ర్రైల్వే ప్రయాణికులపై ‘ప్రీమియం’ పిడుగు..

70 ఏళ్ల వారికే ‘సీనియర్’ రాయితీ!
ర్రైల్వే ప్రయాణికులపై ‘ప్రీమియం’ పిడుగు
న్యూఢిల్లీ: రైళ్లలో వృద్ధులకు రాయితీ ఎత్తివేస్తామనడంపై పెద్ద ఎత్తున విమర్శలు వచ్చిన వేళ రైల్వే శాఖ యూటర్న్ తీసుకుంది. వారికి రాయితీ పునరుద్ధరించనుంది. అయితే, ఇందులోనూ ఓ మెలిక పెట్టనుంది. కేవలం 70 ఏళ్లు పైబడి జనరల్, స్లీపర్ తరగతుల్లో ప్రయాణానికే రాయితీ వర్తింపజేయాలని నిర్ణయించినట్టు విశ్వసనీయ వర్గాలు తెలిపాయి. కొవిడ్ సమయంలో రైల్వేలో ఉన్న అన్ని రాయితీలు ఎత్తివేసిన సంగతి తెలిసిందే. ఆ తర్వాత కొన్ని రాయితీలు పునరుద్ధరించి నప్పటికీ.. వృద్ధులకు రాయితీని మాత్రం పునరుద్దరించలేదు. దీన్ని పునరుద్ధరించాలని డిమాండ్లు వ్యక్తమయ్యాయి. ఈ నేపథ్యంలో ఇటీవల రాయితీలపై రైల్వే మంత్రి అశ్వినీ వైష్ణవ్ పార్లమెంటులో కీలక ప్రకటన చేశారు. వృద్ధులకు రాయితీ పునరుద్ధరించే ఉద్దేశం లేదని కుండబద్దలు కొట్టారు. దీనిపై దేశ వ్యాప్తంగా విమర్శలు వెల్లువెత్తడంతో రైల్వే శాఖ తన నిర్ణయం మార్చుకున్నట్లు తెలుస్తోంది. కొవిడ్ ముందు 58 ఏళ్లు దాటిన మహిళలకు, 60 ఏళ్లు దాటిన పురుషులకు రాయితీ వర్తించేది. మహిళలకు 50 శాతం, పురుషులకు 40శాతం టికెట్‌లో రాయితీ ఇచ్చేవారు.

అయితే, ఇకపై కేవలం 70 ఏళ్లు దాటిన వారికి మాత్రమే రాయితీ ఇవ్వాలని రైల్వే యోచిస్తోందని విశ్వసనీయ వర్గాలు తెలిపాయి. అదీ కేవలం నాన్ ఎసి తరగతులకే పరిమితం చేయాలని భావిస్తున్నట్లు సమాచారం. ప్రస్తుతానికి దీనిపై సమీక్ష జరుగుతోందని, పూర్తి స్థాయిలో ఇంకా ఎలాంటి నిర్ణయమూ తీసుకోలేదని విశ్వసనీయ వర్గాలు తెలిపాయి. దీని వల్ల భారం తగ్గుతుందని రైల్వే బోర్డు భావిస్తోంది. మరోవైపు రైల్వే తన ఆదాయం పెంచుకునేందుకు మరో ఆలోచన చేస్తోంది. అన్ని రైళ్లలోనూ ప్రీమియం తత్కాల్ కోటాను ప్రవేశపెట్టాలని చూస్తున్నట్లు తెలుస్తోంది. ప్రస్తుతం దేశ వ్యాప్తంగా 80 రైళ్లలో మాత్రమే ప్రీమియం తత్కాల్ కోటా అమలవుతోంది. ఈ స్కీమ్ కింద కొన్ని టికెట్లను కేటాయిస్తారు. వీటికి డైనమిక్ ఫేర్ అమలవుతుంది. తత్కాల్ కోటాతో పోలిస్తే ఈ టికెట్లు కాస్త ఖరీదుగానే వుంటాయి. సీట్లు భర్తీ అవుతున్న కొద్దీ టికెట్ ధర పెరుగుతూ వుంటుంది. చివరి నిమిషంలో బుక్ చేసుకున్న వారికి మాత్రం వాత తప్పదు.

Railway Concessions may return Premium to 70 above aged