నాడు నన్ను జైల్లో పెట్టావు..ఇప్పుడు నీకూ అదే గతి
: కెటిఆర్‌పై ట్వీట్‌లో వ్యంగ్యాస్త్రాలు సంధించిన ఎమ్మెల్యే రాజాసింగ్
మన తెలంగాణ/హైదరాబాద్: ‘కర్మ ఎవరిని వదిలిపెట్టదు కెటిఆర్..!, నాడు నన్ను జైల్లో పెట్టావు..ఇప్పుడు నీకూ అదే గతి పడుతోందని బీజేపీ ఎమ్మెల్యే రాజాసింగ్ సెటైర్ వేశారు. ఫార్ములా ఈ రేసు కేసులో ఏసీబీ, ఈడీల విచారణ ఎదుర్కొంటున్న బీఆర్‌ఎస్ వర్కింగ్ ప్రెసిడెంట్ కేటీఆర్‌ను ఉద్దేశిస్తూ రాజాసింగ్ ఎక్స్ వేదికగా సెటైరికల్ ట్వీట్ చేశారు. జైలుకు వెళ్లే ముందు నాలుగు జతల బట్టలు (కటకటాల వెనుక కూడా ఫ్యాషన్ కీలకం), ఒక హాయిగా ఉండే వెచ్చని దుప్పటి, టవల్ (జెల్లో కూడా పరిశుభ్రత ముఖ్యం), కర్చీఫ్ (భావోద్వేగాలు అదుపు తప్పినప్పుడు), సబ్బులు (ఆ ‘క్లీన్ ఇమేజ్‘ని కొనసాగించడానికి), ఒక ప్యాకెట్ ఊరగాయ (ఎందుకంటే జైలు భోజనం ఫైవ్ స్టార్ కాదు) తీసుకెళ్లండని కేటీఆర్‌కు రాజాసింగ్ ఆ ట్వీట్‌లో సూచించారు.
స్వెటర్ మాత్రం అస్సలు మర్చిపోవద్దని, చలి తీవ్రత కంటే కర్మ తీవ్రత ఎక్కువ అని కేటీఆర్ పై రాజాసింగ్ వ్యంగ్యాస్త్రాలు సంధించారు. ఇతరులను లక్ష్యంగా చేసుకునేందుకు అధికారాన్ని దుర్వినియోగం చేసే వారు చివరికి వారి స్వంత ఔషధాన్ని రుచి చూస్తారని, కర్మ మరచిపోదు, అది సరైన క్షణం కోసం వేచి ఉందని రాజాసింగ్ చురకలేశారు. రాజాసింగ్ చేసిన ఈ ట్వీట్ ఇప్పుడు వైరల్ గా మారింది.