చట్టపరమైన చర్యలు తప్పవంటూ నార్కొటిక్ బ్యూరో వార్నింగ్
మన తెలంగాణ / హైదరాబాద్ : మెగా హీరో సాయిధరమ్ తేజ్ నటిస్తున్న చిత్రం ‘గాంజా శంకర్’ వివాదాస్పదమవుతోంది. ఈ మూవీ టైటిల్‌పై తెలంగాణ రాష్ట్ర నార్కొటిక్ బ్యూరో ఆగ్రహం వ్యక్తం చేసింది. సినిమా పేరును మార్చాల్సిందేనంటూ ఈ మేరకు చిత్రబృందానికి నోటీసులు జారీ చేసింది. ఇందుకు సంబంధించిన వివరాలు ఇవి, సినిమాలకు సంబంధించిన ప్రతీ చిన్న విషయాన్ని జాగ్రత్తగా గమనించాలి… లేకపోతే ఎన్నో ఇబ్బందులు ఎదురవుతాయి. తాజాగా సాయి ధరమ్ తేజ్ సినిమాకు కూడా అలాంటి ఇబ్బందులే ఎదురయ్యాయి. ప్రస్తుతం ఈ మెగా హీరో.. దర్శకుడు సంపత్ నందితో కలిసి ‘గాంజా శంకర్’ అనే మూవీ చేస్తున్నాడు. ఇప్పటికే ఈ చిత్రానికి సంబంధించిన ప్రీ లుక్ కూడా ప్రేక్షకుల ముందుకు వచ్చింది.
నాలుగు నెలల క్రితం రిలీజ్ అయిన ఈ టైటిల్ గురించి ఇప్పుడు చర్చలు మొదలయ్యాయి. కాగా తెలంగాణ రాష్ట్రానికి చెందిన యాంటీ నార్కొటిక్ బ్యూరో.. ‘గాంజా శంకర్’ మూవీ టీమ్‌కు నోటీసులు పంపింది. టైటిల్‌లో గాంజాలాంటి మత్తు పదార్థం పేరును ఉపయోగించడమే దీనికి కారణమని తెలుస్తోంది. ‘యూట్యూబ్‌లో గాంజా శంకర్ – ఫస్ట్ హై పేరుతో ఒక వీడియో అప్లోడ్ అయ్యింది. ఆ ట్రైలర్‌ను బట్టి చూస్తే ఇందులో హీరో గంజాయి పండించే బిజినెస్ చేస్తున్నాడని అర్థమవుతుంది’ అంటూ ముందుగా ఈ నోటీసులో పేర్కొన్నారు. ఆ తర్వాత గాంజాయి లాంటి వాటిని పండించడం చట్టరీత్యా నేరం అని మరోసారి ఈ నోటీసుల ద్వారా గుర్తు చేశారు. అలాంటి నేరాలకు పాల్పడిన వారికి శిక్షలు ఏంటో కూడా ఇందులో పేర్కొన్నారు. ‘గాంజా శంకర్’ అనే సినిమాలో హీరో అలాంటి నేరాలకు పాల్పడడమే కాకుండా.. టైటిల్‌లోనే దాని గురించి గొప్పగా చెప్తున్నట్టు ఉందని తెలిపారు.
‘ఇలాంటి సీన్స్‌ను మామూలుగా చూపించడం వల్ల యువతలో నార్కొటిక్స్ గురించి గొప్పగా చూపించినట్టుగా ఉంటుంది. అంతే కాకుండా వాటిని ఉపయోగించడానికి ప్రేరేపిస్తున్నట్టుగా ఉంటుంది. ఇది చూస్తున్న ప్రేక్షకులపై, సమాజంపై ఎంతోకొంత ప్రభావం చూపిస్తుంది. వారిని డ్రగ్స్ తీసుకోడానికి ప్రేరేపిస్తుంది. ‘గాంజా శంకర్’ వల్ల ఇలాంటి ఇబ్బందులు తలెత్తే అవకాశాలు ఉన్నాయి కాబట్టి చట్టపరంగా మూవీ మేకర్స్‌కు సమస్యలు ఎదురవ్వడం ఖాయం. సినిమా అనేది ప్రతీ ఒక్కరి జీవితంలో కీలకంగా మారింది కాబట్టి పిల్లలపై, ఇంకా పూర్తిగా మానసికంగా బలపడని వ్యక్తులపై ఇది తీవ్ర ప్రభావం చూపిస్తుంది. ముఖ్యంగా మోషన్ పిక్చర్ అనేది చూడడానికి, వినడానికి సులువుగా ఉంటుంది కాబట్టి ఇది ఆడియన్స్‌పై వెంటనే ప్రభావం చూపించే అవకాశాలు ఎక్కువగా ఉంటాయి’ అని నార్కొటిక్ బ్యూరో నోటీసుల్లో ఉండడం గమనార్హం.