అనోరాకు ఆస్కార్ పంట

ఐదు విభాగాల్లో అవార్డులు అందుకున్న
రోమాంటిక్ కామెడీ డ్రామా ఉత్తమ చిత్రం,
ఉత్తమ దర్శకుడు, ఉత్తమ నటి, స్క్రీన్‌ప్లే,
ఎడిటింగ్ విభాగాల్లో పురస్కారాలు ఉత్తమ
నటుడిగా ఆడ్రియన్ బ్రాడీ, ఉత్తమ నటిగా
మైకీ మ్యాడిసన్ ఎంపిక

 ఉత్తమ నటుడిగా అడ్రియన్ బ్రాడీ, ఉత్తమ నటిగా మైకీ మ్యాడిసన్
 ఉత్తమ దర్శకుడిగా సీన్ బేకర్
ప్రతిష్ఠాత్మక 97వ ఆస్కార్స్- 2025 పురస్కారాల్లో అనోరా సినిమాకు అవార్డుల పంట పండింది. లాస్ ఏంజెలెస్ డాల్బీ థియేటర్లో అట్టహాసంగా జరిగిన ఈ వేడుకలో రొమాంటిక్ కామెడీ డ్రామా ‘అనోరా’ ఉత్తమ చిత్రం, ఉత్తమ దర్శకుడు, ఉత్తమ నటి, స్క్రీన్‌ప్లే, ఎడిటింగ్ విభాగాల్లో అవార్డులను కైవసం చేసుకుంది. ‘ది బ్రూటలిస్ట్’ సినిమాలో నటనకుగానూ ఉత్తమ నటుడిగా అడ్రియన్ బ్రాడీ.. ‘అనోరా’లో నటనకు మైకీ మ్యాడిసన్ ఉత్తమ నటిగా అవార్డు అందుకున్నారు. అనోరా సినిమాకు గాను సీన్ బేకర్ ఉత్తమ దర్శకుడిగా అవార్డు సొంతం చేసుకున్నారు. ఇక ‘ఎ రియల్ పెయిన్’ చిత్రానికి కీరన్ కైల్ కల్కిన్ ఉత్తమ సహాయ నటుడిగా… ‘ఎమిలియా పెరెజ్’ చిత్రానికి గాను జోయా సల్దానా ఉత్తమ సహాయ నటిగా ఆస్కార్ అవార్డులను అందుకున్నారు. గత ఏడాది బాక్సాఫీస్ వద్ద రికార్డు కలెక్షన్లను వసూలు చేసిన ‘డ్యూన్: పార్ట్ 2’ ఉత్తమ సౌండ్, విజువల్ ఎఫెక్ట్ విభాగంలో ఆస్కార్‌ను సొంతం చేసుకుంది. ఇక లైవ్ యాక్షన్ షార్ట్ ఫిల్మ్ విభాగంలో మన దేశం నుంచి నామినేషన్‌లో నిలిచిన ‘అనూజ’ చిత్రానికి నిరాశే ఎదురైంది. ఈ విభాగంలో ‘ఐ యామ్ నాట్ ఏ రోబో’ ఉత్తమ షార్ట్ ఫిల్మ్‌గా అవార్డును సొంతం చేసుకుంది. ఇక ఈ వేడుకకు ప్రముఖ హాలీవుడ్ తారలతో పాటు సాంకేతిక నిపుణులు హాజరయ్యారు. ఈ వేదిక వద్ద పలువురు నటీమణులు అందమైన దుస్తుల్లో హొయలు పోతూ మైమరిపించారు.

ఆస్కార్ విజేతలు వీరే..
ఉత్తమ చిత్రం: అనోరా
ఉత్తమ నటుడు: అడ్రియన్ బ్రాడీ (ది బ్రూటలిస్ట్)
ఉత్తమ నటి: మైకీ మ్యాడిసన్ (అనోరా)
ఉత్తమ దర్శకత్వం: సీన్ బేకర్ (అనోరా)
ఉత్తమ సహాయ నటుడు: కీరన్ కైల్ కల్కిన్ (ది రియల్ పెయిన్)
ఉత్తమ సహాయ నటి: జోయా సాల్దానా (ఎమిలియా పెరెజ్)
ఉత్తమ స్క్రీన్‌పే: సీన్ బేకర్ (అనోరా)
ఉత్తమ సినిమాటోగ్రఫీ: లాల్ క్రాలే (ది బ్రూటలిస్ట్)
ఉత్తమ సౌండ్: డ్యూన్: పార్ట్2
ఉత్తమ విజువల్ ఎఫెక్ట్: డ్యూన్ : పార్ట్ 2
ఉత్తమ ఒరిజినల్ సాంగ్: ఎల్ మాల్ (ఎమిలియా పెరెజ్)
ఇంటర్నేషనల్ ఫీచర్ ఫిల్మ్: ఐయామ్ స్టిల్ హియర్
(వాల్టర్ సాల్లెస్- బ్రెజిల్)
ఉత్తమ ఒరిజినల్ స్కోర్: ది బ్రూటలిస్ట్ (డానియల్ బ్లమ్‌బెర్గ్)
ఉత్తమ ప్రొడక్షన్: డిజైన్ — – వికెడ్
ఉత్తమ లైవ్ యాక్షన్ షార్ట్ ఫిల్మ్: ఐయామ్ నాట్ ఏ రోబో
ఉత్తమ డాక్యుమెంటరీ షార్ట్ ఫిల్మ్: ది ఓన్లీ గర్ల్ ఇన్ ది ఆర్కెస్ట్రా
ఉత్తమ డాక్యుమెంటరీ ఫీచర్ ఫిల్మ్:నో అదర్ ల్యాండ్
ఉత్తమ యానిమేటెడ్ ఫీచర్ ఫిల్మ్: ఫ్లో
ఉత్తమ యానిమేటెడ్ షార్ట్‌ఫిల్మ్: ఇన్ ది షాడో ఆఫ్ ది సైప్రెస్
ఉత్తమ అడాప్టెడ్ స్క్రీన్‌ప్లే: కాన్‌క్లేవ్ (పీటర్ స్ట్రాగన్)
ఉత్తమ కాస్ట్యూమ్ డిజైన్: వికెడ్ (పాల్ తేజ్‌వెల్)
ఉత్తమ మేకప్, హెయిల్‌స్టైల్: ది సబ్‌స్టాన్స్
ఉత్తమ ఎడిటింగ్: అనోరా (సీన్ బేకర్)

ఆస్కార్ వేదికపై హిందీలో..
ఆస్కార్ వేడుకలో హిందీ భాష హైలైట్ అయింది. ఈ వేడుకను కానన్ ఓ బ్రెయిన్ హోస్ట్ చేశారు. ఈ సందర్భంగా ఆస్కార్ వేడుకలో ఆయన హిందీలో మాట్లాడారు. భారత ప్రజలకు శుభోదయం అంటూ పలకరించారు. ఈ వేడుక జరిగే సమయం మీకు ఉదయం కదా? అందరూ టిఫిన్ చేశారా? అంటూ ఆకట్టుకున్నారు. దీంతో భారతీయులంతా ఎంతో సంతోష పడ్డారు. భారతీయులంతా దీన్ని ప్రత్యేక గౌరవంగా భావిస్తున్నారు.