‘కెసిఆర్, బిఆర్ఎస్ ని ప్రజలు గుండెల్లో పెట్టుకుని కాపాడుకుంటారు’

హైదరాబాద్: శూన్యం నుండి సునామీ సృష్టించి, అసాధ్యం అనుకున్న తెలంగాణ రాష్ట్రాన్నే సాధించిన ధీశాలి మన మాజీ ముఖ్యమంత్రి కెసిఆర్ అని బిఆర్ఎస్ వర్కింగ్ ప్రెసిడెంట్ కెటిఆర్ తెలిపారు. తన ట్విట్టర్ లో కెటిఆర్ ట్వీట్ చేశారు. ఒక్కడుగా బయలుదేరి లక్షల మంది సైన్యాన్ని తయారు చేసి, ఎన్నో అవమానాలు, ద్రోహాలు, కుట్రలు, కుతంత్రాలు అన్నిటిని ఛేదించిన ధీరత్వం కెసిఆర్ ది అని ప్రశంసించారు. ఆలాంటి ధీరుడిని కొన్ని కప్పదాట్లు, ద్రోహపు ఎత్తుగడలతో దెబ్బ తీయాలనుకునే రాజకీయ బేహారులకు తెలంగాణ ప్రజలే జవాబు చెప్తారన్నారు. ప్రజా ఆశీర్వాదం, మద్దతుతో 14 ఏళ్లు పోరాడి, ఉద్యమ పార్టీగా తెలంగాణ సాధించుకున్నామని, తెచ్చుకున్న రాష్ట్రాన్ని దశను, దిశను మార్చి కోట్లాది మంది జీవితాల్లో వెలుగులు నింపిన కెసిఆర్, బిఆర్ఎస్ పార్టీని ప్రజలు గుండెల్లో పెట్టుకుని కాపాడుకుంటారని కెటిఆర్ పేర్కొన్నారు. నిఖార్సైన కొత్తతరం నాయకత్వం తయారుచేస్తామని, పోరాట పంథాలో కదం తొక్కుదామని పిలుపునిచ్చారు.