అసంతృప్తులకు బుజ్జగింపు
భట్టి, శ్రీధర్‌బాబు, మర్రి శశిధర్‌రెడ్డిలను
మర్యాదపూర్వకంగా కలిసిన రేవంత్‌రెడ్డి
పదవీ ప్రమాణ స్వీకరణకు రావాలని భట్టికి రేవంత్ విజ్ఞప్తి
మన తెలంగాణ/హైదరాబాద్: టిపిసిసి అధ్యక్షుడిగా నియమితులైన రేవంత్‌రెడ్డి వరుసగా సీనియర్లు, ముఖ్య నేతలను కలుస్తున్నారు. గత కొన్ని రోజులుగా రేవంత్‌రెడ్డిని కలవడానికి భట్టి విక్రమార్క అసంతృప్తిగా ఉన్నారు. అయితే ఎట్టకేలకు సిఎల్పీ నేత భట్టి విక్రమార్కను రేవంత్‌రెడ్డి మర్యాదపూర్వకంగా కలిశారు. టిపిసిసి రేసులో ఉన్నప్పటికీ పదవి దక్కకపోవడంతో భట్టి విక్రమార్క అసంతృప్తికి లోనయ్యారు. కాగా కాంగ్రెస్ హైకమాండ్ ఆయనను ఢిల్లీకి పిలిపించి మాట్లాడింది. ఢిల్లీ నుంచి తిరిగి హైదరాబాద్ చేరుకున్న భట్టి విక్రమార్కతో మంగళవారం ఉదయం సీనియర్ నేత మల్లు రవి చర్చలు జరిపారు. అనంతరం మల్లు రవి మీడియాతో మాట్లాడారు. రాష్ట్రంలో పిసిసి అధ్యక్షుడు ఎంత ముఖ్యమో సిఎల్పీ నేత అంతే ముఖ్యమని అన్నారు. ఆ తర్వాత మల్లు రవితో కలిసి రేవంత్‌రెడ్డి భట్టి విక్రమార్కను ఆయన నివాసానికి వెళ్లి కలిశారు. నేడు గాంధీభవన్‌లో ఏర్పాటు చేసిన పదవీ బాధ్యతల స్వీకరణ కార్యక్రమానికి రావాలని రేవంత్ విజ్ఞప్తి చేశారు. భట్టి నివాసం వద్ద రేవంత్‌రెడ్డి మాట్లాడుతూ.. పిసిసి సిఎల్పీ కాంగ్రెస పార్టీకి జోడెద్దుల్లా పనిచేసి కార్యకర్తల కష్టాలు తీరుస్తామని చెప్పారు. సోనియాగాంధీ ఏ లక్షంతో తెలంగాణ ఇచ్చారో ఆ లక్షాలను ప్రభుత్వం తుంగలో తొక్కిందని విమర్శించారు.
ప్రజాస్వామ్యం అంటే గౌరవం లేకుండా, ప్రజలకు స్వేచ్ఛ లేకుండా ప్రభుత్వ పాలన సాగుతోందని ఆరోపించారు. దళితులు, గిరిజనులు, మైనార్టీలు, నిరుద్యోగ యువత, ఉద్యమకారుల ఆకాంక్షలు నెరవేర్చేందుకు కాంగ్రెస్ పార్టీ వేదికగా పని చేస్తామన్నారు. సిఎల్పీ నేత భట్టి విక్రమార్క మాట్లాడుతూ కాంగ్రెస్ పార్టీని అధికారంలోకి తీసుకురావడం ద్వారా ఆనాటి ప్రత్యేక రాష్ట్ర ఉద్యమ లక్ష్యాలను చేరుకుందామని విజ్ఞపిత చేశారు. అందునిమిత్తం పార్టీ శ్రేణులంతా కలిసికట్టుగా పనిచేయాల్సిన అవసరముందన్నారు. టిపిసిసి అధ్యక్షుడిగా నియమితులైన రేవంత్‌రెడ్డి విజయాలు సాధించాలని కోరుతూ అభినందనలు తెలిపారు. మరోవైపు కాంగ్రెస్ నేత మర్రి శశిధర్‌రెడ్డిని రేవంత్‌రెడ్డి మర్యాదపూర్వకంగా కలిశారు. రేవంతకు టిపిసిసి పదవి ఇవ్వడంపై మర్రిశశిధర్‌రెడ్డి అసంతృప్తి వ్యక్తపర్చడంతో పాటు ఇటీవల పార్టీ పదవులకు రాజీనామా చేశారు. ఆదర్శ్‌నగర్‌లోని న్యూ ఎంఎల్‌ఎ క్వార్టర్స్‌లో మాజీ మంత్రి శ్రీధర్‌బాబును రేవంత్‌రెడ్డి కలిశారు. ఈ సందర్భంగా రేవంత్‌ను శ్రీధర్‌బాబు ఘనంగా సత్కరించారు. అసంతృప్తులను ఒక్కొక్కరిని కలుస్తున్న రేవంత్‌రెడ్డి వాళ్లను శాంతింపజేసేందుకు తన వంతు ప్రయత్నాలు చేస్తున్నారు.
Revanth Reddy meets Bhatti Vikramarka