కేంద్ర ప్రభుత్వ బడ్జెట్ దగ్గరికొస్తోంది. వివిధ రంగాలకు సంబంధించి ఆశలు రెక్కలు తొడుగుతున్నాయి. వీటన్నిటిలో ఆరోగ్యవిద్యకు ప్రత్యేకత కల్పించవలసిన అవసరం ఏర్పడుతోంది. యువత సమగ్ర అభివృద్ధి చెందాలంటే పాఠశాల స్థాయినుంచే విద్యా బోధనలో ఆరోగ్య విద్య బోధించేలా పాఠ్యప్రణాళిక తప్పనిసరి చేయడంతోపాటు తగిన నిధులు కేటాయించక తప్పదు. దీనివల్ల ప్రస్తుతం విద్యార్థులను పట్టిపీడిస్తున్న మానసిక, భౌతిక సమస్యలు పరిష్కారం కావడంతోపాటు ఆశావహమైన 2047 వికసిత్ భారత్ లక్షానికి కూడా దోహదం చేస్తుంది. ఈ నేపథ్యంలో 2025 కేంద్ర బడ్జెట్‌లో తుది మెరుగులు దిద్దుతున్నప్పుడు ఆరోగ్యవిద్యకు అత్యంత ప్రాధాన్యం కల్పించడం చాలా అవసరం. మొత్తం బడ్జెట్ కేటాయింపుల్లో ప్రస్తుతం 4.5% వరకు ఉన్న పెట్టుబడులు 6% వరకు పెంచడం తప్పనిసరి.
దీనితోపాటు ఆరోగ్యవంతమైన సమాజం ఏర్పడాలంటే పాఠశాల స్థాయిలోనే ఆరోగ్యవిద్య బోధించేలా ప్రభుత్వం పాఠ్యప్రణాళికతో పాటు పథకాలను అమలు చేయాలి. ప్రీప్రైమరీ పాఠశాలల్లో 3 నుంచి 4 ఏళ్లలోపు పిల్లల నమోదు 2018 నుంచి 2024 మధ్య కాలంలో 68.1 శాతం నుంచి 75.8 శాతానికి పెరిగినట్టు నివేదికలు వెల్లడించడం సానుకూల పరిణామం. దేశజనాభాలో 40% పైగా పాతికేళ్ల లోపువారే. వీరు ఎంత ఆరోగ్యంగా ఉంటే అంత ఆర్థిక ప్రగతికి దోహదం చేసినవారవుతారు. విద్యార్థుల్లో ఆరోగ్యపరమైన విజ్ఞానం, అంతకన్నా వారి ఆరోగ్యకరమైన ప్రవర్తన మరీ ముఖ్యం. మనదేశంలోని విద్యార్థుల్లో 30 నుంచి 40 శాతం మంది తీవ్రమైన మానసిక ఆరోగ్య సమస్యల సవాళ్లను ఎదుర్కొంటున్నారని అధ్యయనాలు వెల్లడిస్తున్నాయి. 13 నుంచి 17 ఏళ్లలోపు విద్యార్థుల్లో 25% తీవ్రమైన మనోవేదన లేదా నిరాశా నిస్పృహలతో కొట్టుమిట్టాడుతున్నారని 2007నాటి గ్లోబల్ స్కూల్ హెల్త్ సర్వే వెల్లడించింది. దీనివల్ల వీరు తరచుగా తమ దైనందిన విధులను సరిగ్గా నిర్వర్తించలేని పరిస్థితి ఏర్పడుతోంది. విద్యార్థుల భౌతిక, మానసిక ఆరోగ్యాన్ని విస్మరించడం రేపటి దేశ భవిష్యత్తుకు తీవ్ర పరిణామాలుగా దారితీస్తాయి.
ఆరోగ్య విద్య విషయంలో భారత్‌కు మిగతా దేశాలకు చాలా వ్యత్యాసం కనిపిస్తుంది. అమెరికాలో హైస్కూల్ విద్యార్థుల ఆరోగ్య ప్రవర్తనపై ప్రతి రెండేళ్లకొకసారి యూత్ రిస్క్ బిహేవియర్ సర్వే (వైఆర్‌బిఎస్) ద్వారా డేటా సేకరిస్తుంటారు. ఈ డేటా ఆయా విద్యార్థుల వాస్తవ పరిస్థితిని సాక్షాధారాలతో తెలియజేయడమేకాక, దానికి తగ్గట్టు మానసిక ఆరోగ్య సమస్యలను పరిష్కరించగల విధానాలను అమలు చేయడానికి ఉపయోగపడుతుంది. బ్రిటన్, కెనడా, జపాన్ దేశాలు కూడా ఆరోగ్య విద్యకు ప్రాధాన్యం ఇస్తున్నాయి. ప్రాథమిక స్థాయినుంచి విద్యార్థులకు ఆరోగ్య విద్య బోధనాంశంగా అమలు చేస్తున్నాయి. కానీ మనదేశంలో ఈ విషయంలో సమగ్ర విధానం లోపిస్తోంది. విద్యార్థుల మానసిక, భౌతిక ఆరోగ్యానికి ఫిజికల్ ఎడ్యుకేషన్ ఎంతో అవసరమైనా స్కూళ్లలో ఇది కనిపించడంలేదు. జాతీయ విద్యావిధానం2020లో కూడా ఫిజికల్ ఎడ్యుకేషన్‌ను కాస్త స్పృశించారు తప్ప ఆరోగ్యవిద్య ప్రాధాన్యతకు చోటుదక్కలేదు.
ఆరోగ్యవంతమైన సమాజం వల్లనే ఆర్థిక ప్రగతి సాధ్యమవుతుంది. ఆరోగ్యం బాగా లేకుంటే వారి నుంచి ఉత్పాదకత బాగా తగ్గిపోవడమేకాక, అత్యధిక వైద్య ఖర్చులకే సంపాదన హరించుకుపోయి మొత్తం కుటుంబాన్ని ఆర్థిక సంక్షోభంలో పడేస్తుంది. మనదేశంలో సరాసరి జీవన ప్రమాణం 60 ఏళ్లకు మించిలేదు. చాలా ఆసియా దేశాలకన్నా ఇది తక్కువ. అదే జపాన్‌లో 74 ఏళ్లు, చైనాలో 69 ఏళ్లు, జీవనప్రమాణంగా ఉంటోంది. మనదేశంలో ఆరోగ్యవంతమైన జీవనశైలి తొందరగానే ఆవిరై పోతోంది. జపాన్ వంటి దేశాలు ఆరోగ్యవిద్యను పాఠశాలల్లో పాఠ్యప్రణాళికగా తప్పనిసరిచేశారు. ఆరోగ్యం, పరిశుభ్రత, పౌష్ఠికాహారం, శారీరక వ్యాయామం ఇవన్నీ వారి సంస్కృతిలో భాగంగా ఉంటున్నాయి. ఈ అలవాట్లలో పిల్లలు పెరుగుతుంటారు. ఫలితంగా ఎక్కువ నాణ్యమైన జీవితం, సుదీర్ఘకాల ఆరోగ్యం తో అక్కడి జనాభా వర్ధిల్లుతోంది. భారత దేశంలో యోగ, ఆయుర్వేద వంటి విలువైన సంప్రదాయాలు సాంస్కృతిక పునాదులుగా ఉంటున్నా శ్రద్ధ చూపించడం లేదు.
వీటిని పిల్లలకు తప్పనిసరి చేయడం లేదు. ఏదేమైనా పాఠశాలల్లో ఆరోగ్యవిద్య తప్పనిసరి పాఠ్యాంశంగా అమలు చేస్తే కానీ సత్ఫలితాలు సాధ్యం కావు. ఫిజికల్ ఫిట్‌నెస్, మానసిక ఆరోగ్యస్థితి స్థాపకత, పౌష్టికాహారం, సామాజిక అనుబంధం, సాంకేతిక వినియోగం, తదితర అంశాలతో సమగ్ర విద్యాబోధనను అమలు చేయవలసిన అవసరం ఉంది.విద్యాపరమైన ఒత్తిళ్లను ఎదుర్కొనడానికి ఇది ఎంతో ముఖ్యం. ఈ మేరకు పాఠ్యప్రణాళికలో ఆచరణాత్మక జీవిత నైపుణ్యాలకు అంటే నిర్ణయాలు తీసుకోవడం, వ్యక్తుల మధ్య కమ్యూనికేషన్, స్వీయ న్యాయవాదం, ఈ విధమైన అంశాలతో విద్యార్థులను వాస్తవ ప్రపంచ సవాళ్లను ఎదుర్కొనేలా తీర్చిదిద్దాలి.
ఈమేరకు నిర్మాణాత్మక విధానం అవసరం. మొదట ప్రభుత్వం స్పష్టమైన పనితీరు ప్రమాణాలతో ప్రామాణికమైన ఆరోగ్యవిద్య పాఠ్యప్రణాళికను రూపొందించాలి. విద్యార్థుల పురోగతిని 6, 8, 10 తరగతుల చివరలో సమీక్షించాలి. ఈమేరకు పాఠ్యప్రణాళిక ప్రకారం చక్కగా బోధించడానికి ఉపాధ్యాయులకు ప్రత్యేక శిక్షణ కల్పించాలి. పబ్లిక్ ప్రైవేట్ భాగస్వామ్యం వల్ల నూతన ఆవిష్కరణల్లో వనరుల లోపాలు భర్తీ అవుతాయి. ఈ విధమైన ప్రయత్నాలు ప్రధాని మోడీ వికసిత్ భారత్ 2047 లక్షానికి దోహదపడతాయి. విద్యార్థుల యోగక్షేమాలకు ప్రాధాన్యం ఇస్తూ విజ్ఞానంతోపాటు నైపుణ్యాల్లో ఆరితేరేలా తయారు చేస్తే వ్యక్తిగత జీవితాలను అభివృద్ధి చేయడమే కాకుండా, దేశ ఆర్థిక ప్రగతిని సాధించగలుగుతాం.