వృద్ధుల సంరక్షణ పిల్లలదే!

ఉమ్మడి కుటుంబాలు విచ్ఛిన్నం కావడం, న్యూక్లియర్ కుటుంబాల వైపు మళ్లడం వల్ల చాలా మంది వృద్ధులకు కుటుంబ సంరక్షణ లేకుండాపోయింది. కొన్ని కుటుంబాలకు బయటి సహాయం తీసుకోవడం తప్ప వేరే మార్గం ఉండదు. చాలా మంది వృద్ధులను నిర్లక్ష్యం చేయడం, విడిచిపెట్టడం వంటివి చేస్తారు. నానాటికీ పెరుగుతున్న వృద్ధుల జనాభాతో, వృద్ధాశ్రమాల ప్రాముఖ్యత ఈనాటి కంటే చాలా సందర్భోచితంగా ఉంది. వృద్ధాశ్రమం, పదవీ విరమణ గృహం అని కూడా పిలుస్తారు. ఇది నర్సింగ్, సహాయక జీవన సౌకర్యాలతో కూడిన నివాస సౌకర్యం వృద్ధుల కోసం రూపొందించబడింది. వారు తమ జీవన నాణ్యతను కాపాడుకోవడానికి భోజనం, హౌస్ కీపింగ్, వైద్యసంరక్షణ, వినోద కార్యకలాపాల నుండి అవసరమైన సహాయం, సంరక్షణను అందుకుంటారు. వృద్ధాశ్రమం ఉద్దేశం మరెక్కడా లేని వారికి, వారికి మద్దతు ఇవ్వడానికి ఎవరూలేని వారికి సురక్షితమైన స్వర్గధామం. వృద్ధాశ్రమం ప్రాథమిక లక్ష్యం వృద్ధులకు సహాయక, సంరక్షణ వాతావరణాన్ని అందించడం, వారి శారీరక మానసిక శ్రేయస్సును నిర్ధారించడం.

వృద్ధాశ్రమాల సంఖ్య పెరగడానికి మొదటి, ప్రధాన కారణం మారుతున్న ప్రజల జీవనశైలి. పూర్వం కుటుంబాలు ఉమ్మడి కుటుంబాలుగా ఉండేవి. అక్కడ పెద్దలను గౌరవించేవారు, వారి పిల్లలు, మనుమలను చూసుకునేవారు. అయినప్పటికీ ఉమ్మడి కుటుంబాల ప్రారంభంతో వృద్ధులు తరచుగా తమను తాము రక్షించుకోవడానికి ఒంటరిగా మిగిలిపోతారు. పిల్లలు మంచి ఉద్యోగావకాశాల కోసం దూరమవుతారు. వృద్ధులు ఒంటరిగా, నిర్లక్ష్యానికి గురవుతున్నారు. దీనికి తోడు చాలా మంది యువకులు ఉద్యోగాల కోసం, తల్లిదండ్రులను వదిలి విదేశాలకు వలసవెళ్తున్నారు. దీని ఫలితంగా వృద్ధులకు సాంగత్యం, సంరక్షణ లభించే వృద్ధాశ్రమాలు పెరుగుతున్నాయి. మారుతున్న జీవనశైలి, పెరిగిన జీవనకాలపు అంచనా, పెరుగుతున్న జీవన వ్యయం, సమాజంలో మారుతున్న మహిళల పాత్ర వంటి వివిధ కారణాల వల్ల ఇవి బాగా ప్రాచుర్యం పొందాయి. వృద్ధాశ్రమలు సరైన పరిష్కారం కానప్పటికీ, వృద్ధులు సుఖంగా జీవించడానికి, వారికి అవసరమైన సంరక్షణను పొందేందుకు అవి సురక్షితమైన వాతావరణాన్ని అందిస్తాయి.

సమాజం వృద్ధులపట్ల శ్రద్ధ వహించడం ప్రాముఖ్యతను గుర్తించి, వారు నిర్లక్ష్యం చేయబడకుండా, వెనుకబడి ఉండకుండా ఉండేలా చర్యలు తీసుకుంటాయి. నేషనల్ ఇన్‌స్టిట్యూట్ ఆన్ ఏజింగ్ ప్రకారం అరవై దాటిన వారిని వృద్ధులుగా గుర్తిస్తున్నప్పటికీ, నేడు దేశంలోని 140 కోట్ల జనాభాలో వృద్ధుల జనాభా 10 శాతానికి పైగా ఉన్నారు. 2036 నాటికి 15 శాతానికి అనగా సుమారు 22.7 కోట్లు పెరుగుతుందని అంచనా. 2050 నాటికి 20.8 శాతానికి అనగా సుమారు 34.7 కోట్లు రెండింతలు పెరుగుతుందని అంచనా. మన దేశం ఉమ్మడి కుటుంబ సంప్రదాయాలు విచ్ఛిన్నమై, సంస్థాగత సంరక్షణ మౌలిక సదుపాయాలు కూడా లేని సమయంలో వృద్ధాప్య జనాభా పెరుగుదలను ఎదుర్కోవాల్సి వచ్చింది.ఈ నేపథ్యంలో వృద్ధుల సంక్షేమం కోసం కేంద్ర, రాష్ట్ర ప్రభుత్వాలు ప్రత్యేక పథకాలు, నిధులు కేటాయించాల్సిన అవసరం ఎంతైనా ఉంది. హెల్ప్ ఏజ్ ఇండియా నివేదిక ప్రకారం 2026 నాటికి దేశంలో వృద్ధుల సంఖ్య 17 కోట్లకు పైగానే పెరుగుతుందని అంచనా.ఈ నేపథ్యంలో వారి పట్ల ప్రభుత్వాలు సరైన జాగ్రత్తలు తీసుకోవాల్సిన అవసరం ఎంతైనా ఉంది.

భారతీయ సమాజం మెరుగైన భవిష్యత్తు దిశగా ప్రయాణించాలంటే- వృద్ధులను వదిలించుకోవాలన్న ఆలోచనల్ని వీడాలి. పెద్ద వయస్కుల అపార అనుభవాన్ని సమాజ హితానికి ఉపయోగించుకోవాలన్న విజ్ఞతతో వ్యవహరించాలి. వృద్ధాప్యంలో వినికిడి లోపం, కంటిశుక్లం, వక్రీభవన లోపాలు, వెన్ను, మెడనొప్పి, ఆస్టియో ఆర్థరైటిస్, క్రానిక్ అబ్‌స్ట్రక్టివ్ పల్మనరీ డిసీజ్, మధుమేహం, రక్తపోటు, గుండె జబ్బులు, డిప్రెషన్, దంత సమస్యలు, జీర్ణకోశం, మోకాళ్ళు, కిళ్ళనొప్పులు, బిపి, షుగర్, డిమెన్షియా వంటివి వృద్ధులలో కనిపించే అతి సాధారణ రుగ్మతలు. కానీ ఆరోగ్యకరమైన జీవనశైలితో ఈ సమస్యలను, పరిస్థితులను నివారించవచ్చు. ధైర్యం, గట్టి సంకల్పం వున్నవారు యోగ, నడక, వ్యాయామం చేస్తూ ఉత్సాహంగానే వుంటారు. అటువంటి వాతావరణాన్ని కుటుంబ సభ్యులే కల్పించాలి. ఈ సంవత్సరం 2024 లో థీమ్ కూడా అదే. అర్థవంతమైన సామాజిక సంబంధాలే వృద్ధుల ఆరోగ్యం, శ్రేయస్సుపై తీవ్ర ప్రభావం చూపుతాయి.

అందుకే వృద్ధుల ఆరోగ్యం పట్ల శ్రద్ధ చూపడంతో పాటు కుటుంబ సభ్యులు వారి పట్ల ప్రేమగా వ్యవహరించాలి. అందుకు ప్రపంచ దేశాల్లోని యువత, ఆరోగ్య సంస్థలు, స్వచ్ఛంద సంస్థలు ముందుకు రావాలని ఐకాస పిలుపునిచ్చింది. వృద్ధాశ్రమాలు మన సమాజంలో ప్రత్యేక స్థానాన్ని కలిగి ఉంటాయి. మన పెద్దలకు ఓదార్పు, సంరక్షణను అందిస్తాయి. యువకులు ముఖ్యంగా వీటిని గమనించాలి. కుటుంబంతో లేనప్పుడు వృద్ధులు నివసించే చోటే వృద్ధాశ్రమాల్లో వారికి ఆహారం, నివాసం, వైద్యసంరక్షణ వంటి అవసరమైన సేవలను అందిస్తాయి. శిక్షణ పొందిన సిబ్బంది వృద్ధులను బాగా చూసుకునేలా చూస్తాయి. వృద్ధులు చదవడం, తోట పని, సమూహ ఆటలు వంటి కార్యకలాపాలలో పాల్గొంటారు. పండుగలు, పుట్టిన రోజులు, ప్రత్యేక కార్యక్రమాలు ఉత్సాహంగా జరుపుకుంటారు.
కొంతమంది పెద్దలు శాంతి, సాంగత్యం కోసం ఈ గృహాలను ఎంచుకుంటారు. అందరూ వారి వయస్సు వారు ఉండటం వల్ల వారు మాట్లాడుకోవడానికి, వారి ఆలోచనలు పంచుకోవడానికి, ఒంటరితనం పోవడానికి ఇవి ఎంతగానో దోహదపడతాయి.

కొంత మంది పెద్దలు వారి పిల్లలను ఇబ్బంది పెట్టడం ఇష్టం లేక వృద్ధాశ్రమాలకు వెళితే, మరి కొంతమంది ఇంట్లో పోరు భరించక ఆశ్రమాలకు వెళుతున్నారు. ఈ వృద్ధాశ్రమాలలో అత్యవసర వ్యవస్థలు వంటి ప్రత్యేక సౌకర్యాలు ఉన్నాయి. వైద్యులు, కౌన్సెలర్లు క్రమం తప్పకుండా సందర్శించడం వల్ల వృద్ధులు ఆరోగ్యంగా ఉంటారు. వృద్ధాశ్రమాలు మనకు శ్రద్ధ, కరుణ, సామాజిక బాధ్యత గురించి బోధిస్తాయి. వృద్ధాశ్రమాలు భౌతిక సౌకర్యాలను అందజేస్తుండగా, చాలా మంది వృద్దులకు తమ కుటుంబాల నుండి మానసికంగా డిస్‌కనెక్ట్ అయినట్లు భావించవచ్చు. సమాజం తరచుగా వృద్ధాశ్రమాలను ప్రతికూలంగా గ్రహిస్తుంది. ఇది వారి ధైర్యాన్ని ప్రభావితం చేస్తుంది. అధిక నాణ్యత గల వృద్ధాశ్రమాలు ఖరీదైనవి కూడా వున్నాయి. జనాభాలోని కొన్నివర్గాల వారికి అందుబాటులో ఉండవు. అన్ని వృద్ధాశ్రమాలు ఒకే విధమైన సంరక్షణను అందించవు, అందించినా సేవలు చాలా మారవచ్చు. కొన్ని వృద్ధాశ్రమాలు డబ్బులు తీసుకుని వారికి సేవలు చేస్తే, మరి కొన్ని వృద్ధాశ్రమాలు ఎటువంటి డబ్బులు తీసుకోకుండా వారి సేవలను అందిస్తున్నాయి.

సమాజంలోని ప్రతి ఒక్కరం కొన్ని పనులను చేపట్టడం ద్వారా వృద్ధులకు సహాయం చేయవచ్చు. వాకింగ్, తినడం లేదా ఇంటి పనుల వంటి రోజువారీ పనులలో వారికి సహాయం చేయండి. రెగ్యులర్ చెక్ అప్‌లను చేయించమే కాకుండా సకాలంలో మందులు అందించాలి. వారి ఆరోగ్య అవసరాలను అర్థం చేసుకోవాలి. వారు చెబుతున్న కథలు, అనుభవాలు పంచుకోనివ్వండి.
కుటుంబ సమావేశాలు, ఈవెంట్‌లు లేదా చిన్న పర్యటనలలో వారిని చేర్చండి.ఎ ల్లప్పుడూ వారి పట్ల గౌరవం, సహనం చూపండి. అవసరమైతే వారి ఆర్థిక నిర్వహణలో వారికి సహాయం చేయండి లేదా వారికి ఆర్థికంగా మద్దతు ఇవ్వండి. సాధారణ వయస్సు సంబంధిత సమస్యలు, వారికి మెరుగైన సహాయం చేయడానికి పరిష్కారాల గురించి తెలుసుకోండి. నిరాశ లేదా ఆందోళన సంకేతాలను గుర్తించండి, అవసరమైతే వృత్తిపరమైన సహాయం తీసుకోండి. స్వతంత్రంగా పనులు నిర్ణయించుకోవడానికి, చేయడానికి వారికి స్థలం, స్వేచ్ఛను అనుమతించండి.

వృద్ధుల హక్కులు, అవసరాల గురించి మీకు, ఇతరులకు అవగాహన కల్పించండి. ఎంతో కష్టపడి పిల్లల్ని ప్రయోజకులను చేసి, వారిని ఒక ఇంటి వాడిని చేస్తే ఆ పిల్లలు పెద్దలపట్ల నిర్లక్ష్యంగా వ్యవహరిస్తున్నారు. వయస్సు పెరిగినటువంటి, వారి పని వారు కూడా చేసుకోలేనటువంటి స్థితిలో ఉన్నటువంటి పెద్దలు తాను సంపాదించినటువంటి సంపదను కాదనుకొని అందరిని వదులుకొని ఆశ్రమాల బాటపడుతున్నారు. వారిని మనం బాగా చూసుకుంటే అప్పుడే వృద్ధాశ్రమాలు తగ్గి వారు ఇంట్లోనే హాయిగా జీవిస్తారు. ఇంట్లో వారు వృద్ధులను భారంగా భావిస్తే వారు వృద్ధాశ్రమాల్లో నివసిస్తారు. కష్టపడి పెంచి పోషించినటువంటి తల్లిదండ్రులను ఇష్టంగా పోషిద్దాం. మన ఇంట్లో వున్న వృద్ధులను వారికి నచ్చినట్టు ఇష్టంగా, స్వేచ్ఛగా బతకనిద్దాం. వారి అనుభవాలను పరిగణలోకి తీసుకొని భవిష్యత్తు తరాలకు ఆదర్శం అవుదాం.

మోటె చిరంజీవి
9949194327