యంగ్ రెబల్‌స్టార్ ప్రభాస్ ప్రస్తుతం ‘ఆదిపురుష్ 3డి’ చిత్రీకరణలో పాల్గొంటున్న సంగతి తెలిసిందే. ముంబయ్‌లో ఇటీవల దర్శకుడు ఓంరౌత్ పలు కీలక సన్నివేశాలను చిత్రీకరించారు. తాజాగా ‘ఆదిపురుష్’ టీమ్‌లో చేరింది యంగ్ బ్యూటీ కృతి సనన్. ఈ సందర్భంగా ఇలా ప్రభాస్, – సన్నీసింగ్ లతో కలిసి కృతి ఫోటోలకు ఫోజులిచ్చింది. ఆ ముగ్గురితో దర్శకుడు ఓంరౌత్ కూడా ఉన్నాడు. కృతి ఈ ప్రతిష్టాత్మక 3డి యాక్షన్ చిత్రంలో సీతాదేవిగా కనిపించనుంది. డార్లింగ్ ప్రభాస్ శ్రీరాముడిగా నటిస్తుండగా.. సన్నీసింగ్ లక్ష్మణుడిగా కనిపిస్తాడు. సైఫ్ అలీఖాన్ రావణాసురుడి పాత్రలో నటిస్తున్నాడు. ప్రధాన తారాగణంపై చిత్రీకరణ నేపథ్యంలో సీతాదేవి పాత్రధారి చేరికతో టీమ్‌లో నూతనోత్సాహం కనిపిస్తోంది. ఇక కృతి సనన్ కు టీమ్ నుంచి ఘనమైన ఆత్మీయ స్వాగతం లభించింది. ఇన్నాళ్లకు సీత పాత్రధారిపై సస్పెన్స్ వైదొలగింది. అనుష్క శర్మ-, అనుష్క శెట్టి-, కీర్తి సురేష్-, కియారా అద్వానీ తదితర భామల పేర్లు గత కొద్దిరోజులుగా తెరపైకి వచ్చాయి.
కానీ వీళ్లలో ఎవరూ ఎంపిక కాలేదు. చివరికి అందరినీ వెనక్కి నెట్టేసి కృతి సనన్ ఈ సినిమాలో చోటు దక్కించుకోవడం ఆసక్తికరం. “ఒక కొత్త ప్రయాణం మొదలవుతోంది . ఆదిపురుష్ … ఇది చాలా ప్రత్యేకమైనది .. గర్వంగా, గౌరవంగా ఈ మాయా ప్రపంచంలో భాగం కావడం సంతోషంగా ఉంది”అంటూ కృతి ఈ సందర్భంగా పేర్కొంది. ఇక ఈ ఏడాది జనవరిలో ‘ఆదిపురుష్’ రెగ్యులర్ చిత్రీకరణ ప్రారంభమైంది. 3డి యాక్షన్ డ్రామాగా తెరకెక్కుతున్న ఈ చిత్రం వచ్చే ఏడాది ఆగస్టు 11న థియేటర్లలోకి రానుంది.