గ్యాస్ సిలిండర్ పేలి..వ్యక్తి సజీవ దహనం
మూడు టిప్పర్లు, ట్రాక్టర్ దగ్ధం
పిప్పలకోటి బ్యారేజీ నిర్మాణ క్యాంపులో ఘటన
మన తెలంగాణ/హైదరాబాద్‌ః ఆదిలాబాద్ జిల్లా భీంపూర్ మండలం పిప్పలకోటి బ్యారేజీ నిర్మాణ సిబ్బంది నివాసం ఉండే క్యాంపులో సిలిండర్ పేలడంతో భారీ అగ్ని ప్రమాదం సంభవించింది. ప్రమాదంలో ఒకరు సజీవదహనం కాగా మూడు టిప్పర్ వాహనాలు, మరో రెండు లారీలు, ట్రాక్టర్ కాలి బుడిదయ్యాయి. బ్యారేజీ నిర్మాణ పనులు చేసే కార్మికులు అక్కడే గుడిసెలు వేసుకున్నారు. ఈక్రమంలో ఓ గుడిసెలో వంట చేసుకునే సమయంలో చిన్న గ్యాస్ సిలిండర్ పేలి ప్రమాదం జరిగినట్లుగా స్థానికులు చెబుతున్నారు. కాగా మంటల వ్యాపించిన సమీపంలో నిల్వ చేసుకున్న డీజిల్ ద్వారా భారీగా మంటలు చెలరేగాయి. అక్కడ ఉన్న 50 మంది సిబ్బంది ప్రాణాలు అర చేతిలో పెట్టుకుని కట్టు బట్టలతో పరుగులు పెట్టారు. ఈ ఘటన సమాచారాన్ని గ్రామస్థులు అగ్నిమాపక సిబ్బందికి సమాచారం ఇచ్చినప్పటికీ వారు చేరుకునేలోపు మంటలు వ్యాపించి సిబ్బంది తాత్కాలిక నివాసాలు కాలి బూడిదయ్యాయి. కాగా ప్రమాదంలో చనిపోయిన వ్యక్తిని ఇంకా గుర్తించాల్సి ఉందని స్థానికులు పేర్కొంటున్నారు.
One Killed after Gas Cylinder blast in Adilabad