రేవంత్ రెడ్డి.. తెలంగాణ ముఖ్యమంత్రిగా గురువారం మధ్యాహ్నం 1.04నిమిషాలకు ఎల్బీస్టేడియంలో ప్రమాణస్వీకారం చేయనున్నారు. ఈ క్రమంలో రేవంత్ రెడ్డికి ఎన్ని ఆస్తులు ఉన్నాయని తెలుసుకునేందుకు ప్రజలు ఆసక్తి చూపిస్తున్నారు. రేవంత్ రెడ్డి వద్ద నికర ఆస్తుల విలువ రూ.30 కోట్లుగా ఉన్నట్లు తెలుస్తోంది.
ఎన్నికల సమయంలో తన ఆస్తులకు సంబంధించిన వివరాలను అఫిడవిట్ లో రేవంత్ రెడ్డి వెల్లడించిన ప్రకారం.. ఆయన వద్ద రూ.5,34,000 నగదు ఉండగా.. రేవంత్, ఆయన సతీమణి గీతా రెడ్డి ఇద్దరి పేర్ల మీద రూ.30,95,52,652 విలువైన స్థిర, చర ఆస్తుల ఉన్నాయి. ఒక హోండా సిటీ, మరో మెర్సిడిస్ బెంజ్ కార్లు ఉన్నాయి. రేవంత్ రెడ్డి సతీమణి వద్ద రూ.83,36,000 విలువైన 1235 గ్రాముల బంగారం, వజ్రా ఆభరణాలు.. రూ.7,17,800 విలువైన 9,700 గ్రాముల వెండి వస్తువులు ఉన్నాయి. రేవంత్ దంపతుల పేర్ల మీద రూ.1,30,19,901 మేర అప్పులు ఉన్నాయి. వీటితోపాటు ఆయన వద్ద రూ.2 లక్షల విలువ చేసే పిస్టల్, రూ.50 వేల విలువ చేసే రైఫిల్ ఉన్నాయి.