ఊహాజనితమైన అంశాలతో స్పష్టమైన ఆధారాలు లేకుండా పిటిషన్ వేశారని ధర్మాసనం పేర్కొంది. ప్రస్తుత దశలో జోక్యం చేసుకోలేమని తేల్చి చెప్పింది. అదేవిధంగా దర్యాప్తు విషయంలో సిఎం, హోమంత్రి కి ఎసిబి రిపోర్టు చేయనక్కర్లేదని ధర్మాసనం వెల్లడించింది. విచారణలో రేవంత్ జోక్యం చేసుకోవద్దని, ఒకవేళ జోక్యం చేసుకుంటే పిటిషనర్ సుప్రీం కోర్టును ఆశ్రయించవచ్చని కోర్టు వెల్లడించింది. ట్రయల్ కోర్టు కూడా పారదర్శకంగా కేసు విచార ణను పాదర్శకంగా చేపట్టాలని తెలిపింది. కేసు విచారణలో సిఎం రేవంత్ జోక్యం చేసుకోకూడదని ఆదేశించింది. కేసు విచారణపై విశ్రాంత జడ్జి పర్యవేక్షణకూ నిరాకరించిన సుప్రీంకోర్టు, భవిష్యత్‌లో సిఎం జోక్యంపై ఆధారాలుంటే కోర్టుకు వెళ్లొచ్చని తుది ఉత్తర్వులు జారీ చేసింది.
క్షమాపణల అంగీకారం : మరోవైపు బిఆర్‌ఎస్ ఎంఎల్‌సి కవిత బెయిల్‌పై ధర్మాసనాన్ని ఉద్దేశిస్తూ చేసిన వ్యాఖ్యలపై రేవంత్ రెడ్డికి సుప్రీంకోర్టు పలు సూచనలు చేసింది. తమ తీర్పులపై అభిప్రాయం చెప్పే హక్కు అందరికీ ఉందని పేర్కొన్న ధర్మాసనం, ప్రజా జీవితంలో ఉన్నవారు ఆచితూచి మాట్లాడాలని వెల్లడించింది. సీఎం రేవంత్ రెడ్డి క్షమాపణలను సుప్రీంకోర్టు అంగీకరించింది. ఢిల్లీ మద్యం కేసులో బిఆర్‌ఎస్ ఎంఎల్‌సి కవితకు బెయిల్ అంశంపై సిఎం రేవంత్ రెడ్డి పలు వ్యాఖ్యలు చేశారు. వీటిపై సుప్రీంకోర్టు అభ్యంతరం వ్యక్తం చేసింది. కవితకు బెయిల్ విషయంలో బిజెపి, బిఆర్‌ఎస్ మధ్య ఒప్పందం కుదిరిందన్న రేవంత్ వ్యాఖ్యలను, ప్రజలు తప్పుగా అర్థం చేసుకునే అవకాశం ఉందని స్పష్టం చేసింది. బాధ్యత కలిగిన ముఖ్యమంత్రి చేయాల్సిన వ్యాఖ్యలేనా అని జస్టిస్ బీఆర్ గవాయ్ నేతృత్వంలోని త్రిసభ్య ధర్మాసనం రేవంత్ రెడ్డి తరఫు న్యాయవాది ముకుల్ రోహత్గీని ప్రశ్నించింది. రాజకీయ వైరుధ్యంలోకి కోర్టులను ఎందుకు లాగుతారని ధర్మాసనం ఆగ్రహం వ్యక్తం చేసింది. తాము రాజకీయ పార్టీలను సంప్రదించి ఆదేశాలు జారీ చేయాలా? అని నిలదీసింది. తమ ఆదేశాలపై రాజకీయ నేతలు చేసే వ్యాఖ్యలను పట్టించుకోబోమని తేల్చిచెప్పింది.
ఓటుకు నోటు కేసు కథా కమామిషు…
కాగా, తెలంగాణ ఎంఎల్‌ఎల కోటా ఎంఎల్‌సి ఎన్నికల సందర్భంగా నామినేటెడ్ ఎంఎల్‌ఎను కొనేందుకు నాటి టిడిపి ఎంఎల్‌ఎ రేవంత్‌రెడ్డి ముడుపులు ఇచ్చేందుకు ప్రయత్నించారని ఎసిబి కేసు నమోదు చేసింది. అప్పట్లో టిడిపి అధినేత చంద్రబాబుతో రేవంత్‌రెడ్డి కాల్ రికార్డింగ్స్ కూడా బయటకు వచ్చాయి. అదేవిధంగా నామినేటెడ్ ఎమ్మెల్యే స్టీఫెన్‌సన్ నివాసంలో నగదుతో కూడిన బ్యాగ్‌తో రేవంత్‌రెడ్డి భేటీ అయిన వీడియో ఫుటేజ్ రాష్ట్రంలో సంచలనం సృష్టించింది. ఆ కేసులో రేవంత్‌రెడ్డి జైలుకు కూడా వెళ్లివచ్చారు. ఇటీవల లోక్‌సభ ఎన్నికల సమయంలో కూడా ఓటుకు నోటు కేసు విచారణ హాట్ టాపిక్‌గా మారింది. ఈ క్రమంలోనే కేసు విచారణను తెలంగాణ నుంచి మధ్యప్రదేశ్ కు మార్చాలని సుప్రీంకోర్టులో మాజీ మంత్రి, బిఆర్‌ఎస్ ఎంఎల్‌ఎ జగదీష్ రెడ్డి ట్రాన్స్‌ఫర్ పిటిషన్ దాఖలు చేశారు. ఇందులో భాగంగా తెలంగాణ ప్రభుత్వంతో సహా రేవంత్ రెడ్డి, ప్రతివాదులకు సుప్రీం కోర్టు నోటీసులు జారీ చేసింది.