoverbike)ను ఆవిష్కరించింది. ఈ బైక్ బుకింగ్ కూడా ఆరంభమైంది. ఈ ఎగిరే బైక్ పేరును XTURISMO Limited Edision అని పెట్టారు. ఈ ఎగిరే బైక్ బుకింగ్‌ను అక్టోబర్ 26 నుంచే మొదలెట్టారు. కంపెనీ కేవలం 200 యూనిట్ల ఫ్లయింగ్ బైక్స్‌ను మాత్రమే తయారు చేయనుంది. ఈ కంపెనీ చీఫ్ ఎగ్జిక్యూటివ్ డైసుకె కటానో రాయిటర్స్ వార్తా సంస్థకు ఇచ్చిన ఇంటర్వూలో మనం ఇంత వరకు రవాణాకు నేల మీద మాత్రమే కదలాడాము. ఇప్పుడు మేమే కొత్త విధానాన్ని కనుగొన్నాము. నలుపు, ఎరుపు రంగులో ఉండే ఈ హోవర్‌బైక్ కనిపించడానికి మోటార్ సైకిల్ మాదిరే కనిపిస్తుంది. దీని మీద ప్రొఫెల్లర్స్ ఉంటాయి. స్థిరమైన మెషిన్ ఉండడం వల్ల ల్యాండింగ్ స్కిడ్స్ కూడా ఉంటుంటాయి. ఈ స్టార్టప్ కంపెనీకి మిత్సుబిషి ఎలెక్ట్రిక్, క్యోసెరా మద్దతునిస్తున్నాయి. ఈ ఎగిరే బైక్‌ను ఫుజి కొండల వద్ద ప్రదర్శించారు. ఇది నేలకు కొన్ని మీటర్ల ఎత్తులో ఎగిరింది. జనరద్దీ ఉండే ప్రాంతాల్లో ఎగిరేందుకు దీనికి అనుమతి ఉండదు, రెస్కూ టీమ్ సమస్యలను ఇది సునాయాసం చేసేస్తుంది. దుర్గమమైన ప్రదేశాలలోకి వెళ్లగలుగుతుంది.