కాజల్ అగర్వాల్ తల్లి కాబోతోంది. మరో నాలుగు నెలల్లో ఆమె ఒక పాపకో, బాబుకో జన్మనివ్వనుంది. తల్లి కాబోతుండటంతో ఆమె పలు సినిమాలు వదులుకుంది. అయితే గత ఏడాది ఆమె నటించిన పలు సినిమాలు ఈ ఏడాది విడుదల కానున్నాయి. రెండేళ్లుగా వాయిదా పడుతోన్న ‘ఆచార్య’ ఈ వేసవిలో విడుదల కానుంది. ‘ఆచార్య’లో ఆమె చిరంజీవి సరసన నటించింది. అలాగే దుల్కర్ సల్మాన్ తో కలిసి నటించిన లవ్ స్టోరీ ‘సినామిక’ కూడా త్వరలోనే విడుదలవుతుంది. ఫేమస్ కొరియోగ్రాఫర్ బృంద ఈ సినిమాతో దర్శకురాలిగా మారారు. హిందీలో ఆమె నటించిన ‘ఉమా’ అనే చిత్రం డైరెక్ట్‌గా ఓటిటి వేదికపైకి రానుంది. ఇది కూడా సమ్మర్‌లోనే స్ట్రీమ్ అవుతుంది. అలాగే తమిళంలో ఆమె నటించిన ఒక హారర్ థ్రిల్లర్ కూడా విడుదలకు సిద్ధంగా ఉంది. మొత్తంగా ఈ ఏడాది ఆమె నటించిన నాలుగు చిత్రాలు రిలీజ్ కాబోతున్నాయి. 2022లో ఆమె ఒక్క చిత్రంలో కూడా నటించే అవకాశం లేదు. కానీ కాజల్ థియేటర్లలో, ఓటిటి వేదికలపై ఈ ఏడాది బాగానే సందడి చేస్తుంది.