ప్రపంచంలోనే అత్యంత పలుచనైన ఫోల్డబుల్ ఫోన్‌ను ఒప్పో లాంచ్ చేసింది. దీని పేరు ‘ఒప్పో ఫైండ్ ఎన్ 5’. దీని మందం (ముడిచినప్పుడు) 8.93 మిల్లీమీటర్లు మాత్రమే. 2024 విడుదలై అత్యంత పలుచని ఫోన్‌గా పేరు గాంచిన ‘ఆనర్ మేజిక్ వి3’ కంటే కూడా ఇది సన్నగా ఉంటుంది. ఫోన్‌ను తెరిస్తే దాని అత్యంత పలుచని పాయింట్ వద్ద 4.21 మిమీ మాత్రమే ఉంటుంది. దీనితో ప్రపంచంలోనే తమ ఫోన్ అత్యంత పలుచనైనదని సంస్థ ప్రకటించింది. సంస్థ ఈ ఫోన్‌ను మూసివేసినప్పుడు ఉండే కొలతల ఆధారంగానే క్రితం వారం విడుదలైన ‘హువావే మేట్ ఎక్స్‌టి ట్రిపుల్ ఫోల్డబుల్ ఫోన్’ అత్యంత సన్నగా ఉన్న ఫోన్ అవుతుంది. ఎందుకంటే దాని మందం 3.6 మిమీ మాత్రమే. ‘ఒప్పో ఫైండ్ ఎన్5’ను గురువారం లాంచ్ చేశారు. అన్ని యూరోపియన్, ఆసియా మార్కెట్లలో అందుబాటులోకి వచ్చే అవకాశం ఉంది. అయితే, ఒప్పో తన ‘ఫైండ్ ఎన్’ సీరీస్‌ను ఇప్పటి వరకు భారత మార్కెట్‌లో విడుదల చేయలేదు కనుక తాజా ఫోన్ ఇక్కడ ఎప్పుడు అందుబాటులోకి వస్తుందో స్పష్టత లేదు. కాగా, ‘ఒప్పో ఫైండ్ ఎన్5’ ధర రూ. 1.62 లక్షలు ఉండే అవకాశం ఉంది.
ఒప్పో ఫైండ్ ఎన్5 స్పెసిఫికేషన్లు, ఫీచర్లు : అమోలెడ్ డిస్‌ప్లేతో 6.62 అంగుళాల ఫుల్ హెచ్‌డి స్క్రీన్, ప్లస్ 8.1 అంగుళాల 2కె ఎక్స్‌టర్నల్ డిస్‌ప్లే, 120 హెర్జ్ ఎల్‌పిటిఒ రీఫ్రెష్ రేట్, 2160 హెర్జ్ పిడబ్లుఎం డిమ్మింగ్, స్టైలస్ పెన్‌కు అనుకూలమైన డిస్‌ప్లేని తీర్చిదిద్దారు. ఈ ఫోన్ ఐపిఎక్స్6, ఎక్స్9 రేటింగ్‌లతో వస్తోంది. అంటే పూర్తి వాటర్ ప్రూఫ్, డస్ట్, డర్ట్ ప్రొటెక్షన్‌లు ఉన్నాయన్న మాట. సైడ్ మౌంటెడ్ ఫింగర్ ప్రింట్ ఉన్న ఈ ఫోన్‌లో సరికొత్త క్వాల్‌కామ్ చిప్‌సెట్ స్నాప్‌డ్రాగన్ 8 ఎలీట్‌ను ఉపయోగించారు. 16 జిబి, 512 జిబి స్టోరేజ్ కలిగి ఉంది. అదే విధంగా 5600 ఎంఎహెచ్ బ్యాటరీ ఏర్పాటు చేశారు. ఇది 80 వాట్ల వైర్డ్ చార్జింగ్‌కు, 50 వాట్ల వైర్‌లెస్ చార్జింగ్‌కు సపోర్ట్ చేస్తుంది. అదే విధంగా ‘ఒప్పో ఫైండ్ ఎన్5’లో ఫోటోలు, వీడియోల రికార్డింగ్ కోసం 50 మెగాపిక్సెల్ ప్రధాన సెన్సర్‌తో హాసెల్‌బ్లాండ్ బ్రాండెడ్ ట్రిపుల్ రియర్ కెమెరాను అమర్చారు. ఇందులో 8 మెగాపిక్సల్‌తో తెరచినప్పుడు ఒకటి, ముడిచినప్పుడు ఒకటిగా మొత్తం రెండు సెల్ఫీ కెమెరాలు అమర్చారు. కలర్ ఒఎస్ లేయర్‌తో లేటెస్ట్ ఆండ్రాయిడ్ వెర్షన్ 15ను ఉపయోగించారు. మిస్టీ వైట్, కాస్మిక్ బ్లాక్ డస్కీ పర్పుల్ రంగుల్లో ఫోన్ అందుబాటులో ఉంది.