తెలంగాణ రాష్ట్ర ప్రజలందరికీ బిఆర్ఎస్ ఎంఎల్‌ఎసి కల్వకుంట్ల కవిత భోగీ పండుగ శుభాకాంక్షలు తెలిపారు. కెబిఆర్ పార్క్ వద్ద తెలంగాణ సంస్కృతి ఆధ్వర్యంలో వైభవంగా భోగి వేడుకలు నిర్వహించారు. ఈ వేడుకలకు ఎంఎల్‌సి కవిత ముఖ్య అతిథిగా హాజరై భోగి మంటలను వెలిగించారు. ఈ కార్యక్రమంలో పెద్ద ఎత్తున మహిళలు పాల్గొన్నారు. ఈ సందర్భంగా ఎంఎల్‌సి కవిత మాట్లాడుతూ.. హైదరాబాద్ నడిబొడ్డున పల్లె వాతావరణం సృష్టించి భోగి వేడుకలు నిర్వహించడం అభినందనీయమన్నారు.
భోగి అంటేనే ప్రతికూలతను వదిలిపెట్టి నూతన ఉత్సాహంతో ముందుకు వెళ్లాలని చెప్పారు. మన సంస్కృతిని ముందు తరాలకు అందించేందుకు పండుగలే వారధి అని పేర్కొన్నారు. సాంస్కృతిక కార్యక్రమాలు, గంగిరెద్దుల ఆటలు అందరిని అలరించాయి. భోగి మంటల చుట్టూ యువతులు ఉత్సాహంగా నృత్యాలు చేశారు. చిన్నారులను భోగి పండ్లతో కవిత ఆశీర్వదించారు. ఈ కార్యక్రమంలో తెలంగాణ జాగృతి నాయకులు నవీన్ ఆచారి, అనంతుల ప్రశాంత్, అప్పల నరేంద్ర యాదవ్, అర్చన సేనాపతి, ఈగ సంతోష్ తదితరులు పాల్గొన్నారు.