‘పుష్పక విమానం’ సినిమా ఫ్లయింగ్ హిట్ కావడం సంతోషంగా ఉందన్నారు యంగ్ హీరో ఆనంద్ దేవరకొండ. శుక్రవారం ప్రేక్షకుల ముందుకొచ్చిన ‘పుష్పక విమానం‘ సినిమా అన్ని చోట్ల నుంచి సూపర్ హిట్ టాక్ తెచ్చుకుంది. ఈ నేపథ్యంలో చిత్ర బృందం హైదరాబాద్ రామానాయుడు స్టూడియోలో సక్సెస్ మీట్ నిర్వహించింది. ఈ సందర్భంగా హీరో ఆనంద్ దేవరకొండ మాట్లాడుతూ “పుష్పక విమానం సినిమా మీద మా అంచనాలు నిజమయ్యాయి. రెండు తెలుగు రాష్ట్రాలతో పాటు ఓవర్సీస్ నుంచి కూడా హిట్ టాక్ వస్తోంది. కథలో సందర్భానుసారం వచ్చే కామెడీ సీన్స్ కు బాగా నవ్వుతున్నారు”అని అన్నారు. దర్శకుడు దామోదర మాట్లాడుతూ “నేను రాసిన కథకు, సీన్స్ కు, మాటలకు వస్తున్న స్పందన చూస్తుంటే సంతృప్తిగా ఉంది. ఆనంద్, నిర్మాత విజయ్ నేను చెప్పింది నమ్మి, నేను సినిమా కోసం అడిగింది ఇచ్చి చేయించడం వల్లే ఇవాళ ఈ సక్సెస్ వచ్చింది”అని పేర్కొన్నారు. ఈ కార్యక్రమంలో హీరోయిన్లు గీత్ సైని, శాన్వి మేఘన, హర్ష, గిరిధర్ తదితరులు పాల్గొన్నారు.