హైదరాబాద్: ప్రధానమంత్రి నరేంద్రమోడీ వరంగల్‌లో రానున్న భారతీయ రాష్ట్ర సమితి (బీఆర్‌ఎస్) పార్టీ సభ్యులు బహిష్కరిస్తామని మంత్రి కే తారక రామారావు ప్రకటించారు. తెలంగాణపై మోదీ ప్రభుత్వం నిర్లక్ష్యానికి పాల్పడుతోందని అసంతృప్తి వ్యక్తం చేసిన మంత్రి కేటీఆర్ ఇటీవల ఓ కార్యక్రమంలో ఈ నిర్ణయాన్ని వెల్లడించారు.
గుజరాత్‌లో 20,000 కోట్ల రూపాయల విలువైన రైల్వే కోచ్ ఫ్యాక్టరీని ప్రధాని మోదీ ఇటీవల ప్రారంభించిన విషయాన్ని ఆయన ప్రస్తావించారు. దీనికి విరుద్ధంగా, వరంగల్‌కు కేవలం 500 కోట్ల రూపాయలు కేటాయించడం, ఈ వ్యత్యాసాన్ని కేంద్ర ప్రభుత్వం తెలంగాణను పట్టించుకోకపోవడానికి సంకేతమని కేటీఆర్ విమర్శించారు. తెలంగాణ ఐటీ శాఖ మంత్రి కేటీఆర్ రాష్ట్ర అభివృద్ధికి కనీస నిధులు కేటాయించడంపై అసంతృప్తి వ్యక్తం చేశారు. ఇంత తక్కువ ఆర్థిక సాయం అందించడం వల్ల తెలంగాణపై కేంద్ర ప్రభుత్వం ఏ మాత్రం శ్రద్ధ చూపడం లేదని ఆయన అన్నారు. ప్రధానమంత్రి బూటకపు మాటలు నమ్మడానికి తెలంగాణ ప్రజలు సిద్ధంగా లేరన్నారు. ఇదే వరంగల్ జిల్లాకు ట్రైబల్ యూనివర్సిటీ హామీని ఇప్పటి దాకా నెరవేర్చని ప్రధానమంత్రి ఏ మొహం పెట్టుకొని వరంగల్ కు వస్తున్నారని మండిపడ్డారు.
మహబూబాబాద్ జిల్లా బయ్యారంలో ఉక్కు కర్మాగారం పెడతామని చెప్పిన ప్రధానమంత్రి ఆ హామీని నెరవేర్చకుండా ఏ మొహం పెట్టుకొని వస్తున్నారు? తొమ్మిదేళ్లపాటు కాలయాపన చేసిన ప్రధానమంత్రి ఇప్పుడు తెలంగాణకు 520 కోట్ల రూపాయలతో బిచ్చం వేసినట్లు వస్తున్నారు. తల్లిని చంపి బిడ్డను వేరు చేసినారు అన్న ప్రధానమంత్రిని తెలంగాణ ప్రజలు నమ్మరని పేర్కొన్నారు. మతం పేరిట ప్రజల మధ్య చిచ్చుపెట్టిన ప్రధానమంత్రిని తెలంగాణ ప్రజలు ఎవరు నమ్మరు. ప్రధాని పర్యటనను పూర్తిగా బహిష్కరిస్తున్నాం, మేం ఎవరమూ హాజరుకామని మంత్రి కెటిఆర్ స్పష్టం చేశారు.