పాన్ ఇండియా స్టార్ ప్రభాస్ హీరోగా రాధాకృష్ణ కుమార్ దర్శకత్వంలో తెరకెక్కుతున్న పీరియాడిక్ సైన్స్ ఫిక్షన్ రొమాంటిక్ డ్రామా రాధే శ్యామ్. టీ సిరీస్ ఫిలిమ్స్, యువి క్రియేషన్స్ పతాకంపై భూషణ్ కుమార్, వంశీ, ప్రమోద్, ప్రసీదలు సంయుక్తంగా ఈ చిత్రాన్ని నిర్మిస్తున్నారు. ఈ చిత్రంలో హీరోయిన్‌గా పూజా హెగ్డే నటిస్తుండగా జస్టిన్ ప్రభాకరన్ తెలుగు వర్షన్‌కి సంగీతం అందిస్తున్నారు. ఈ చిత్రం ప్రచార చిత్రాలు, వీడియోలు, పాటలు ప్రేక్షకులు, అభిమానులను విశేషంగా ఆకట్టుకుంటున్నాయి. తాజాగా ఈ చిత్రం నుండి ఒక పోస్టర్‌ను చిత్ర యూనిట్ విడుదల చేయడం జరిగింది. రెబల్ స్టార్ కృష్ణంరాజు ఈ చిత్రంలో నటిస్తున్నట్లు చిత్ర యూనిట్ ప్రకటించింది. పరమహంస పాత్రలో కృష్ణంరాజు నటిస్తున్నట్లు తెలిపింది. అందుకు సంబంధించిన పోస్టర్‌ను విడుదల చేశారు. ఈ పోస్టర్‌లో కృష్ణంరాజు కాషాయ వస్త్రాలు ధరించి ఆకట్టుకుంటున్నారు. ఈ చిత్రాన్ని ప్రపంచవ్యాప్తంగా వచ్చే ఏడాది జనవరి నెలలో విడుదల చేసేందుకు చిత్ర యూనిట్ సన్నాహాలు చేస్తుంది.