ఢిల్లీ మెట్రో రైలులో ‘ కోతి ’ ప్రయాణం

సరదా సన్నివేశాల వీడియో వైరల్

న్యూఢిల్లీ: ఢిల్లీ మెట్రో రైలులో ఓ కోతి నింపాదిగా ప్రయాణించిన వీడియో వైరల్ అయింది. శనివారం సాయంత్రం జరిగిన ఈ సంఘటనను ఓ ప్రయాణికుడు వీడియో తీసి సోషల్ మీడియాలో పోస్ట్ చేశారు. ఢిల్లీలోని ఆనంద్ విహార్ స్టేషన్ నుంచి ద్వారకకు వెళ్లున్న రైలులోకి ప్రవేశించిన కోతి కంపార్ట్‌మెంట్లలో తిరుగుతూ చివరికి ఓ సీటులో కూర్చుంది. కొద్దిసేపు పక్కనున్న ప్రయాణికుడి తొడపై సరదాగా కాలు వాల్చింది. ముచ్చటపడ్డ మరో ప్రయాణికుడు కోతికి కూడా ఓ మాస్క్ ఇవ్వండి అంటూ సూచించారు. రైలు వేగం అందుకున్న సమయంలో కోతి ఆసక్తిగా బయటి పరిసరాలను తిలకించడం వీడియోలో రికార్డయింది. యమునా నది ప్రవాహాన్ని కూడా కోతి ఆసక్తిగా తిలకించింది. అయితే, కోతి ఎవరికీ ఎలాంటి ప్రమాదమూ తలపెట్టలేదని మెట్రో అధికారి ఒకరు తెలిపారు. అది మధ్యలో దిగిపోయిందని, ఆ తర్వాత కనిపించలేదని ఆయన తెలిపారు. జూన్ 7 నుంచి ఢిల్లీలో 50 శాతం సామర్థంతో మెట్రో రైళ్లకు ఆ రాష్ట్ర ప్రభుత్వం అనుమతిచ్చింది.

Monkey takes ride in Delhi Metro#Monkey #DelhiMetro pic.twitter.com/A2X3HUM1zM

— चेतन पुंडिल (@chetanpundil) June 20, 2021