భారత స్పీడ్‌స్టర్ జస్‌ప్రీత్ బుమ్రా అరుదైన ఘనతను సాధించాడు. ప్రతిష్ఠాత్మకమైన ఐసిసి టెస్టు క్రికెటర్ ఆఫ్‌ది ఇయర్ అవార్డును సొంతం చేసుకున్నాడు. టెస్టుల్లో అసాధారణ బౌలింగ్‌ను కనబరిచిన బుమ్రా 2024 సంవత్సరానికి సంబంధించి అత్యుత్తమ క్రికెటర్ అవార్డును దక్కించుకున్నాడు. ఈ క్రమంలో ఈ ఘనత సాధించిన ఆరో భారత క్రికెటర్‌గా నిలిచాడు. గతంలో రాహుల్ ద్రవిడ్, గౌతం గంభీర్, వీరేంద్ర సెహ్వాగ్, రవిచంద్రన్ అశ్విన్, విరాట్ కోహ్లిలు ఈ ఘనత సాధించారు. తాజాగా బుమ్రా ఈ దిగ్గజాల సరసన నిలిచాడు.
జో రూట్, కమిందు మెండిస్, హ్యారీ బ్రూక్ తదితరులు ఈ అవార్డు కోసం తీవ్రంగా పోటీపడ్డారు. వీరిందరిని వెనక్కి నెట్టి బుమ్రా 2024 సంవత్సరానికి సంబంధించి అత్యుత్తమ అవార్డును దక్కించుకోవడం విశేషం. కిందటి ఏడాది బుమ్రా టెస్టుల్లో అద్భుతంగా రాణించాడు. 13 మ్యాచుల్లో ఏకంగా 71 వికెట్లు పడగొట్టి పెను సంచలనం సృష్టించాడు. దీంతో అతనికి ప్రతిష్ఠాత్మకమైన ఐసిసి అవార్డు లభించింది.