ప్రభుదేవా, అదాశర్మ, నిక్కి గల్రాని హీరోహీరోయిన్లుగా శక్తి చిదంబరం దర్శకత్వంలో వచ్చిన తమిళ్ మూవీ ‘చార్లీ చాప్లిన్’ను తెలుగులో ‘మిస్టర్ ప్రేమికుడు’తో అనువదించారు. శ్రీ తారకరామ పిక్చర్స్ పతాకంపై ఎం.వి.కృష్ణ సమర్పణలో వి.శ్రీనివాసరావు, గుర్రం మహేష్ చౌదరి ఈ చిత్రాన్ని ఈనెల 29న తెలుగులో విడుదల చేస్తున్నారు. ఈ సందర్భంగా హైదరాబాద్‌లో ఏర్పాటు చేసిన విలేకరుల సమావేశంలో నిర్మాత గుర్రం మహేష్ చౌదరి మా ట్లాడుతూ “ఎక్కడా రాజీపడకుండా ఈ చిత్రాన్ని తెలుగు స్ట్రయిట్ సినిమాలా డబ్బింగ్ చేయించాము. తమిళ్‌లో ఘన విజయం సాధించిన ఈ చిత్రం తెలుగులో కూడా అదే స్థాయిలో ఆడుతుందన్న నమ్మకం ఉంది”అని అన్నారు. వి.శ్రీనివాసరావు మాట్లాడుతూ “ఫుల్ లెంగ్త్ కామెడీ ఎంటర్‌టైనర్‌గా రూపొందిన ఈ చిత్రంలోని పాటలు, సెకండాఫ్‌లో వచ్చే సన్నివేశాలు సినిమాకు హైలైట్‌గా నిలుస్తాయి. ప్రభుదేవా పర్‌ఫార్మెన్స్, డాన్స్, అదాశర్మ, నిక్కిగల్రాని అందం, అభినయం సినిమాలో ఆకట్టుకుంటాయి”అని తెలిపారు. ఈ కార్యక్రమంలో ప్రసన్నకుమార్, ముత్యాల రాందాస్, గోపాల్ తదితరులు పాల్గొన్నారు.