అమెరికా, బ్రిటన్ తయారీ ఆయుధాలను తమ భూభాగంపై ప్రయోగించిన ఉక్రెయిన్‌పై రగిలిపోతున్న రష్యా మరొక కొత్త క్షిపణి ప్రయోగానికి సిద్ధమైంది.ఈ విషయాన్ని రష్యా అధ్యక్షుడు వ్లాదిమిర్ పుతిన్ స్వయంగా వెల్లడించారు. ఉక్రెయిన్‌పై క్షిపణి ప్రయోగానికి తమ బలగాలు సిద్ధంగా ఉన్నాయని పుతిన్ తెలిపారు. ఉక్రెయిన్‌లోని డ్నిప్రో నగరంపై గురువారం తాము ఒరెష్నిక్ క్షిపణిని ప్రయోగించినట్లు రష్యా తెలియజేసింది. పరస్పర క్షిపణి ప్రయోగాలతో సుదీర్ఘంగా సాగుతున్న యుద్ధంలో మరింత ఉద్రిక్త పరిస్థితులు నెలకొన్నాయి.
పుతిన్ శుక్రవారం రక్షణ మంత్రిత్వశాఖ అధికారులు, ఆయుధ తయారీదారులతో సమావేశమై వారిని అభినందించారు. అమెరికా సరఫరా చేసిన ఎటిఎసిఎంఎస్ క్షిపణులతో పాటె యుకె తయారీ స్టార్మ్ షాడో క్షిపణులను తమపై ప్రయోగించడంతో మండి పడుతున్న రష్యా అణ్వాయుధాలు ప్రయోగించకతప్పదన్న హెచ్చరికలు జారీ చేసింది. ఈ నేపథ్యంలో ఇప్పటికే ఖండాంతర క్షిపణి ప్రయోగంతో రష్యాహెచ్చరికలు జారీ చేసింది. ఉక్రెయిన్ ఇదే విధంగా దూకుడు ప్రదర్శిస్తే మరిన్ని ఖండాంతర క్షిపణుల ప్రయోగానికి వెనుకాడబోమని రష్యా హెచ్చరించింది.